1. Anak ni Sem, maikadua a nainaganan iti Genesis 10:22 ken 1 Cronicas 1:17. Isu ti inapo dagiti Asirio, ken ti namunganayanna a Hebreo a sao naipatarus nga “Assur” kasta met nga “Asiria” ken “Asirio.” Ti tuktukoyen ti Ezequiel 27:23 ket mabalin a ti nasionda wenno ti maysa kadagiti kangrunaan a siudadna nga Assur (agdama-aldaw a Qalʽat Sherqat).

  2. Ti kangrunaan a didiosen dagiti Asirio, ti diosda iti namilitariaan a kinamaingel, a pagkarkararagan iti tulong dagitoy a tattao a pagay-ayatda ti gubat. Ni Assur ket kasla maysa a “patriarka a napagbalin a dios,” ket iti panagrukbab kenkuana dagiti Asirio, ti nagdaydayawanda isu ti inapoda a ni Assur, ti anak ni Sem. Ti nagan nga Assur ket naisilpo iti adu nga Asirio a nagan, kas iti nagan ni Esar-haddon ken ni Asurbanipal.

 Patienda a ti ulbod a dios a ni Assur ti kangrunaan a mangsalsalaknib kadagiti Asirio, a nailadawan iti gapuananda iti arte kas addaan-payak a timbukel nga init. Iti nagan ti diosda a ni Assur ken buyogen ti anamongna (impasimudaag dagiti mainugot a partaan), nakibakal dagiti Asirio a buyot, nga awit-awitda ti sagrado a simbolona iti pannakirangetda. Patien ti ar-arida a dagiti panagballigida ket “gapu iti tulong ni Assur.”​—Kitaenyo ti LADAWAN, Tomo 2, p. 529; ASIRIA.