Onhumwafo kuJakob 3:1-18
3 Ovamwatate, vahapu vomunye kave na okuninga ovahongi, molwaashi omu shi shii kutya ohatu ka tokolwa netokolo la kwata moiti.*+
2 Osheshi atusheni ohatu ningi omapuko* luhapu.+ Ngeenge ope na ou iha ningi epuko mokupopya, okwa wanenena nota dulu yo okupangela olutu laye alishe.
3 Onghambe ngeenge otwe i tula oshitomo mokanya i dulike kufye, ohatu dulu yo okupangela olutu layo alishe.
4 Taleni keeskepa: Nonande oda kula, nohadi telaanifwa komhepo idjuu, ohadi wilikwa komushingi nokayukifo kanini, nohe di yukifa keshe oko a hala di ye.
5 Elaka nalo oli li oshilyo shinini sholutu, ndele ohali litangele oinima inene. Sha faafana, omundilo ou li oshinima shinini, ndele ohau dulu okuxwika ofuka inene.
6 Elaka olo yo omundilo.+ Elaka otali faneke ounyuni uhe na ouyuki mokati koitukulwa yolutu letu, osheshi ohali nyateke olutu alishe+ nohali dulu okuhanauna po momundilo onghalamwenyo* yomunhu aishe, nalo otali tulwa momundilo womuGehenna.*
7 Oinamwenyo aishe yomoixwa, oudila, oilipwedi* noinamwenyo yomefuta ohai deulwa noya kala hai deulwa kovanhu.
8 Ndele kape na omunhu ta dulu okudeula elaka. Itali dulu okupangelwa, ohali longo owii noli yadi oudiyo.+
9 Olo hatu longifa okutanga Tate yetu Jehova,* ndele natango olo yo hatu longifa okutuka ovanhu vakwetu ovo va shitwa “oshifeka shaKalunga.”+
10 Mokanya omo hamu di enangeko noupuna omo yo hamu di omatukano.
Ovamwatate, hasho shi na okukala ngaho.+
11 Mbela mofifiya otamu dulu ngoo okudja omeva mawa* nomeva malula oshita?
12 Ovamwatate, mbela komukwiyu otaku dulu ngoo okwiima eemono, ile komundjebele otaku dulu ngoo okwiima eenghwiyu?+ Sha faafana, ofifiya yomeva malula nayo itai dulu okudja omeva mawa.
13 Mbela mokati keni omu na omunaendunge? Ngeenge osho, ne shi ulike okupitila melihumbato laye liwa, mokulonga oilonga nelininipiko* olo hali di mounongo.
14 Ndele ngeenge omu na eenhamanana*+ nondubo+ momitima deni, inamu litangela+ ounongo weni, molwaashi kungaho omu li ovanaipupulu.
15 Ounongo wa tya ngaho inau dja pombada, ndele owomounyuni ou,+ wopambelela noweendemoni.
16 Osheshi keshe apa pe na ondubo neenhamanana,* ope na yo edundakano nowii aushe.+
17 Ashike ounongo wopombada tete owa koshoka,+ opo nee ou na ombili,+ ondjele,+ onghenda, hau dulika, u yadi onghenda noiimati iwa,+ uhe na okatongo+ nokau na oihelele.+
18 Kakele kaasho, ovo hava lalakanene ekwatafano liwa navamwe+ ohashi va kwafele va xumife komesho ombili+ nova longe ouyuki.
