Omafimbo otete 21:1-30
21 Opo nee Satana* okwa tokola okuponokela Israel, nokwa nwefa mo David a valule Ovaisrael.+
2 Onghee David okwa lombwela Joab+ nomalenga oshiwana a ti: “Indeni, mu ka valule Israel, okudja kuBer-seba fiyo okuDan,+ ndele tamu uya mu lombwele nge, opo ndi shiive omuvalu wavo.”
3 Ashike Joab okwa tya: “Jehova na hapupalife ovanhu vaye lwe-100. Omwene wange ohamba, mbela aveshe kave fi nale ovapiya vomwene wange? Omolwashike omwene wange a hala okuninga ngaho? Omolwashike u na okweetela Israel etimba?”
4 Ashike ohamba oya anya okupwilikina kuJoab. Onghee Joab okwa ya, ndele ta endaenda muIsrael ashishe, nolwanima, okwe uya kuJerusalem.+
5 Joab okwa yandja kuDavid omuvalu wovanhu ovo va shangwa. Ovalumenhu aveshe Ovaisrael, va homata omaongamukonda, ova li 1 100 000, novalumenhu Ovajuda va homata omaongamukonda, ova li 470 000.+
6 Ashike Ovalevi nOvabenjamin inava shangwa,+ molwaashi Joab ka li a panda eendjovo dohamba.+
7 Osho kasha li sha hafifa nandenande Kalunga kashili, onghee okwa handukila Israel.
8 Opo nee David okwa tya kuKalunga kashili: “Onda nyona+ unene, eshi nda ninga oshinima eshi. Alikana, dimina po omupiya woye omolwenyono olo,+ osheshi onda katuka filufilu shihe li pandunge.”+
9 Opo nee Jehova okwa popya naGad,+ omumonikokule waDavid, a ti:
10 “Inda u ka lombwele David to ti, ‘Jehova okwa ti: “Ohandi ku pe u hoolole poinima itatu. Hoolola po osho ndi na oku ku ningila.”’”
11 Opo nee Gad okwe uya kuDavid, ndele ta ti kuye: “Eshi osho Jehova ta ti, ‘Hoolola
12 ngeenge otapa ka kala ondjala oule weedula nhatu,+ ile oto ka findwa oule weemwedi nhatu kovatondi voye notave ke ku dipaa neongamukonda,+ ile omafiku atatu eongamukonda laJehova, sha hala okutya, oudu wolutapo moshilongo,+ nomweengeli waJehova ota ka eta ehanauno+ moitukulwa aishe yaIsrael.’ Diladila paife kutya ondi na oku ka nyamukula ngahelipi oo a tuma nge.”
13 Onghee David okwa tya kuGad: “Osho oshidjuu neenghono kwaame. Alikana, nandi handukilwe kuJehova, molwaashi oku na onghenda inene;+ ashike inandi handukilwa nande kovanhu.”+
14 Opo nee Jehova okwa tumina Israel oudu wolutapo,+ novanhu 70 000 vomuIsrael ova fya.+
15 Natango, Kalunga kashili okwa tuma omweengeli kuJerusalem e ke shi hanaune po, ashike eshi a li poku shi hanauna po, Jehova okwe shi mona nokwe lialuluka* omolwehandukilo olo,+ ndele ta ti komweengeli, oo a li poku shi hanauna po: “Osha wana!+ Shunifa eke loye pedu.” Omweengeli waJehova okwa li a fikama popepi noshipale shaOrnan,+ Omujebusi.+
16 Eshi David a yelula omesho, okwa mona omweengeli waJehova a fikama pokati kedu neulu, e kwete eonga+ meke laye e li taalelifa kuJerusalem. David novakulunhu, va djala eeshako,+ ova wila pedu oipala yavo ya twa pedu.+
17 David okwa tya kuKalunga kashili: “Hamba haame nda ti ovanhu nava valulwe? Aame nda nyona; aame nda ninga osho sha puka,+ ndele eedi edi oda ninga shike? Jehova, Kalunga kange, alikana, aame u handukila pamwe neumbo latate, ashike ino handukila oshiwana shoye.”+
18 Opo nee omweengeli waJehova okwa lombwela Gad+ a lombwele David a ye, noku tungile Jehova oaltari poshipale shaOrnan, Omujebusi.+
19 Onghee David okwa ya palombwelo laGad, olo a popya medina laJehova.
20 Lwanima, Ornan okwa piluka nokwa mona omweengeli, novanamati vaye vane, ovo va li pamwe naye, ova hondama. Ornan okwa li ta xu oilya yo-wheat.
21 Eshi David e uya kuye, Ornan okwa tala nokwa mona David, nokwa dja mo diva moshipale, ndele te linyongamene David oshipala shaye sha twa pedu.
22 David okwa tya kuOrnan: “Landife nge* po oshipale, opo ndi dule okutungila po Jehova oaltari. Shi landife nge po kondado ye lixwa po, opo ehandukilo, olo a tumina ovanhu, li lote.”+
23 Ashike Ornan okwa tya kuDavid: “Shi kufa po shi ninge shoye, nomwene wange ohamba na ninge osho she mu wapalela.* Ohandi yandje eengobe domaxwikiloyambo, oshilei,*+ shi ninge oikuni, nosho yo oilya yo-wheat, i li eendjayambo. Aishe ohandi i yandje.”
24 Ashike ohamba David oya tya kuOrnan: “Ahawe, ondi na oku shi landa kondado ye lixwa po, molwaashi itandi ka kufa po oshinima shoye noku shi yandja kuJehova, ile ndi yambe omaxwikiloyambo inandi a futila.”+
25 Onghee David okwa pa Ornan eesekeli* doshingoli 600, ondado i fike ponhele oyo.
26 David okwa tungila ko Jehova oaltari+ noku mu yambela omaxwikiloyambo nosho yo omayambo oukumwe, nokwa ilikana kuJehova, oo e mu nyamukula okupitila momundilo+ wa dja meulu, oo wa xwika po omayambo koaltari.
27 Opo nee Jehova okwa lombwela omweengeli+ a shunife mo eongamukonda moshilaleko shalo.
28 Pefimbo opo, eshi David a mona kutya Jehova okwe mu nyamukula poshipale shaOrnan, Omujebusi, okwa twikila okuyambela po omayambo.
29 Ndele etwalihangano laJehova, olo Moses a ninga mombuwa, noaltari yomaxwikiloyambo, pefimbo opo oya li konhele yokoshikulundudu, muGibeon.+
30 Ashike David ka li a dula okuya ko a ka popye naKalunga, molwaashi okwa li a tila eongamukonda lomweengeli waJehova.
