Uk-ukom ti awag idi kadagiti lallaki nga imbangon ni Jehova a mangispal iti ilina sakbay ti panawen dagiti natauan nga ar-ari ti Israel. (Uk 2:16) Ni Moises, kas manangibabaet iti Linteg ti tulag ken dinutokan ti Dios kas panguluen, inukomna ti Israel iti 40 a tawen. Ngem sigun iti kadawyan a panangmatmat, ti periodo ti Uk-ukom ket nangrugi ken Otniel, maysa a tiempo kalpasan ti ipapatay ni Josue sa nagtultuloy agingga ken Samuel a mammadto. Saan a gagangay a maibilbilang ni Samuel kas maysa kadagiti Uk-ukom. Isu a ti periodo ti Uk-ukom ket immabut iti agarup 300 a tawen.​—Uk 2:16; Ara 13:20.

  Dagiti ukom ket pinili ken dinutokan ni Jehova manipud nadumaduma a tribu ti Israel. Iti nagbaetan da Josue ken Samuel, 12 nga uk-ukom (saan a karaman ni Debora) ti nainaganan, kas iti sumaganad:

Ukom

Tribu

Otniel

Juda

Ehud

Benjamin

Samgar

(?)

Barak

Neftali (?)

Gideon

Manases

Tola

Isacar

Jair

Manases

Jefte

Manases

Ibzan

Zabulon (?)

Elon

Zabulon

Abdon

Efraim

Samson

Dan

 Saan nga amin ket maibaga no sadino ti eksakto a lugar a masaksakupan idi ti tunggal maysa kadagiti uk-ukom ken dagiti petsa ti panagbalinda nga ukom. Mabalin a naggigiddan a nagserbi nga ukom ti dadduma iti nadumaduma a benneg ti Israel, ken adda dagiti naiballaet a panawen ti pannakairurumen.​—Kitaenyo ti MAPA, Tomo 1, p. 743; ALDAW A PANANGUKOM; PANGUKOMAN, HUDISIAL A; kasta met ti uk-ukom ti Israel iti sidong dagiti indibidual a nagan.