Onhumwafo yaJudas 1:1-25
1 Ame Judas, omupiya waJesus Kristus, nomumwaina waJakob,+ ohandi shangele ovaifanwa+ ovo ve holike kuKalunga Tate, nova amenwa omolwaJesus Kristus:+
2 Onghenda nombili nosho yo ohole nai mu hapupalifilwe.
3 Ovamwatate ovaholike, nonande onda li nda halelela oku mu shangela shi na sha nexupifo letweni,+ ondi wete sha yuka oku mu ladipika mu kondjele eitavelo+ olo la pewa ovayapuki lumwe aluke.
4 Onda hala oku mu shangela, molwaashi ope na ovalumenhu vamwe ve livakela mokati keni ovo va li va xunganekwa nale mOmishangwa. Ovahenakalunga ovo ohava longifa efilonghenda laKalunga ketu li li elipopilo lokunyona nopehe na ouxwenge*+ nokave fi ovadiinini kOmwene wetu, Jesus Kristus.+
5 Nonande oinima aishe ei omu i shii nale, onda hala oku mu dimbulukifa kutya konima eshi Jehova* a li a xupifa ovanhu muEgipiti,+ lwanima okwa ka hanauna po ovo va li vehe na eitavelo.+
6 Novaengeli ava va li inava diinina omalukalwa avo nova fiya po eenhele davo,+ okwe va pandeka fiyo alushe nomalyenge momilaulu va teelele etokolo mefiku linene.+
7 Sha faafana, Sodom naGomorra noilando oyo ya li ye i dingilila oya li ya duka moluhaelo,* ya hongaulwa noye liyandja kouhalu wombelela,+ noya li ya handukilwa nomundilo waalushe,* nokungaho oi li oshihopaenenwa tashi tu londwele.+
8 Kakele kaasho, ovalumenhu ovo ve livakela mokati keni ohava diladila oinima ii, tava shundula omalutu, va dina eenghonopangelo nohava popile mowii ovatumbalekwa.+
9 Eshi Mikael,+ omweengeli omukulunhu,+ va twa eemhata nOndiaboli shi na sha noshimhu shaMoses,+ Mikael ka li a hala oku i tokola noku i ula omalaka mai,+ ndele okwa ti: “Jehova* ne ku handukile.”+
10 Ashike ovalumenhu ovo ohava popile mowii oinima aishe oyo vehe shii.+ Ndele oinima oyo ve shii nohava ningi, ohave i ningi nopehe na okudiladila ngaashi oinamwenyo ihe na eendunge,+ notai va nyono po.
11 Oshinyikifa oluhodi neenghono, eshi va shikula oshihopaenenwa shaKain.+ Ova li va nyona, opo va pewe ondjabi ngaashi Bileam+ nova ngongota ngaashi Kora,+ naasho oshe va twala mehanauno.+
12 Vo omamanya a hondama koshi yomeva poivilo yeni yokuhafela pamwe,+ ovafita ovo have lipalula vo vene nopehe na oumbada;+ oilemo ihe na omeva tai twalwatwalwa komhepo;+ omiti dihe na oiimati pokulombo, da fya luvali* noda dudwa mo;
13 omakufikufi efuta taa tutumike onhutu yohoni yavo;+ vo eenyofi di li mehalakano, odo da tuvikililwa omilaulu fokofoko fiyo alushe.+
14 Heeno, Henok, oo a li omutiheyali okudja kuAdam,+ naye okwa xunganeka shi na sha navo ta ti: “Tala! Jehova* okwe uya neengudu dihapu* dovayapuki vaye,+
15 okutokola nokuhandukila ovahenakalunga aveshe+ omolwoilonga yavo aishe youhenakalunga oyo va longa nomolwoku mu popila mowii neendjovo dikukutu.”+
16 Ovalumenhu ovo ohava ngongota+ noinava wanenwa kwaasho ve na. Ohava hongaulwa nokuliyandja komahalo avo mai,+ have litade nohava mbweenga ovanhu* omolwouwa wavo vene.+
17 Ndele nye, ovamwatate ovaholike, dimbulukeni eendjovo odo da li da popiwa* kovayapostoli vOmwene wetu, Jesus Kristus,
18 eshi va tile: “Momafiku axuuninwa otapa ka kala ovasheki tava hongaulwa nokuliyandja komahalo avo oulunde.”+
19 Ovanhu va tya ngaho ovo tava eta etukauko meongalo,+ have lihumbata va fa oinamwenyo* nokave na oupamhepo.*
20 Ndele nye ovamwatate ovaholike, pamekeni eitavelo leni liyapuki nokwiilikana metwokumwe nomhepo iyapuki,+
21 opo mu twikile okulikaleka mohole yaKalunga,+ ofimbo mwa teelela efilonghenda lOmwene wetu, Jesus Kristus, mu na eteelelo lomwenyo waalushe.+
22 Natango twikileni okufila onghenda+ ovo ve na omalimbililo;+
23 va xupifeni+ moku va vakula momundilo. Ashike twikileni okufilafana onghenda, tamu shi ningi netilo, ofimbo mu tonde oshikutu shavo sha nyatekwa kombelela.+
24 Ndele ou ta dulu oku mu amena muha punduke noku mu kaleka muhe na oshipo+ komesho yoshinge shaye* mu na ehafo linene,
25 kuKalunga aeke Omuxupifi wetu okupitila muJesus Kristus, Omwene wetu, okwa wana okupewa oshinge, ounene, eenghono neenghonopangelo okudja nale, paife nofiyo alushe. Amen.
Omashangelo opedu
^ Ile “nopehe na okufya ohoni.” MOshigreka, aselgeia. Tala Omafatululo oitya.
^ Luhapu Ombiibeli ohai longifa omundilo okuulika kehanauno laalushe. Tala Omafatululo oitya “Gehenna.”
^ Tala Omafatululo oitya.
^ Ile “da fya filufilu.”
^ Ile “nomayovi omilongo.”
^ Ile “nohava tumbaleke vamwe.”
^ Ile “oinima oyo ya xunganekwa.”
^ Ile “hava diladila pambelela.”
^ Eln., “omhepo.”
^ Ile “moipafi yoshinge shaye.”
