[Bassit a Kigaw a Baka].

  1. Ari ti Moab idi kaaldawan ti Uk-ukom, a nangirurumen iti Israel iti 18 a tawen, “agsipud ta inaramidda no ania ti dakes kadagiti mata ni Jehova.” (Uk 3:12-25) Ni Eglon ti pannakaulo idi nagkakappon ti Moab, Ammon, ken Amalek a rumaut iti Israel. Dimteng ti pannakatnagna idi a kinuna ti kannigid a ni Ehud, idi naidatagnan ti kadawyan nga impuesto: “Addaanak iti nalimed a sao maipaay kenka, O ari.” Idi agmaymaysan ni Eglon iti uneg ti napariir a siledna iti rabaw ti daplat nga atep ti palasiona kalpasan ti panangpapanawna kadagiti katulonganna, timmakder manipud iti tronona tapno denggenna ti kinuna ni Ehud a “sao ti Dios.” Idin, induyok ni Ehud iti nakaluklukmeg a tian ni Eglon ti dua ti tademna a kampilan iti kasta ti “putan limmumlom met a simmaruno iti tadem,” ket “nangrugi a rummuar ti ibleng.” Kuna ti Commentary ni Clarke maipapan iti Uk-ukom 3:22: “Mabalin a rimmuar iti sugat ti linaon dagiti bagisna, wenno nakaibleng iti natural a pamay-an gapu iti buteng ken rigatna.”

  2. Naarian a siudad dagiti Canaanita a ti arina ket nakikappon maibusor iti Gabaon idi nakikappia daytoy a siudad ken Josue ken iti Israel. Pinapatay ni Josue ti lima nga ari a nakiraman, imbitinna ida kadagiti kayo, ket idi agangay pinarmekna ti Eglon, nga intudingna a madadael dagiti agnanaed iti dayta. (Jos 10:1-5, 22-27, 34, 35; 12:12) Kalpasanna, nairaman dayta iti teritoria ti tribu ni Juda. (Jos 15:39) Adda dagiti mangibaga a ti orihinal nga ayanna ket idiay Tell el-Hesi, agarup 25 km (16 mi) iti daya nga amianan-a-daya ti Gaza, ken agarup 11 km (7 mi) iti laud ti ayan ti Laquis, isu nga asideg dayta iti igid ti Tantanap ti Filistia. Nupay kasta, ti kadaanan a naganna ket nataginayon kadagiti rebba ti Khirbet ʽAjlan, sumagmamano a milia ti kaadayona.