Sofonias 1:1-18
1 Ti sao ni Jehova a dimteng ken Sofonias nga anak ni Cusi nga anak ni Gedalias nga anak ni Amarias nga anak ni Ezekias idi kaaldawan ni Josias+ nga anak ni Amon+ nga ari ti Juda:
2 “Di bumurong nga ikisapkonto ti isuamin iti rabaw ti daga,” kuna ni Jehova.+
3 “Ikisapkonto ti naindagaan a tao ken ti animal.+ Ikisapkonto ti agtaytayab a parsua iti langlangit ken dagiti ikan iti baybay,+ ken dagiti pakaitibkolan agraman dagidiay nadangkes;+ ket gessatekto ti sangatauan iti rabaw ti daga,”+ kuna ni Jehova.
4 “Ket iyunnatkonto ti imak maibusor iti Juda ken maibusor kadagiti amin nga agnanaed iti Jerusalem,+ ket gessatekto iti daytoy a disso dagidiay nabatbati ti Baal,+ ti nagan ti papadi ti ganggannaet a dios agraman ti papadi,+
5 ken dagidiay nga iti rabaw dagiti atep agrukruknoyda iti buyot ti langlangit,+ ken dagidiay agrukruknoy,+ a mangar-aramid kadagiti sinapataan a kari ken Jehova+ ken mangar-aramid kadagiti sinapataan a kari babaen ken Malcam;+
6 ken dagidiay agsansanud iti isusurot ken Jehova+ ken saan a nangsapul ken Jehova ken saan a nagimtuod maipapan kenkuana.”+
7 Agulimekkayo iti sanguanan ti Soberano nga Apo Jehova;+ ta ti aldaw ni Jehova asidegen,+ ta ni Jehova nangisagana iti maysa a sakripisio;+ sinantipikarna+ dagidiay inawisna.
8 “Ket mapasamakto iti aldaw ti sakripisio ni Jehova a sanguekto dagiti prinsipe, ken ti annak ti ari,+ ken amin dagidiay sikakawes iti ganggannaet a pagan-anay.+
9 Ket sanguekto ti tunggal maysa a kumalay-at iti plataporma iti dayta nga aldaw, dagidiay mangpumpunno iti balay ti appoda iti kinaranggas ken panangallilaw.+
10 Ket maaddanto iti dayta nga aldaw,” kuna ni Jehova, “ti uni ti maysa nga ikkis manipud iti Ruangan ti Ikan,+ ken panaganug-og manipud iti maikadua a purok,+ ken dakkel a pannakarpuog manipud kadagiti turod.+
11 Aganug-ogkayo,+ dakayo nga agnanaed iti Mactes, ta napagulimek amin dagiti umili nga agtagtagilako;+ nagessat amin dagidiay mangtimtimbang iti pirak.
12 “Ket mapasamakto iti dayta a tiempo a siaannad a sukimatekto ti Jerusalem babaen kadagiti pagsilawan,+ ket sanguekto dagiti tattao a tumangtangken kadagiti ared-edda+ ken agkunkuna iti pusoda, ‘Ni Jehova saanto nga agaramid iti naimbag, ket saanto nga agaramid iti dakes.’+
13 Ket ti kinabaknangda agbalinto a maipaay iti panangkamkam ken dagiti balayda maipaay iti langalang a rebbek.+ Ket mangibangondanto kadagiti balay, ngem saandanto a pagnaedan;+ ket agmuladanto kadagiti kaubasan, ngem saandanto nga inumen ti arakda.+
14 “Ti dakkel nga aldaw+ ni Jehova asidegen.+ Asidegen dayta, ket mapagdardaras iti kasta unay.+ Ti uni ti aldaw ni Jehova ket napait.+ Sadiay ti nabileg a lalaki mangipeksa iti ikkis.+
15 Dayta nga aldaw ket aldaw ti rungsot, aldaw ti rigat ken riribuk,+ aldaw ti bagyo ken panaglangalang, aldaw ti kinasipnget ken kinadaguyemyem,+ aldaw dagiti ulep ken napuskol a daguyemyem,
16 aldaw ti tangguyob ken alarma a pagilasinan,+ maibusor kadagiti nasarikedkedan a siudad ken maibusor kadagiti nangato a torre iti nagsulian.+
17 Ket parigatekto ti sangatauan, ket sigurado a magnadanto a kasla bulsek a tattao;+ agsipud ta maikaniwas ken Jehova a nagbasolda.+ Ket ti darada pudno a maiparukpokto a kasla tapok,+ ken dagiti bagisda kasla ibleng.+
18 Uray ti pirakda wenno ti balitokda saanto a makabalin a mangispal kadakuada iti aldaw ti rungsot ni Jehova;+ ngem babaen iti apuy ti regtana maalun-onto ti intero a daga,+ agsipud ta mangtalipuposto, kinapudnona maysa a nakaam-ames, kadagiti amin nga agnanaed iti daga.”+
