Adu a puraw a linabag a nangbalkut iti bukel ti sumagmamano a kita ti mula ken naaramat a pangaramid iti lupot. Ti Hebreo a sao a kar·pasʹ, a mabalin a tumukoy iti napino a kapas wenno napino a lienso, ket umasping iti Sanskrit a sao a karpasa ken iti Griego a karʹpa·sos. Ti adu a moderno a bersion kaykayatda nga aramaten ti patarus a “kapas” iti Ester 1:6. Nadakamat sadiay kas maysa kadagiti material a nayarkos iti paraangan ti palasio bayat ti pito nga aldaw a bangkete ni Ari Asuero idiay Susan. Nabayagen a maimulmula ti kapas idiay Persia ken idiay India. Nupay ti lienso agparang a nasaksaknap ti pannakaaramatna idiay Egipto ken Palestina, adda met pammaneknek a maar-aramaten sadiay ti kapas nanipud umuna a milenio K.K.P. nga agpatpatuloy.

 Ti mula a kapas iti salaysay ti Biblia naipagarup nga isu ti klase a Gossypium herbaceum. Daytoy a mula dumakkel agingga iti agarup 1.5 m (5 pie), agsabong iti duyaw wenno no dadduma arindaraen a sabsabong, ket kalpasan a magango dagiti sabong, mangpataud kadagiti bekkag (balay) ti kapas wenno kapsula ti bukbukel. No naluomen, agungap dagiti bekkag, iti kasta agbukag ti nalamuyot a kapas. Kalpasan a maurnong ti kapas, masapul a maikkat wenno masugod dagiti bukel babaen ti pannakaipalasat ti kapas iti laddit (roller gin). Kalpasanna, dagiti linabag ti kapas nakasaganan iti maudi a proseso ken iti pannakaabel. Isingasing ti sumagmamano nga eskolar a dagiti “puraw a lupot” dagiti trabahador iti pagabelan ti Egipto a nadakamat iti Isaias 19:9 ket nalabit naaramid iti kapas.​—Kitaenyo ti LUPOT.