Deuteronomion 21:1-23
21 “Ngeenge umwe okwa hangwa a fila moixwa medu olo Jehova, Kalunga keni, te mu pe mu kale mo, ndele kaku shiivike kutya olyelye e mu dipaa,
2 ovakulunhu novatokoli veni+ otava ka ya nokumeta oshinano okudja poshimhu fiyo omoilando oyo i li popepi nasho.
3 Opo nee ovakulunhu voshilando osho shi li popepi elela noshimhu otava ka kufa ongobe yondema oyo inai longa sha nande onale, inai nana ondjoko nandenande.
4 Ovakulunhu voshilando osho otava ka shinga ondema oyo fiyo omefilu tali kunguluka omeva, omo inamu pululwa noinamu kunwa eembuto nande onale, notava ka teyela ofingo yondema oyo mefilu olo.+
5 “Ovalevi, ovo ve li ovapristeri, opo tava ka kala, molwaashi Jehova, Kalunga keni, okwe va hoolola ve mu yakule,+ va shiivife omanangeko noupuna medina laJehova.+ Otava ka shiivifa nghee eenhamanana keshe da kwatela mo elongifo leenghono di na okukandulwa po.+
6 Opo nee ovakulunhu aveshe voshilando osho shi li popepi elela noshimhu otava ka koshela omake avo+ kombada yondema, oyo ofingo yayo ya teyelwa mefilu,
7 notava ka popya kutya: ‘Omake etu inaa tilashi ohonde ei, nomesho etu inae i mona eshi tai tilwashi.
8 Alikana! Jehova, ino handukila oshiwana shoye shaIsrael osho wa kulila,+ noino efa oo a tilashi ohonde ihe na etimba a kale mokati koshiwana shoye shaIsrael.’+ Kungaho, itava ka kala ve na etimba lohonde.
9 Monghedi ya tya ngaho, otamu ke likosha etimba lohonde ihe na ondjo mokati keni mokuninga osho sha yuka momesho aJehova.
10 “Ngeenge owa i u ka lwife ovatondi voye, na Jehova, Kalunga koye, te va findi ponhele yoye, ndele to va kwata ko ve li eenghwate,+
11 nongeenge mokati keenghwate owa mono mo omukainhu muwa, we mu hokwa, nowa hala oku mu kufa a ninge omukulukadi woye,
12 oto dulu oku mu twala meumbo loye. Oku na okulikulula momutwe nokuteta oipanyala yaye.
13 Oku na yo okukufa mo oikutu oyo a kwatwa nayo, ndele ta kala ha di meumbo loye. Ota ka lila xe naina oule womwedi,+ nokudja opo oto dulu okunangala naye. Oto ka ninga omushamane waye, naye ota ka ninga omukulukadi woye.
14 Ashike ngeenge ino mu hokwa, ou na oku mu efa a ye+ keshe opo a hala. Ndele ino mu landifa po koimaliwa, ile u ungaunge naye nonyanya, osheshi owe mu ninga nai nale.
15 “Ngeenge omushamane oku na ovakulukadi vavali, ndele oku hole umwe shi dulife mukwao,* novakulukadi ovo ove mu dalela ovanamati, ashike omonamati woshiveli okwa dalwa komukulukadi oo ehe holike,+
16 efiku ta yandje efyuululo kovanamati vaye, ke na okutala ko omonamati womukulukadi oo e hole e li oshiveli ponhele yomonamati woshiveli oo a dalwa komukulukadi oo ehe hole.
17 Omonamati, oo a dalwa komukulukadi oo ehe holike, oku na oku mu tala ko e li oshiveli moku mu pa lwomapa avali oshitukulwa shakeshe shimwe osho e na, molwaashi oye ehovelo leenghono daye dokudala. Oye e na oufemba wokukala oshiveli.+
18 “Ngeenge omushamane oku na omonamati oo omutangalali nomunashibofa, noiha dulika kuxe, ile kuina,+ nova kendabala oku mu pukulula, ashike ina pwilikina kuvo,+
19 xe naina ove na oku mu kufa noku mu twala kovakulunhu koshivelo shoshilando omo ha di,
20 ndele tava lombwele ovakulunhu voshilando omo ha di, tava ti: ‘Omonamati wetu ou omutangalali nomunashibofa noiha dulika kufye. Okwa fuka,*+ ye ongholwe.’+
21 Ovalumenhu aveshe vomoshilando omo ha di ove na oku mu dipaa nomamanya. Omu na okukufa mo osho shii mokati keni, nOvaisrael aveshe otave ke shi uda, ndele tava kwatwa koumbada.+
22 “Ngeenge omunhu okwa nyona enyono loku mu dipaifa, ndele ta dipawa,+ nomwe mu endjelelifa komuti,+
23 oshimhu shaye kashi na okukala komuti oo oufiku aushe.+ Ponhele yaasho, omu na okushilipaleka kutya omwe mu paka mefiku olo, molwaashi omunhu oo a endjelelifwa oku li omufingwa pataleko laKalunga,+ nokamu na okunyateka edu leni olo Jehova, Kalunga keni, te mu pe li li efyuululo.+
