Omapulo a dja kovaleshi

• Mbela oshi li elimbwangomumwe lomaitavelo okulanda etungo kelongelokalunga limwe li lili noku li lundulula li ninge Olupale lOuhamba?

Luhapu, Eendombwedi daJehova ohadi henuka okuninga engeshefo la tya ngaho nomalongelokalunga amwe. Ndele nande ongaho, engeshefo la tya ngaho otashi dulika li ha kale li li elimbwangomumwe lomaitavelo. Otashi dulika li talike ko li li ashike engeshefo lefimbo ashike limwe. Eongalo lomoshitukulwa lEendombwedi daJehova itali longele kumwe nelongelokalunga likwao opo va tunge onhele yokulongela Kalunga oyo tai ka longifwa kuvo aveshe.

Oilonga ilipi tai talika ko kuJehova i li elimbwangomumwe lomaitavelo? Diladila kelombwelo lomuyapostoli Paulus olo tali ti: “Inamu humbata ondjoko imwe pamwe naava ve he neitavelo; osheshi ouyuki ou noukumwe washike nouhenouyuki? Ile ouyelele ou nekwatafano lashike nomulaulu? Ndele Kristus naBelial tava udafana ngahelipi? Ile omwiitaveli e noshitukulwa shashike naau e he fi omwiitaveli? Otembeli yaKalunga oi nekwatafano lashike noikalunga? . . . Onghee: Djeni mo mokati kavo nye mu liyoolole mo muvo, Omwene osho ota ti, nye inamu kuma eshi sha nyata; opo Ame ohandi mu tambula.” (2 Ovakorinto 6:14-17) Paulus okwa li a hala okutya shike eshi a longifa oitya ‘oukumwe’ nosho yo ‘ekwatafano’?

Oukumwe oo Paulus a popya osha yela kutya owa kwatela mo elongelokumwe novalongeli voikalunga nosho yo novaheneitavelo shi na sha noinima yopalongelokalunga noyopamhepo. Okwa londwela Ovakorinto va henuke “okulya koshililo . . . sheendemoni.” (1 Ovakorinto 10:20, 21) Onghee hano, elimbwangomumwe lomaitavelo olo okukufa ombinga melongelokalunga lomahangano amwe opamalongelokalunga ile okukala noukaume wopamhepo nao. (Exodus 20:5; 23:13; 34:12) Ngeenge etungo olo kwa li hali longifwa nale kehangano lopalongelokalunga lonhumba ola landwa po, eshi osha ningwa ashike opo ku monike etungo olo la pumbiwa opo li ningwe Olupale lOuhamba. Omanga inali longifwa li li Olupale lOuhamba, oli na okuwapalekwa oinima aishe yelongelokalunga loipupulu. Hano ngeenge la lundululwa ngaho, ohali yapulilwa Jehova omolwelalakano loku mu longelela mo oye aeke. Kungaha kape na nande ekwatafano ile oukumwe pokati kelongelokalunga lashili noloipupulu.

Mokukundafana oinima i na sha nokulanda kwa tya ngaho, eenghundafana nomalongelokalunga amwe odi na okukalekwa pauxupi nodi na sha ashike nokulanda. Oilyo yeongalo lopaKriste otai ningi nawa ngeenge tai kaleke momadiladilo elondwelo laPaulus li na sha “[nokuhahumbata] ondjoko imwe pamwe naava ve he neitavelo.” Ndele nande katu udite tu dule vamwe ovo vomaitavelo amwe, ohatu henuka eendafano navo nosho yo okuya melongelokalunga lavo. *

Ongahelipi ngeenge eongalo tali ehela li longife etungo lelongelokalunga lonhumba oule wokafimbo? Okweehela luhapu ohaku eta eenghundafana dihapu, oshinima osho shi na okuhenukwa. Nokuli nonande etungo la tya ngaho otali ehelwa li longifwe omolwoshiningwanima shimwe ashike, olutu lovakulunhuongalo oli na okutala koinima ei tai landula: Etungo olo oli na mbela oihongwafano nosho yo omadidiliko opamalongelokalunga meni nosho yo kombada? Ongahelipi ovanhu momudingonoko tava ka tala ko okulongifa kwetu etungo la tya ngaho? Mbela vamwe meongalo otava ka punduka omolwokulongifa kwetu etungo la tya ngaho? (Mateus 18:6, NW; 1 Ovakorinto 8:7-13) Ovakulunhuongalo ove na okukonakona oinima oyo nopo nee tava tokola metwokumwe naasho va konakona. Eliudo lavo nosho yo leongalo alishe oli na okukala li niwe ko nasha nalo ngeenge taku tokolwa okulanda nokulundulula etungo la tya ngaho li ninge Olupale lOuhamba.

[Omashangelo opedu]

[Efano pepandja 30]

Etungo eli ola li oshinagoga nola landwa po ndele tali ningululwa li ninge Olupale lOuhamba