Nakayangyang a gaddil iti bagi a saan a direkta a sugat, nupay ti nagabaya a kita ket gagangay nga imbunga ti bassit a dunor, kas iti pannakagaradgad ti kudil. Dagiti derder mabalin nga adda iti ruar wenno iti uneg, a tumanor iti kudil wenno kadagiti nagalis a makinrabaw a paset. Masansan nga agnana ken agtultuloy a dadaelen ken papatayenda ti tisyu iti naapektaran a paset. Dagiti nagabaya a derder, a napudot, naut-ot, masansan a tumanor iti makimbaba a paset ti saka ti maysa a tao.

 Iti Hebreo a Kasuratan, ti sao a no dadduma naipatarus a “derder” ket ma·zohrʹ, a mabalin nga agaplikar iti derder, gaddil, wenno busali. Patien ti sumagmamano nga eskolar a tumukoy dayta iti kita ti sugat a kasapulan a palsoten ti banag nga adda iti unegna. Ti Griego a sao a helʹkos, mangipasimudaag iti derder, maar-aramat iti Kristiano a Griego a Kasuratan; agparang dayta iti Griego a Septuagint iti Exodo 9:9 ken Job 2:7 maipaay iti Hebreo a sao a shechinʹ, a mangipatuldo iti busali.​—Kitaenyo ti BUSALI.

 Piguratibo nga Usar. Iti naimpadtuan, nailadawan ti Efraim (Israel) kas masakit ket ti Juda kas addaan iti “derder,” dagiti kasasaad nga imbunga ti dakes nga aramidda ken ti nagbanaganna a pannakaipukaw ti pabor ti Dios. Ngem, imbes nga agtalekda ken Jehova maipaay iti pannakasalaknib manipud kadagiti kalabanda, barengbareng a nagpatulongda iti ari ti Asiria, a saan a nakabael a mangpaimbag kadakuada iti “sugat” wenno derder a kasasaadda. (Os 5:13) Idi agangay, ti Sion, a dagiti umilina naidestiero idiay Babilonia, nailadawan a parparigaten ti derder.​—Jer 30:12-15, 17; idiligyo ti Lu 16:20, 21; Apo 16:2, 10, 11.