Uk-ukom 7:1-25
7 Idin ni Jerubaal,+ kayatna a sawen, ni Gideon,+ ken amin dagiti umili a naikuyog kenkuana, bimmangonda a nasapa ket nagpakarsoda idiay bubon ti Harod; ket ti pakarso ti Midian adda idi iti amiananna, iti turod ti More, idiay nababa a tanap.
2 Ni Jehova kinunana ita ken Gideon: “Dagiti umili a naikuyog kenka aduda unay tapno iyawatko ti Midian iti imada.+ Nalabit pagpangas ti Israel+ ti bagina maibusor kaniak, a kunkunana, ‘Ti imak ti nangisalakan kaniak.’+
3 Ket ita agpukkawka, pangngaasim, iti pagdengngeg dagiti umili, a kunaem, ‘Siasino ti mabutbuteng ken agpigpigerger? Bay-anyo nga agawid.’”+ Ngarud sinubok ida ni Gideon. Gapuna, duapulo ket dua a ribu kadagiti umili ti nagawid, ket adda sangapulo a ribu a nabati.
4 Kaskasdi ni Jehova kinunana ken Gideon: “Adu pay unay dagiti umili.+ Pasalogem ida iti danum tapno masubokko ida sadiay maipaay kenka. Ket mapasamakto nga iti siasinoman a kunaek kenka, ‘Daytoy kumuyogto kenka,’ isu ti maysa a kumuyogto kenka, ngem iti tunggal maysa a kunaekto kenka, ‘Daytoy saanto a kumuyog kenka,’ isunto ti maysa a saan a kumuyog.”
5 Gapuna pinasalogna dagiti umili iti danum.+
Kalpasanna ni Jehova kinunana ken Gideon: “Tunggal maysa a mangdildil iti danum babaen ti dilana a kas ti panagdildil ti aso, ilasinmonto, kasta met ti tunggal maysa nga agparintumeng nga uminum.”+
6 Ket ti bilang dagidiay nagdildil babaen ti imada iti ngiwatda nagbanag a tallo gasut a lallaki. No maipapan iti amin a natedda kadagiti umili, nagparintumengda nga imminum iti danum.
7 Ni Jehova kinunana ita ken Gideon: “Babaen iti tallo gasut a lallaki a nagdildil isalakankayto, ket iyawatkonto ti Midian ita imam.+ No maipapan iti amin a sabsabali nga umili, mapanda koma tunggal maysa iti lugarna.”
8 Gapuna innalada iti imada dagiti abasto dagiti umili, ken dagiti tangguyobda,+ ket pinagawidna ti amin a tattao ti Israel tunggal maysa iti pagtaenganna; ket pinagtalinaedna ti tallo gasut a lallaki. No maipapan iti pakarso ti Midian, adda idi iti babana idiay nababa a tanap.+
9 Ket naaramid bayat dayta a rabii+ a kinuna kenkuana ni Jehova: “Bumangonka, sumalogka agingga iti pakarso, ta inyawatkon dayta ita imam.+
10 Ngem no mabutengka a sumalog, sumalogka, sika agraman ni Pura a katulongam, agingga iti pakarso.+
11 Ket masapul nga umimdengka iti sawendanto,+ ket kalpasanna pudno unay a pumigsanto ta imam,+ ket sigurado a sumalogkanto agingga iti pakarso.” Iti kasta isu ken ni Pura a katulonganna simmalogda agingga iti igid dagidiay adda iti urnos ti pannakibakal nga adda iti pakarso.
12 Ita ti Midian ken Amalek ken amin dagiti taga Daya+ naidarisonda idiay nababa a tanap a kas kaadu dagiti dudon;+ ket awanan bilang dagiti kamelioda,+ kas kaadu ti binukel ti darat nga adda iti aplaya.
13 Dimteng ita ni Gideon, ket, adtoy! adda idi ti maysa a lalaki a mangisalsalaysay iti tagtagainep iti kaduana, ket kinunana: “Adtoy ti tagtagainep a natagtagainepko.+ Ket, adtoy! adda idi ti nagbukel a tinapay ti sebada nga agtultulid nga agturong iti pakarso ti Midian. Kalpasanna dimteng iti maysa a tolda ket dinungparna dayta iti kasta narba,+ ket binaliktadna, ket ti tolda natuang a naaplag.”
14 Gapu itoy simmungbat ti kaduana+ ket kinunana: “Daytoy awan sabali no di ti kampilan ni Gideon+ nga anak ni Joas, maysa a lalaki ti Israel. Ti pudno a Dios+ inyawatna iti imana ti Midian ken ti intero a pakarso.”+
15 Ket naaramid nga apaman a nangngeg ni Gideon ti pannakaisalaysay ti tagtagainep ken ti pannakailawlawagna,+ rinugianna ti agdaydayaw.+ Kalpasan dayta isu nagsubli iti pakarso ti Israel ket kinunana: “Tumakderkayo,+ ta ni Jehova inyawatnan ita imayo ti pakarso ti Midian.”
16 Kalpasanna biningbingayna ti tallo gasut a lallaki iti tallo a bunggoy ket nangikabil kadagiti tangguyob+ iti im-imada amin ken dadakkel a gorgorita nga awan nagyanda, ken al-aluten iti uneg dagiti dadakkel a gorgorita.
17 Ket kinunana kadakuada: “Rebbeng nga agsursurokayo iti panangimatangyo kaniak, ket kasta ti rebbeng nga aramidenyo. Ket inton makagtengak iti igid ti pakarso, mapasamakto met a kas iti aramidek, kasta ti aramidenyonto.
18 Inton napuyotkon ti tangguyob, siak ken amin a naikuyog kaniak, masapul met a puyotenyo dagiti tangguyob, dakayo met, iti aglikmut ti intero a pakarso,+ ket masapul a kunaenyo, ‘Ni Jehova+ ken ni Gideon!’”
19 Idi agangay dimteng ni Gideon agraman ti sangagasut a lallaki a naikuyog kenkuana iti igid ti pakarso iti panangrugi ti nagtengnga a panagbantay iti rabii.+ Kalkalpasda nga insaad dagiti guardia iti ruangan. Ket pinuyotda dagiti tangguyob,+ ket imburakda dagiti dadakkel a gorgorita-ti-danum nga adda iti im-imada.+
20 Iti kasta ti tallo a bunggoy pinuyotda dagiti tangguyob+ ken binurakda dagiti dadakkel a gorgorita ket iniggamandan dagiti aluten iti makannigid nga imada ket iti makannawan nga imada dagiti tangguyob tapno puyotenda ida, ket rinugianda nga impukkaw: “Ti kampilan ni Jehova+ ken ni Gideon!”
21 Bayat dayta nagtalinaedda a sitatakder tunggal maysa iti lugarna iti intero nga aglikmut ti pakarso, ket nagtataray ti intero a pakarso ket nagririawda ken nagtatalawda.+
22 Ket ti tallo gasut+ intuloyda a puyoten dagiti tangguyob,+ ket inkabil ni Jehova ti kampilan ti tunggal maysa maibusor iti sabali iti intero a pakarso;+ ket intultuloy ti pakarso ti panagtalawda agingga iti Bet-sitta, nagtultuloy nga agturong iti Zerera, agingga iti wayaway ti Abel-mehola+ iti sibay ti Tabbat.
23 Kabayatanna naayaban nga agsangsangkamaysa dagiti lallaki ti Israel manipud Neftali+ ken Aser+ ken iti intero a Manases,+ ket kinamatda+ ti Midian.
24 Ket ni Gideon nangibaon kadagiti mensahero iti intero a nakabambantay a rehion ti Efraim,+ a kunkunana: “Sumalogkayo a sumabet iti Midian ket un-unaanyo ida a mangkautibo kadagiti danum agingga iti Bet-bara ken ti Jordan.” Gapuna naayaban nga agsangsangkamaysa ti amin a lallaki ti Efraim, ket nakautiboda dagiti danum+ agingga iti Bet-bara ken ti Jordan.
25 Nakautiboda met ti dua a prinsipe ti Midian, awan sabali, da Oreb ken Zeeb;+ ket pinapatayda ni Oreb iti bato ti Oreb,+ ket pinatayda ni Zeeb idiay tangke ti arak ni Zeeb. Ket intultuloyda a kinamat ti Midian,+ ket inyegda ken Gideon ti ulo ni Oreb ken ti ulo ni Zeeb idiay rehion ti Jordan.+
