Maysa a lugar a nadakamat iti mensahe ni Senaquerib ken Ari Ezekias. Ipaspasindayag daytoy a mensahe a dagiti Asirio nga ar-ari dinadaelda ti nadumaduma a “nasion.” (2Ar 19:8-12; Isa 37:12) Saan nga ammo ti eksakto nga ayan ti Rezef, agsipud ta adda nadumaduma a lugar a kastoy ti naganda. Ti maysa a lugar a kasta ti naganna, nga impagarup ti dadduma a sigud a paset ti maysa a nagkauna a distrito, ket isu ti moderno a Rusaʼfeh, masarakan iti laud ti Eufrates agarup 145 km (90 mi) iti abagatan ti moderno a Haran.  Asideg ngarud dayta iti maikunkuna nga ayan ti Gozan, a nadakamat a kadua ti Rezef.