Onhumwafo onhivali kOvakorinto 6:1-18
6 Tu li ovalongi pamwe naKalunga,+ ohatu mu kumaida yo mu tambule ko efilonghenda laKalunga nomu kale mu shii elalakano lalo.+
2 Osheshi Kalunga okwa ti: “Onde ku uda pefimbo la wapala, nonde ku kwafa mefiku lexupifo.”+ Tala! Paife eli olo efimbo la wapala. Tala! Paife eli olo efiku lexupifo.
3 Fye itatu pundukifa omunhu moshinima nande oshimwe, opo oilonga oyo hatu longele Kalunga iha shekwe.+
4 Ashike ohatu ulike moinima aishe kutya fye ovapiya vaKalunga,+ mokulididimikila omayeleko e lili noku lili, omaudjuu, omafimbo madjuu, omaupyakadi,+
5 okudengwa, okutulwa modolongo,+ omaponokelo ovakolokoshi, okulonga oilonga idjuu, ondjala+ nosho yo okuhakofa omaufiku amwe.
6 Otu na onghalamwenyo ya koshoka, eshiivo, onheni,+ olune,+ ohatu efa omhepo iyapuki i tu wilike notu na ohole ihe na oihelele.+
7 Ohatu popi oshili, otwe lineekela eenghono domhepo yaKalunga+ notwa humbata oilwifo youyuki+ meke lokolulyo* nolokolumosho.*
8 Ohatu fimanekwa nokudinwa, hatu tangwa nohatu shekwa. Nonande ohatu popi oshili, ovanhu ove tu tala ko tu li ovapukifi,
9 twa fa tuhe shiivike, ndele otu shiivike, twa talika ko twa fa tu li pokufya,* ndele tala! otu na omwenyo,+ twa fa twa handukilwa,* ndele nande ongaho, inatu dipawa.+
10 Nonande otwa hafa, otwa talika ko twa fa twa nyika oluhodi. Nonande ohatu punapalifa vahapu, otwa talika ko ngaashi eehepele. Nonande otu na oinima aishe, otwa talika ko twa fa tuhe na sha.+
11 Ovakorinto nye, otwe mu lombwela oshili* notwe mu mbwalangadjekela omitima detu.
12 Ohole yetu inai mu ngabekelwa,*+ ndele nye inamu tu ulikila ohole ya xwama.
13 Ohandi popi nanye ngaashi ovana vange, nanye ningeni ngaashi twa ninga, mbwalangadjekeni omitima deni.*+
14 Inamu humbata ondjoko pamwe* naava vehe na eitavelo.+ Ouyuki ou na ekwatafano lashike nouhenouyuki?+ Ile ouyelele ou na ekwatafano lashike nomulaulu?+
15 Mbela Kristus naBelial* ohava longele kumwe?+ Ile omwiitaveli* oku na ekwatafano lashike* naao ehe fi omwiitaveli?+
16 Oikalunga itai dulu okukala motembeli yaKalunga.+ Osheshi ofye otembeli yaKalunga omunamwenyo,+ ngaashi Kalunga a ti: “Ohandi ka kala mokati kavo+ nokweenda mokati kavo, nohandi ka kala Kalunga kavo, notava ka ninga ovanhu vange.”+
17 “‘Onghee hano djeni mo mokati kavo nokuliyoolola mo,’ Jehova* osho ta ti, ‘Inamu kuma osho sha nyata,’”+ “‘opo nee ohandi mu tambula ko.’”+
18 “‘Nohandi ka ninga xo yeni,+ ndele nye otamu ka ninga ovanamati novanakadona vange,’+ Jehova* Omunaenghono adishe osho ta ti.”
Omashangelo opedu
^ Tashi dulika omolweameno.
^ Tashi dulika omolwehandukilo.
^ Ile “wana okufya.”
^ Ile “pewa outekuduliko.”
^ Ile “otwa popya twa manguluka.”
^ Ile “kai na ofina.”
^ Ile “nanye yo mbwalangadjeni.”
^ Ile “limanga kumwe.”
^ Ile “omwiitaveli oku na oshitukulwa shashike.”
^ Ile “omudiinini.”
^ Oshitya shOshiheberi tashi ti, “omunhu wongaho.” Oshilukadina shaSatana.
