Uk-ukom 1:1-36
1 Ket kalpasan ti ipapatay+ ni Josue naaramid a ti annak ti Israel nagimtuodda+ ken Jehova, a kunkunada: “Siasino kadakami ti umunanto a sumang-at kadagiti Canaanita tapno makirupak kadakuada?”
2 Iti daytoy kinuna ni Jehova: “Sumang-atto ti Juda.+ Adtoy! Sigurado nga iyawatkonto ti daga iti imana.”
3 Idin ti Juda kinunana ken Simeon a kabsatna: “Makipagsang-atka kaniak iti pannaka-bunotko+ ket makirupakta kadagiti Canaanita, ket kalpasanna siak kumuyogakto kenka iti pannaka-bunotmo.”+ Iti kasta kimmuyog kenkuana ti Simeon.+
4 Gapuna simmang-at ti Juda ket inyawat ni Jehova iti im-imada dagiti Canaanita ken dagiti Perizeo,+ iti kasta pinarmekda ida idiay Bezec, sangapulo a ribu a lallaki.
5 Idi nasarakanda ni Adoni-bezec idiay Bezec, ngarud nakirupakda kenkuana ket pinarmekda dagiti Canaanita+ ken dagiti Perizeo.+
6 Idi nagtalaw ni Adoni-bezec, ngarud kinamatda ket natiliwda ket pinutedda dagiti tangan ti im-imana ken dagiti tangan ti saksakana.
7 Gapu itoy kinuna ni Adoni-bezec: “Adda pitopulo nga ari a puted dagiti tangan ti im-imada ken dagiti tangan ti saksakada nga agpidpidutda iti taraon iti sirok ti lamisaanko. Kas iti wagas nga inaramidko, kasta ti insupapak kaniak ti Dios.”+ Kalpasan dayta isu impanda idiay Jerusalem+ ket natay sadiay.
8 Kanayonanna pay, ti annak ni Juda nakigubatda iti Jerusalem+ ket nakautiboda dayta, ket kinabilda babaen ti tadem ti kampilan, ket ti siudad inyawatda iti apuy.
9 Ket kalpasanna simmalog ti annak ni Juda a makirupak kadagiti Canaanita nga agnanaed kadagiti nakabambantay a rehion ken iti Negeb+ ken iti Sefela.+
10 Gapuna nagmartsa ti Juda maibusor kadagiti Canaanita nga agnanaed idi iti Hebron+ (ita ti nagan ti Hebron sakbay dayta ket Kiriat-arba),+ ket kinabilda ni Sesai ken ni Ahiman ken ni Talmai.+
11 Ket nagtultuloyda a nagmartsa manipud sadiay a maibusor kadagiti agnanaed iti Debir.+ (Ita ti nagan ti Debir sakbay dayta ket Kiriat-sefer.)+
12 Kalpasanna kinuna ni Caleb:+ “Siasinoman a mangkabil iti Kiriat-sefer ket makautibona, ay ket, itedkonto kenkuana ni Acsa+ nga anakko a babai kas asawa.”+
13 Ket ni Otniel+ nga anak ni Quenaz,+ ub-ubing a kabsat ni Caleb,+ nakautibona dayta. Gapu iti dayta intedna kenkuana ni Acsa nga anakna a babai kas asawa.+
14 Ket naaramid a bayat ti panagawid ni Acsa, intultuloyna a ginargari nga agkiddaw iti talon ken amana. Idin nagtipat bayat nga adda iti rabaw ti asno.+ Gapu itoy kinuna kenkuana ni Caleb: “Ania ti kayatmo?”
15 Gapuna kinunana kenkuana: “Itdem kaniak ti maysa a bendision,+ ta ti makin-abagatan a sangkadisso a daga ti intedmo kaniak, ket masapul nga itedmo kaniak ti Gulot-maim.” Iti kasta inted kenkuana ni Caleb ti Makinngato a Gulot+ ken ti Makimbaba a Gulot.
16 Ket ti annak ti Keneo,+ a makinmanugang ken Moises,+ simmang-atda manipud siudad dagiti kayo a palma+ a kaduada ti annak ni Juda a mapan iti let-ang ti Juda, nga agturong iti abagatan ti Arad.+ Kalpasanna napanda ket nakipagnaedda kadagiti umili.+
17 Ngem ti Juda nagtultuloy a nakipagmartsa ken Simeon a kabsatna, ket kinabilda dagiti Canaanita nga agnanaed iti Zefat ket impaayda dayta iti pannakadadael.+ Gapuna napanaganan dayta a siudad iti Horma.+
18 Kalpasan dayta ti Juda kinautibona ti Gaza+ ken ti teritoriana ken ti Ascalon+ ken ti teritoriana ken ti Ekron+ ken ti teritoriana.
19 Ket ni Jehova nagtultuloy nga adda iti Juda, iti kasta tinagikuana ti nakabambantay a rehion, ngem saanna a kabaelan nga ikkatan iti sanikua dagiti agnanaed iti nababa a tanap, agsipud ta addaanda kadagiti karuahe a pakigubat+ nga addaan kadagiti panabas a landok.+
20 Idi intedda ken Caleb ti Hebron, kas iti inkari ni Moises,+ ngarud pinagtalawna sadiay ti tallo nga annak ni Anak.+
21 Ket ti annak ni Benjamin saanda a pinagtalaw dagiti Jebuseo nga agnanaed iti Jerusalem;+ no di ket nagtultuloy a nakipagnaed dagiti Jebuseo iti annak ni Benjamin idiay Jerusalem agingga itoy nga aldaw.+
22 Kabayatanna ti mismo a balay ni Jose+ simmang-at met a maibusor iti Bethel,+ ket adda idi kadakuada ni Jehova.+
23 Ket ti balay ni Jose nangrugi nga agsimisim+ iti Bethel (kabayatanna, Luz ti nagan ti siudad sakbay dayta),+
24 ket nakakita dagiti agbambantay iti lalaki a rumrummuar manipud siudad. Gapuna kinunada kenkuana: “Ipakitam kadakami, pangngaasim, ti dalan a sumrekan iti siudad, ket sigurado a watwatenminto maipaay kenka ti kinamanangngaasi.”+
25 Iti kasta ti lalaki impakitana kadakuada ti dalan a sumrekan iti siudad; ket kinabilda ti siudad babaen ti tadem ti kampilan,+ ngem ti lalaki ken ti intero a pamiliana binay-anda a makapanaw.+
26 Kalpasan dayta ti lalaki napan iti daga dagiti Heteo+ ket nangbangon iti siudad ket pinanagananna iti Luz. Dayta ti naganna agingga itoy nga aldaw.
27 Ket ti Manases+ saanna a tinagikua ti Bet-sean+ ken ti agpampannuray nga il-ilina ken ti Taanac+ ken ti agpampannuray nga il-ilina ken dagiti agnanaed iti Dor+ ken ti agpampannuray nga il-ilina ken dagiti agnanaed iti Ibleam+ ken ti agpampannuray nga il-ilina ken dagiti agnanaed iti Megiddo+ ken ti agpampannuray nga il-ilina, no di ket nagpilit dagiti Canaanita nga agnaed itoy a daga.+
28 Ket naaramid a bimmileg ti Israel+ ket pinuersada a pinagtrabaho dagiti Canaanita,+ ket saanda ida a pinagtalaw a naan-anay.+
29 Uray ti Efraim saanna a pinagtalaw dagiti Canaanita nga agnanaed idi idiay Gezer, no di ket nagtultuloy nga agnaed dagiti Canaanita iti tengngada idiay Gezer.+
30 Ti Zabulon+ saanna a pinagtalaw dagiti agnanaed iti Kitron ken dagiti agnanaed iti Nahalol,+ no di ket nagtultuloy nga agnaed dagiti Canaanita iti tengngada+ ket naipasakupda iti pinuersa a panagtrabaho.+
31 Ti Aser+ saanna a pinagtalaw dagiti agnanaed iti Acco ken dagiti agnanaed iti Sidon+ ken Alab ken Aczib+ ken Helba ken Afik+ ken Rehob.+
32 Ket nagtultuloy nga agnaed dagiti Aserita iti tengnga dagiti Canaanita nga agnanaed iti daga, agsipud ta saanda ida a pinagtalaw.+
33 Ti Neftali+ saanna a pinagtalaw dagiti agnanaed iti Bet-semes ken dagiti agnanaed iti Bet-anat,+ no di ket nagtultuloyda nga agnaed iti tengnga dagiti Canaanita nga agnanaed iti daga;+ ket nagbalin a kukuada dagiti agnanaed iti Bet-semes ken iti Bet-anat maipaay iti pinuersa a panagtrabaho.+
34 Ket intultuloy dagiti Amoreo a sinarunson ti annak ni Dan+ nga agturong iti nakabambantay a rehion, ta saanda a pinalubosan ida a sumalog iti nababa a tanap.+
35 Gapuna impapilit dagiti Amoreo ti agnaed idiay Bantay Heres ken idiay Ajalon+ ken Saalbim.+ Ngem ti ima ti balay ni Jose dimmagsen unay iti kasta napilitda nga agtrabaho iti narigat.+
36 Ket ti teritoria dagiti Amoreo manipud idi iti sasang-atan ti Acrabbim,+ manipud Sela nga agpangato.
