[nagtaud iti sao a kaipapananna ti “kayo a palma”].

 “Maysa a sasangladan iti Creta.” (Ara 27:12) Ti barko a naglaon iti bukbukel a nagluganan ni Pablo kas balud idi nagdaliasat nga agturong idiay Roma ket ginandatna ti aglayag manipud Nasayaat a Sasangladan agingga idiay Fenix tapno sumanglad sadiay bayat ti panawen ti lam-ek. Idi sinalapon dayta ti maysa a bagyo, narba iti isla ti Malta.​—Ara 27:13–28:1.

 No maipapan iti ayan ti Fenix, ipasimudaag laeng ti salaysay ti Aramid nga adda dayta iti laud ti Nasayaat a Sasangladan, iti makin-abagatan a sikigan ti Creta, ken natalged daytoy a pagsangladan iti panawen ti lam-ek. Gapuna, dua a lugar ti maikunkuna nga ayan dayta. Ti maysa isu ti Loutro, iti makindaya a sikigan ti maysa a rawis ti daga, agarup 65 km (40 mi) iti laud ti Nasayaat a Sasangladan, ket ti sabali isu ti Phineka, iti bangir a sikigan daytoy a rawis. Ti literal a Griego a teksto deskribirenna ti pagsangladan ti Fenix kas “tumantannawag [ka·taʹ] iti abagatan a laud nga angin ken agpababa [ka·taʹ] iti amianan a laud nga angin.” Ipapan dagiti eskolar a mangpabor iti Loutro a daytoy kaipapananna ti “tumunos” wenno “sisasango” [ka·taʹ] iti pagpuyupoyan ti angin nga aggapu iti abagatan a laud ken iti amianan a laud. (Ara 27:12, Rbi8 ftn) Gapu itoy a pannakaawat, ti pagsangladan ket naikuna a ‘sisasango iti amianan a daya ken iti abagatan a daya (RS, NW), maysa a panangiladawan a mabalin a tumunos iti nalawa a nagsikko ti sukogna a pagserkan nga agturong iti pagsangladan idiay Loutro. Ti Phineka, gapu iti kasasaadna, saanen a maar-aramat ita kas pagsangladan, nupay mabalin a naapektaran ti pormana gapu kadagiti panagbalbaliw iti geolohia iti aglawlaw. Nupay kasta, addaan ti Phineka iti dua a minanga, ti maysa ket nakasango iti abagatan a laud ket ti sabali iti amianan a laud. Gapuna, tarusan dagidiay umayon iti daytoy a disso a ti sasao a “tumantannawag” ket kaipapananna a nakasango iti direksion a paggapuan ti angin imbes nga iti direksion a pagpuyupoyanna.