Nupay ti Aramaiko a sao a sum·pon·yahʹ, nga agparang iti Daniel 3:5, 10, 15, naipatarus kas maysa a kita ti pagtokar nga adda kuerdasna (KJ, Kx) ken “simponia” (Dy, Yg), dagiti agdama a patarus ti Biblia gagangay nga ipatarusda dayta a sao kas “gaita.” Iti Lexicon in Veteris Testamenti Libros da Koehler ken Baumgartner, nailanad ti kaipapanan a “gaita.”​—Leiden, 1958, p. 1103.

 Mabalin nga umarngi ti sum·pon·yahʹ kadagiti agdama-aldaw a simple a gaita iti Dumaya. Ti naaramat  a di sumngaw a supot ket lalat ti kalding, nga awanen ti saksaka, ipus, wenno ulona, ngem kadawyanna nga adda pay laeng ti dutdot a nangabbong iti dayta. Adda tubo a naisulbong iti daytoy a supot tapno makargaan iti angin ken naisulbong met dagiti kasla tubo a plauta a naaramid iti runo ken murdong dagiti sara ti baka.