Mikias 7:1-20
7 Asiak pay,+ ta nagbalinak a kas kadagiti naburas a bunga iti kalgaw, kas iti naadas iti panagburas iti ubas!+ Awan ti raay ti ubas a makan, awan ti nasapa a higos, a tarigagayan ti kararuak!+
2 Daydiay nasungdo napukaw iti daga, ket iti sangatauan awan ti nalinteg.+ Isuda amin, agpadaanda maipaay iti panagibukbok iti dara.+ Aganupda, tunggal maysa iti kabsatna, babaen iti iket.+
3 Adda dagiti imada iti dakes, tapno aramidenda a silalaing dayta;+ ti prinsipe kidkiddawenna ti maysa a banag, ket daydiay manguk-ukom aramidenna ti kasta gapu iti gunggona,+ ket daydiay naindaklan sasawenna ti panaggartem ti kararuana, ti kabukbukodanna met laeng;+ ket lagalagaenda dayta.
4 Daydiay kasayaatan kadakuada ket kas iti siitan, daydiay kalilintegan kadakuada ket nakarkaro ngem iti alad a siit.+ Ti aldaw dagiti managwanawanmo, ti pannakaasikasom, masapul nga umay.+ Ita mapasamak ti pannakatikawda.+
5 Dikay maaddaan pammati iti maysa a kadua. Dikay agtalek iti piaren a gayyem.+ Manipud kenkuana nga agid-idda iti saklotmo saluadam dagiti ruangan ti ngiwatmo.+
6 Ta ti anak a lalaki umsienna ti ama; ti anak a babai tumakder maibusor iti inana;+ ti manugang-a-babai maibusor iti katuganganna-a-babai;+ dagiti kabusor ti maysa a tao isu dagiti tattao iti sangakabbalayanna.+
7 Ngem no maipapan kaniak, ken Jehova nga agtultuloyakto nga agsiput.+ Ipakitakto ti panagur-uray iti Dios ti pannakaisalakanko.+ Denggennakto ti Diosko.+
8 Dika agrag-o gapu kaniak, O sika a babai a kabusorko.+ Nupay natuangak, sigurado a bumangonakto;+ nupay agnaedak iti sipnget,+ ni Jehova isunto ti silaw kaniak.+
9 Ti panagpungtot ni Jehova anusakto—ta nagbasolak a maikaniwas kenkuana+—agingga a tamingenna ti legal a kasok ket pudno nga ipakatna ti kinahustisia maipaay kaniak.+ Iruarnakto nga ipan iti lawag; kumitaakto iti kinalintegna.+
10 Ket makitanto ti kabusorko, ket maabbonganto iti bain,+ daydiay agkunkuna kaniak: “Sadino ti ayanna, ni Jehova a Diosmo?”+ Kumitanto kenkuana dagiti bukodko a mata.+ Ita isu agbalinto a lugar a pagipayatpayatan, kas iti pitak dagiti kalsada.+
11 Ti aldaw a panangbangon iti bato a padpadermo, iti dayta nga aldaw adayonto ti bilin.+
12 Iti dayta nga aldaw uray pay agingga kenka umaydanto manipud Asiria ken kadagiti siudad ti Egipto, ken manipud Egipto uray pay agingga iti Karayan;+ ken manipud baybay agingga iti baybay, ken manipud bantay agingga iti bantay.+
13 Ket ti daga agbalinto a langalang a rebbek maigapu kadagiti agnanaed iti dayta, gapu iti bunga dagiti pannakilangenda.+
14 Ipastoram ti ilim babaen iti sarukodmo,+ ti arban ti tawidmo, daydiay agtataeng nga agwaywayas iti bakir—iti tengnga ti maysa a minuyongan.+ Agtaraonda koma iti Basan ken Galaad+ kas kadagidi aldaw ti nakabaybayagen a tiempo.+
15 “Kas kadagidi aldaw nga iruruarmo manipud daga ti Egipto mangipakitaakto kenkuana iti nakaskasdaaw a bambanag.+
16 Makitanto dagiti nasion ket mabainandanto iti isuamin a kinabilegda.+ Iyapputdanto ti imada iti ngiwatda;+ agtulengto dagiti mismo a lapayagda.
17 Agdilpatdanto iti tapok kas kadagiti serpiente;+ kas kadagiti reptilia iti daga rummuardanto a silalagaw manipud kadagiti baluarteda.+ Umaydanto nga agtaytayegteg ken Jehova a Diostayo, ket agbutengdanto kenka.”+
18 Siasino ti Dios a kas kenka,+ maysa a mamakawan iti biddut ken mangpalabas iti salungasing+ ti natda iti tawidna?+ Sigurado a saannanto a taginayonen ti ungetna iti agnanayon, ta isu maragsakan iti naayat a kinamanangngaasi.+
19 Ipakitaannatayto manen iti asi;+ parukmaennanto dagiti bidduttayo.+ Ket ipuruakmonto amin dagiti basolda+ iti kaadalman ti baybay.
20 Itdemto ti kinapudno a naited ken Jacob, ti naayat a kinamanangngaasi a naited ken Abraham, nga insapatam kadagidi ammami manipud al-aldaw ti nabayagen a tiempo.+
