[nagtaud iti sao a kaipapananna ti “sumgar,” mabalin a tumukoy kadagiti kakaykaywan a turod; wenno, mabalin a kaipapananna ti “Sumgar (Agpigerger) iti Panagaligagaw”].

  1. Maysa a “Horeo” a ti pito nga ‘annakna’ ket shik iti daga ti Seir sakbay a sinakup dayta ni Esau (Edom). (Ge 36:20, 21, 29, 30; 1Cr 1:38; idiligyo ti Ge 14:4-6.) Mabalin a nagnaed ni Seir iti kabambantayan a rehion iti abagatan ti Natay a Baybay, ken nalabit ti naganna ti nayawag iti daytoy a lugar. Saan a masigurado no ti pito nga “annak” ni Seir ket mismo a putotna wenno karaman ti naud-udi a kaputotanna.​—Kitaenyo ti ANAH; DISON.

  2. Ti kabambantayan a rehion iti nagbaetan ti Natay a Baybay ken ti Gulpo ti ʽAqaba. (Ge 36:8, 30; De 2:1, 8) Idi tiempo ni Abraham, dagiti Horeo ti nagnaed iti Seir. (Ge 14:6) Idi agangay, ti apoko ni Abraham a ni Esau naginteresanna ti daga ti Seir, idinto ta nagnaed idiay Padan-aram ti kasinginna a ni Jacob. (Ge 32:3) Ngem agparang a naan-anay nga immakar ni Esau idiay Seir kalpasan a nakasubli ni Jacob idiay Canaan. (Ge 36:6-9) Kamaudiananna, dagiti Edomita a kaputotan ni Esau pinaksiatda dagiti Horeo (De 2:4, 5, 12; Jos 24:4), ket ti daga naawaganen iti Edom. Nupay kasta, ti dadaan a nagan a Seir ket nagaplikar met kadagiti kaputotan ni Esau ken iti lugar a nagnaedanda. (Nu 24:18; idiligyo ti 2Ar 14:7; 2Cr 25:11.) Agparang a bayat ti panagturay ni Ari Ezekias, adda lallaki iti tribu ni Simeon a napan idiay Bantay Seir. Kalpasan a natalipuposda dagiti natda kadagiti  Amalekita, nangrugi a nagnaed sadiay dagiti Simeonita. (1Cr 4:41-43) Maipaay kadagiti detalye iti geograpia ken pakasaritaan ti Seir, kitaenyo ti EDOM, DAGITI EDOMITA.

  3. Maysa a bantay iti nagbaetan ti Baala (Kiriat-jearim) ken Kesalon iti makin-amianan a beddeng ti teritoria ti Juda. (Jos 15:10) Kadawyan a maikunkuna a ti Seir ket isu ti pantok ti bantay nga agarup 15 km (9.5 mi) iti laud ti Jerusalem, iti makin-abagatan a deppaar nga ayan ti purok ti Shoresh.