Jonas 3:1-10
3 Idin ti sao ni Jehova dimteng ken Jonas iti maikadua a daras, a kunkunana:+
2 “Tumakderka, mapanka idiay Nineve a dakkel a siudad, ket iwaragawagmo kenkuana ti waragawag+ a sawek kenka.”
3 Iti kasta, timmakder ni Jonas ket napan idiay Nineve maitunos iti sao ni Jehova.+ Ita ti mismo a Nineve maysa idi a siudad a dakkel iti Dios,+ nga addaan iti kaadayo a mapagpagna iti tallo nga aldaw.
4 Kamaudiananna nangrugi a sumrek ni Jonas iti siudad iti kaadayo a mapagpagna iti maysa nga aldaw, ket inwarwaragawagna ken kinunkunana: “Uppat a pulo laengen nga aldaw, ket ti Nineve maduprakto.”+
5 Ket dagiti tattao ti Nineve nangrugida a maaddaan iti pammati iti Dios,+ ket nangiwaragawagda iti panagayunar ken nangikawesda iti tinakpil,+ manipud iti daydiay kadadakkelan kadakuada agingga a mismo iti daydiay kanunumuan kadakuada.
6 Idi a ti sao nakagteng iti ari ti Nineve,+ ngarud timmakder manipud tronona ket inuksobna iti bagina ti opisial a kawesna ket inabbungotanna ti bagina iti tinakpil ket nagtugaw iti dapdapo.+
7 Kanayonanna pay, nagpaipukkaw, ket pinaisaona dayta iti Nineve, babaen iti bilin ti ari ken dagidiay naindaklanna, a kunkunana:
“Awan a pulos ti tao ken awan ti naamo nga animal, awan ti pangen ken awan ti arban, a rebbeng a mangraman iti aniaman. Awan koma ti mangan. Uray iti danum saanda koma nga uminum.+
8 Ket abbungotanda koma ti bagbagida iti tinakpil, tao ken naamo nga animal; ket umawagda koma a sipipigsa iti Dios ket agsublida,+ tunggal maysa manipud dakes a dalanna ken manipud kinaranggas nga adda kadagiti imada.
9 Siasino ti makaammo no ti pudno a Dios agbaw-ing ket pudno nga agladingit+ ket agbaw-ing manipud sumsumged nga ungetna, tapno iti kasta saantayo a mapukaw?”+
10 Ket ti pudno a Dios nakitana dagiti aramidda,+ a timmallikudda iti dakes a dalanda;+ ket iti kasta nagladingitan+ ti pudno a Dios ti didigra a sinaona nga ipagtengna kadakuada; ket saanna nga impagteng dayta.+
