[Dagiti Korona [kayatna a sawen, dagiti nagsirkulo a tikub]].

  1. Maysa nga ili iti makindaya a deppaar ti Jordan, maysa kadagidiay kiniddaw dagiti tribu da Gad ken Ruben kas sanikuada. Daytoy a disso ket maikanatad unay maipaay kadagiti dinguen dagitoy a tribu. (Nu 32:1-5) Kalpasanna, dayta nga ili ket binangon manen dagiti Gadita.​—Nu 32:34.

 Ti Bato a Moabita ni Ari Mesa dakamatenna met daytoy a lugar, iti maika-10 ken maika-11 a linia ti kitikit. Kunaenna iti maysa a pasetna: “Ita nagnanaedanen ti lallaki ti Gad ti daga ti Atarot, ket ti ari ti Israel binangonna ti Atarot maipaay kadakuada; ngem nakirupakak iti ili ket innalak dayta ken pinapatayko amin dagiti tattao iti dayta nga ili . . . Ket insublik manipud sadiay ni Arel (wenno Oriel), ti panguluen dayta . . . ket pinagyanko sadiay ti lallaki ti Saron ken lallaki ti Maharith.”​—Ancient Near Eastern Texts, inurnos ni J. B. Pritchard, 1974, p. 320.

 Ti ayan daytoy a disso ket gagangay a maibilbilang nga isu ti agdama-aldaw a Khirbet ʽAttarus, iti daya ti Natay a Baybay ken agarup 13 km (8 mi) iti amianan a laud ti Dibon (nadakamat kalpasan ti Atarot iti Nu 32:3). Masarakan dagiti rebba iti makinlaud a darisdis ti maysa a bantay nga addaan iti isu met laeng a nagan ken agarup 750 m (2,500 pie) ti kangatona. Nupay daytoy a lugar ket adda iti las-ud ti teritoria ti Ruben, agparang a dayta ket teritoria a pagrinnanudan dagiti tribu ti Gad ken Ruben.

  2. Ili nga adda iti nagbeddengan dagiti teritoria ti Efraim ken Benjamin. (Jos 16:2) Nabatad nga isu met laeng ti Atarot-addar a natukoy iti Josue 16:5 ken 18:13. Iti daytoy naud-udi a bersikulo naiparang dayta kas mangbukel a paset ti makin-amianan a beddeng ti Benjamin ken kas adda iti “rabaw ti bantay nga adda iti abagatan ti Makimbaba a Bet-horon.”

  3. Ili iti makin-amianan a daya a beddeng ti tribu ni Efraim.​—Jos 16:7.