Kadagiti nasurok a sangagasut nga elemento nga ammo ti tao, nasurok a 75 porsiento kadagitoy ket metal. Ti balitok, pirak, gambang,  landok, ken buli ket espesipiko a nadakamat iti Kasuratan. Ti damo a panangtukoy ti Biblia kadagiti metal ket iti Genesis 2:11 ken 4:22.

 Ti kasasaad dagiti metal ket saan nga aganninaw, malunag iti pudot, ken mamolde; addaan kinaraniag ken gagangay a nagsayaat a mangyallatiw iti pudot ken pagdalanan ti koriente. Dagiti metal ket nagduduma ti kalidadda ken dagiti linaonda a kemikal. Maipaay iti espesipiko nga impormasion ken kadagiti panagparangna iti Kasuratan, kitaenyo dagiti nadakamat a metal iti sidong dagiti naganda; kasta met ti paulo a PASUDIEN, MANANGPASUDI.