Esdras 4:1-24
4 Idi a nangngeg dagiti kabusor+ ti Juda ken Benjamin a ti annak ti Pannakaidestiero+ agibangbangonda iti templo maipaay ken Jehova a Dios ti Israel,
2 dagus nga immasidegda ken Zorobabel+ ken kadagiti pannakaulo+ ti balbalay dagiti amma ket kinunada kadakuada: “Palubosandakami a makipagbangon kadakayo;+ ta, kas kadakayo, birokenmi ti Diosyo+ ket agisaksakripisiokami kenkuana nanipud pay iti al-aldaw ni Esar-haddon+ nga ari ti Asiria, a nangyeg kadakami ditoy.”+
3 Nupay kasta, ni Zorobabel ken ni Jesua+ ken ti dadduma pay a pannakaulo+ ti balbalay dagiti amma ti Israel kinunada kadakuada: “Awan ti aniaman a pakibianganyo kadakami iti panangibangon iti balay a maipaay iti Diosmi,+ ta dakami sangsangkamaysakami nga agibangon maipaay ken Jehova a Dios ti Israel, kas iti imbilin kadakami ni Ari Ciro+ nga ari ti Persia.”
4 Gapu iti dayta dagiti umili iti daga nagtultuloy a pinakapuyda+ ti im-ima dagiti umili ti Juda ken inupayda ida nga agibangon,+
5 ken nangtangdanda+ kadagiti manangbalakad maibusor kadakuada tapno paayenda ti pammatigmaanda iti amin nga al-aldaw ni Ciro nga ari ti Persia agingga iti panagturay ni Dario+ nga ari ti Persia.
6 Ket iti panagturay ni Asuero, iti panangrugi ti panagturayna, nangisuratda iti pammabasol+ maibusor kadagiti agnanaed iti Juda ken Jerusalem.
7 Kasta met, idi kaaldawan ni Artaxerxes, da Bislam, Mitredat, Tabeel ken ti dadduma pay a kakaduada nagsuratda ken Artaxerxes nga ari ti Persia, ket ti pannakaisurat ti surat nailanad kadagiti letra nga Aramaiko ken naipatarus iti Aramaiko+ a pagsasao.
8 Ni Rehum a kangrunaan nga opisial ti gobierno ken ni Simsai nga eskriba nangisuratda ken Artaxerxes nga ari iti maysa a surat maibusor iti Jerusalem, kas iti sumaganad:
9 Idin ni Rehum+ a kangrunaan nga opisial ti gobierno ken ni Simsai nga eskriba ken ti dadduma pay a kakaduada, dagiti ukom ken dagiti nababbaba a gobernador iti ballasiw ti Karayan,+ dagiti sekretario,+ dagiti umili ti Erec,+ dagiti taga Babilonia,+ dagiti agnanaed iti Susa,+ awan sabali, dagiti Elamita,+
10 ken ti dadduma pay a nasion+ nga indestiero ni naindaklan ken madaydayaw nga Asenapar+ ken insaadna kadagiti siudad ti Samaria,+ ken ti dadduma pay iti labes ti Karayan, ——; ket ita
11 daytoy ti maysa a kopia ti surat nga impatulodda maipapan iti dayta:
“Ken Artaxerxes+ nga ari, manipud kadagiti adipenmo a lallaki iti labes ti Karayan: Ket ita
12 maipakaammo koma iti ari a dagiti Judio a simmang-at ditoy manipud kenka agingga kadakami immayda iti Jerusalem. Bangbangonenda ti rebelioso ken dakes a siudad, ket leppasenda dagiti pader+ ken tarimaanenda dagiti pamuon.
13 Ita maipakaammo koma iti ari a, no mabangon manen daytoy a siudad ket malpas dagiti paderna, saandanto a mangited iti buis+ wenno uray impuesto+ wenno uray kuartais, ket mamataudto dayta iti pukaw kadagiti paggamengan+ ti ar-ari.
14 Ita yantangay kankanenmi ti asin ti palasio, ken saan nga umiso kadakami a makita ti pannakalabus ti ari, maigapu itoy nagbaonkami ken impakaammomi dayta iti ari,
15 tapno adda koma panangusisa iti libro dagiti pakasalaysayan+ dagiti inapom. Iti kasta masarakamto iti libro dagiti pakasalaysayan ken maammuam a dayta a siudad ket maysa a siudad a rebelioso ken mamatpataud iti pukaw iti ar-ari ken kadagiti masaksakupan a distrito, ket iti uneg dayta adda idi dagiti manangtignay iti iyaalsa manipud iti al-aldaw idi ugma. Iti daytoy a rason napaglangalang dayta a siudad.+
16 Ipakpakaammomi iti ari a, no mabangonto manen dayta a siudad ket malpas dagiti paderna, sigurado nga awanto met ti binglaymo iti labes ti Karayan.”+
17 Ti ari nangipatulod iti sao ken ni Rehum+ a kangrunaan nga opisial ti gobierno ken ni Simsai nga eskriba ken iti dadduma pay a kakaduada+ nga agnanaed idi idiay Samaria ken iti dadduma pay iti labes ti Karayan:
“Dagiti kablaaw!+ Ket ita
18 ti opisial a dokumento nga impatulodyo kadakami naibasa a silalawag iti sanguanak.
19 Gapuna maysa a bilin ti intuyangko, ket nagusisada+ ken nasarakanda a dayta a siudad manipud iti al-aldaw idi ugma ket maysa a timmaktakder maibusor iti ar-ari ken maysa a pakaar-aramidan idi ti panagrebelde ken iyaalsa.+
20 Ket adda idi napipigsa nga ar-ari+ iti Jerusalem ken mangtartarawidwid iti isuamin iti labes ti Karayan,+ ket ti buis, impuesto ken kuartais mait-ited idi kadakuada.+
21 Ita mangituyangkayo iti bilin tapno agsardeng dagitoy a nabaneg a lallaki, iti kasta dayta a siudad saan koma a mabangon manen agingga nga ituyangko ti bilin.
22 Gapuna agannadkayo nga awan koma ti kinaliway maipapan iti panagtignay itoy a banag, tapno ti pannakadangran saan koma a dumegdeg a pakadangranan ti ar-ari.”+
23 Ita kalpasan a ti kopia ti opisial a dokumento ni Artaxerxes nga ari naibasa iti sanguanan ni Rehum+ ken ni Simsai+ nga eskriba ken kadagiti kaduada,+ napanda a sidadaras idiay Jerusalem kadagiti Judio ket pinasardengda ida babaen iti puersa dagiti armas.+
24 Iti daydin a nagsardeng ti trabaho iti balay ti Dios, nga adda idi idiay Jerusalem; ket nagtultuloy a nagsardeng agingga iti maikadua a tawen ti panagturay ni Dario+ nga ari ti Persia.
