[nagtaud iti sao a kaipapananna ti “aglabutab”].

 Maysa a mapagpiaran a kameng ti kongregasion idiay Filipos, Macedonia, a naibaon nga adda awitna a sagut ken Pablo, a sibabalud idin idiay Roma (a. 59-61 K.P.). (Fil 2:25; 4:18) Bayat ti kaaddana idiay Roma, “nagsakit [ni Epafrodito] agingga a nagistayan natay; ngem ti Dios naasian kenkuana.” Nakagteng kadagiti taga Filipos ti damag maipapan ti panagsakitna ket nalabit nagsaludsodda ta madandanaganda. Yantangay il-iliwen idi ni Epafrodito a makita dagiti taga Filipos ken maldaangan ta naammuanda a nagsakit, napanunot ni Pablo a nasaysayaat a pagsublienna a dagus ni Epafrodito apaman a maimbagan ket intalekna kenkuana ti suratna iti kongregasion idiay Filipos. Pinaregta ni Pablo dagiti kakabsat nga ipaayanda ni Epafrodito “iti nakayugalian a panangabrasa iti Apo” ken ‘itultuloyda nga ibilang a maipatpateg dagiti kasta a kita ti tattao.’ Ta insebba ni Epafrodito ti biagna nga uray la gistay natay maigapu iti trabaho ti Apo. (Fil 2:25-30) Saan koma a pagarupen a ni Epafrodito ket isu met laeng ni Epafras manipud Colosas.