Eehamba dotete 7:1-51
7 Salomo okwa tunga eumbo* laye+ oule weedula 13, fiyo osheshi la pwa filufilu okutungwa.+
2 Okwa tunga yo eumbo, olo hali ifanwa Omufitu waLibanon,+ li na oule womukokomoko womaludimbo* 100, ounene womaludimbo 50, noule wopombada womaludimbo 30, e li tungila keengudi domisederi di li momikweyo nhee, nokeengudi odo okwa li oipilangi yomiti domisederi.+
3 Oipilangi oyo yomisederi oya li ya kambakana kombada yeenhikifo, odo da li keengudimanya; aishe kumwe oya li 45, momukweyo keshe 15.
4 Ekuma ola li li na omikweyo nhatu domakende; ekende keshe ola taalelafana nekende lokombinga ikwao momikweyo adishe nhatu.
5 Oivelo aishe nosho yo eelama domivelo oya li i na oule nounene u fike pamwe, ngaashi a ninga shi na sha nomakende, oo a taalelafana namakwao momikweyo nhatu.
6 Okwa tunga Olupale* lEengudimanya, li na oule womukokomoko womaludimbo 50 nounene womaludimbo 30, nopa li okanduda kokufikila ke li komesho yalo, ke li keengudimanya.
7 Okwa tunga yo Olupale* lOlukalwapangelo,+ kokutya Olupale lEtokolo,+ omo ha tokolele, ndele tava dengele mo oipilangi yomisederi okudja pedu fiyo opombada.
8 Eumbo,* oko a li ta ka kala, olo la li momukala mukwao,+ ola li kokule kanini nOlupale lEtokolo, nola li la tungwa monghedi ya faafana. Salomo okwa tunga yo eumbo la faafana nOlupale olo, e li tungila omonakadona waFarao, oo a konga a ninge omukulukadi waye.+
9 Eenhele adishe odo oda li da tungwa nomamanya ondilo+ a hongwa she likolelela koule nounene, oo wa pumbiwa. Okwa hongwa meni nosho yo kombada noshisaaxa shomamanya, okudja kekanghameno fiyo okombada nosho yo pondje, fiyo okomukala wa kula.+
10 Ekanghameno ola li la tungwa nomamanya makula ondilo; omamanya amwe okwa li e na omaludimbo omulongo, naamwe okwa li e na omaludimbo ahetatu.
11 Kombada yao okwa li yo omamanya ondilo, a hongwa she likolelela koule nounene oo wa pumbiwa nosho yo oipilangi yomisederi.
12 Omukala oo wa kula owa li wa dingililwa kekuma la tungwa nomamanya a hongwa e li momikweyo nhatu, nokombada yekuma okwa li ku na oipilangi yomisederi, ngaashi yomukala womeni+ leumbo laJehova nosho yo okalupale kokufikila keumbo.+
13 Ohamba Salomo oya ifana Hiram,+ ndele ta ka talwa ko koshilando shaTirus.
14 Hiram okwa li omonamati womufiyekadi, a dja mepata laNaftali, naxe okwa li Omutirus, omuhambwidi wongopolo,+ nokwa li e na ounongo muhapu, eshiivo+ nowino wokulonga oilonga aishe oyo ya kwatela mo ongopolo.* Onghee okwe uya kohamba Salomo, ndele ta longo oilonga aishe oyo Salomo e mu pa.
15 Okwa longa eengudi mbali mongopolo;+ ongudi keshe oya li i na oule wopombada womaludimbo 18, nounene wongudi keshe yomeengudi odo mbali+ otau shakenwa kongodi youle womaludimbo 12.*
16 Okwa ninga omitwe mbali dongopolo, ndele te di tula koxulo yeengudi odo. Omutwe umwe owa li u na oule wopombada womaludimbo atano, nomutwe mukwao owa li u na oule wopombada womaludimbo atano.
17 Omutwe wokoxulo yongudi keshe owa tulwa ounete, ovo va li ve na oulyenge vanini, va indakanifwa va fa ongodi;+ komutwe umwe oku na vaheyali, nokomutwe mukwao okwa tulwa vaheyali.
18 Okwa tula ko oiimati yomuti wogranati momikweyo mbali ya dingilila ounete, opo a uvike oikwatifo oyo ya li koxulo yeengudi. Oikwatelo aishe okwe i ninga sha faafana.
19 Omitwe deengudimanya dopokalupale kokufikila oda li da fa eengala domado di na oule wopombada womaludimbo ane.
20 Omitwe deengudi odo mbali oda li kombada yoshitukulwa, osho shi li ongonga, sha kwatafana nokanete, nomutwe keshe+ owa li wa dingililwa koiimati yomuti wogranati i li 200.
21 Okwa dika eengudi dokanduda kokufikila kotembeli.*+ Okwa dika ongudi i li kolulyo* nokwe i luka Jakin.* Opo nee okwa dika vali ongudi imwe kolumosho,* ndele te i luku Boas.*+
22 Eexulo deengudi odo oda li da fa eengala. Onghee eengudi oda li da pwa okulongwa.
23 Opo nee okwa hambula Efuta moshivela.+ Ola li li li ongonga, okudja komungenge umwe fiyo okomungenge mukwao omaludimbo 10, oule wopombada omaludimbo 5, nounene walo otau dulu okushakenwa kongodi yokuyelekifa yomaludimbo 30.*+
24 Nomomunghulo walo ola li la fanekwa oitila+ ye li dingilila alishe. Moludimbo limwe omu na oitila omulongo, oyo ya dingilila Efuta. Oitila oyo oya li momikweyo mbali i li oshitukulwa shalo.
25 Ola li la tenhekwa keengobe 12;+ 3 oda taalela kolundume, 3 oda taalela kouninginino, 3 oda taalela kolukadi na 3 oda taalela koushilo; adishe oda li da pilamena pokati kEfuta.
26 Nounene* walo owa li u fike pomutamo weke;* omungenge walo owa li wa fa omungenge wekopi, wa li u li ngaashi ongala yedo ya sheneka. Ola li hali humbata omeva e fike peebata* 2 000.
27 Okwa ninga outemba*+ omulongo vongopolo. Okatemba keshe oka li ke na oule womukokomoko womaludimbo ane, ounene womaludimbo ane noule wopombada womaludimbo atatu.
28 Outemba ova li va longwa ngaha: Ova li ve na oubloka momunghulo, noubloka ovo ova li pokati keelama.
29 Koubloka, ovo ve li pokati keelama, okwa li kwa fanekwa eenghoshi,+ eengobe novakerubi,+ nokeelama odo okwa li kwa fanekwa oinima ya faafana. Pombada nopedu leenghoshi noleengobe opa li pa fanekwa oulenga.
30 Okatemba keshe oka li ke na omalola ane ongopolo noitenda yongopolo, oyo ya kwatakanifa omalola nosho yo oitenda ine meehuke i kwete lwokomalola. Koshi yombaali okwa li ku na eengudi di li kombinga keshe doku i yambidida, da fanekwa oulenga kominghulo.
31 Omulungu wombaali owa li meni loshikoroni, nowa li u na oule woludimbo limwe okuyuka pombada, nowa li ongonga. Oshikoroni osho noitenda yoku shi yambidida oya li i na oule wopombada woludimbo netata. Komulungu wayo okwa li ku na omafano, noubloka vasho ova li ve na oule nounene u fike pamwe, ndele kava li ongonga.
32 Pedu loubloka opa li omalola ane, noitenda yokuyambidida omalola oya li ya kwatafana nokatemba. Elola keshe ola li li na oule woludimbo netata.
33 Omalola oo okwa li a longwa a fa omalola etemba loita. Oinima yokupatela ko omalola, eelama domalola, oitenda yokukwata eelama nosho yo omafina* omalola okwa li ya longwa moitenda elela.
34 Meehuke dokatemba keshe omwa li oitenda ine yokuyambidida okatemba. Oitenda oyo yoku ka yambidida oya li ya hambulilwa kumwe nokatemba.*
35 Pombada yokatemba opa li pe na oshikoroni shi li ongonga, shi na oule wopombada wetata loludimbo. Eelama doshikoroni osho noubloka vasho oya li ya hambulwa i li oshitukulwa shako.
36 Kombada yeelama dasho nomoubloka vasho, okwa faneka mo ovakerubi, eenghoshi nomilunga, she likolelela konhele yokabloka keshe, nosho yo oulenga pombada nopedu lavo.+
37 Outemba+ omulongo osho e va longa ngaho. Ova li va longwa va faafana.+ Ova li ve fike pamwe nove na omutungilo wa faafana.
38 Okwa li a ninga eembaali omulongo mongopolo;+ keshe imwe oya li hai kala omeva e fike peebata 40. Ombaali keshe oya li i na omaludimbo ane.* Kokatemba keshe komoutemba omulongo okwa li ku na ombaali imwe.
39 Opo nee okwa tula outemba vatano kolulyo leumbo, navakwao vatano okolumosho leumbo, nokwa tula Efuta kolulyo leumbo, lwokoushilolukadi.+
40 Hiram+ okwa ninga yo eembaali, oixupulo+ nouyaxa.+
Opo nee Hiram okwa manifa oilonga aishe oyo a li ta longele ohamba Salomo meumbo laJehova:+
41 eengudi mbali+ nomitwe da fa ouyaxa, odo da li koxulo yeengudi odo mbali, ounete vavali+ vokuuvika omitwe mbali da fa ouyaxa, odo da li koxulo yeengudi;
42 oiimati yomuti wogranati+ 400, oyo ya li kounete vavali, omikweyo mbali doiimati yomuti wogranati kokanete keshe, yokuuvika omitwe mbali da fa ouyaxa, odo da li koxulo yeengudi mbali;
43 outemba+ omulongo nosho yo eembaali omulongo,+ odo da li koutemba;
44 Efuta+ nosho yo eengobe deemhedi 12, odo da tenhekwa Efuta;
45 oikwatelwa, oixupulo, oiyaxa noilongifo aishe oyo Hiram a hambulila ohamba Salomo mongopolo omolweumbo laJehova.
46 Ohamba oya longela oinima oyo moshitukulwa shaJordan, pokati kaSukkot naSaretan, ya longifa edu lelova.
47 Salomo ina yeleka ondjudo yoinima aishe oyo koshiyelekifo, molwaashi oya li ihapu neenghono. Ondjudo yongopolo, oyo ya longifwa, kaya li i shiivike.+
48 Salomo okwa ninga oilongifo aishe yomeumbo laJehova tai landula: oaltari+ yoshingoli, oshitaafula shoshingoli,+ oko haku tulwa omingome dokutalika;
49 oikwatelwalamba+ yoshingoli elela, itano okolulyo naitano okolumosho, oya li komesho yedimo lomeni elela; eengala,+ eelamba noidimifo,* naaishe oyo oya li ya longwa moshingoli;+
50 eembaali, oidimifo yomundilo,+ ouyaxa, oukopi+ noikwatelwa yomundilo+ yoshingoli elela; oikwatelwamhadi yomivelo domeumbo lomeni,+ sha hala kutya mOuyapuki elela, nosho yo yomivelo deumbo lotembeli,+ ya longwa moshingoli.
51 Onghee ohamba Salomo oya li ya manifa oilonga aishe, oyo ya li i na okulonga omolweumbo laJehova. Opo nee Salomo okwa twala mo oinima, oyo xe, David, a yapula,+ ndele ta twala oshisilveri, oshingoli noinima ikwao meemhungulilo deumbo laJehova.+
Omashangelo opedu
^ Ile “ombala.”
^ Oludimbo limwe oli fike peesendimeta 44,5. Tala Oshiw. B14.
^ Ile “Okatala.”
^ Ile “Okatala.”
^ Ile “Ombala.”
^ Ile “oshikushu,” apa nosho yo peemhito dimwe apa sha holoka metukulwa eli.
^ Ile “ongudi keshe yomeengudi odo mbali oi na omaludimbo 12 mounene.”
^ Tali ti “Jehova na pameke onhele ei.”
^ Tashi dulika tali ti “Meenghono.”
^ Ile “kolundume.”
^ Ile “kolukadi.”
^ Apa otashi ulike kOuyapuki.
^ Ile “nokwa li i na ounene womaludimbo 30.”
^ Ile “Oudeki.”
^ Obata imwe oi fike peelita 22. Tala Oshiw. B14.
^ Eesendimeta 7,4 lwaapo. Tala Oshiw. B14.
^ Ile “outemba vomeva.”
^ Ile “eeakisa.”
^ Ile “oya li i li oshitukulwa shimwe.”
^ Ile “omaludimbo ane mounene.”
^ Ile “noikwatifo.”
