Apocalipsis 3:1-22
3 “Ket iti anghel+ ti kongregasion idiay Sardis isuratmo: Dagitoy ti bambanag a kuna daydiay addaan iti pito nga espiritu+ ti Dios ken iti pito a bituen,+ ‘Ammok dagiti aramidmo, nga addaanka iti nagan a sibibiagka, ngem natayka.+
2 Agbalinka a nasiput,+ ket pabilgem+ ti bambanag a nabatbati a nakasagana a matay, ta diak nasarakan a dagiti aramidmo naan-anay ti pannakaaramidda iti sanguanan ti Diosko.+
3 Gapuna, agtultuloyka a sipapanunot no kasano nga inawatmo+ ken no kasano a nangngegmo, ket itultuloymo a taginayonen dayta,+ ket agbabawika.+ Pudno unay malaksid no agriingka,+ umayak a kas maysa a mannanakaw,+ ket saanmonto a pulos maammuan no iti ania nga oras nga umayak kenka.+
4 “‘Nupay kasta, addaanka iti sumagmamano a nagan+ idiay Sardis a saan a nangtulaw+ kadagiti makinruar a kawesda, ket nakapurawdanto+ a makipagna kaniak, agsipud ta maikarida.+
5 Ti agballigi+ makawesanto a kasta iti puraw a makinruar a kawkawes;+ ket saankonto a pulos punasen ti naganna iti libro ti biag,+ no di ket bigbigekto ti naganna iti sanguanan ni Amak+ ken iti sanguanan dagiti anghelna.+
6 Daydiay addaan lapayag denggenna koma ti kunaen ti espiritu+ kadagiti kongregasion.’
7 “Ket iti anghel+ ti kongregasion idiay Filadelfia isuratmo: Dagitoy ti bambanag a kuna daydiay nasantuan,+ a napudno,+ nga addaan iti tulbek ni David,+ a manglukat tapno awan ti makairikep, ken mangirikep tapno awan ti makailukat,
8 ‘Ammok dagiti aramidmo+—adtoy! nangikabilak iti sanguanam iti ruangan a naluktan,+ nga awan ti makairikep—nga addaanka iti bassit a pannakabalin, ket tinaginayonmo ti saok ken saanmo a naglibakan ti naganko.+
9 Adtoy! Itdekto dagidiay kameng ti sinagoga ni Satanas nga agkunkuna a Judioda,+ ket kaskasdi a saanda a kasta no di ket agul-ulbodda+—adtoy! paumayekto ida ket agruknoyda+ iti sanguanan dagiti sakam ket ipakaammok kadakuada nga inay-ayatka.
10 Agsipud ta tinaginayonmo ti sao maipapan iti panagibturko,+ taginayonenkanto met+ iti oras ti pannakasubok, nga umay iti intero a mapagnaedan a daga, tapno suboken dagidiay agnanaed iti daga.+
11 Umayak a sidadaras.+ Itultuloymo a salimetmetan a sititibker ti adda kenka,+ tapno awan ti mangala iti koronam.+
12 “‘Daydiay agballigi—pagbalinekto nga adigi+ iti templo+ ti Diosko,+ ket saanton a pulos rummuar manipud iti dayta, ket isuratkonto kenkuana ti nagan ti Diosko ken ti nagan ti siudad ti Diosko, ti baro a Jerusalem+ a bumaba manipud langit nga aggapu iti Diosko, ken dayta baro a naganko.+
13 Daydiay addaan lapayag denggenna koma ti kunaen ti espiritu+ kadagiti kongregasion.’
14 “Ket iti anghel ti kongregasion idiay Laodicea+ isuratmo: Dagitoy ti bambanag a kuna ti Amen,+ ti matalek+ ken napudno+ a saksi,+ ti pangrugian ti panamarsua ti Dios,+
15 ‘Ammok dagiti aramidmo, a saanka a nalamiis wenno uray napudot. Kayatko a nalamiiska koma wenno no saan napudotka.
16 Gapuna, agsipud ta apaganem-emka ket saanka a napudot+ wenno uray nalamiis,+ isarwakanto manipud iti ngiwatko.
17 Agsipud ta kunam: “Nabaknangak+ ket nakagun-odak iti kinabaknang ket saanko a pulos kasapulan ti aniaman a banag,” ngem saanmo nga ammo a nakaay-ay-ay ken nakakaasi ken napanglaw ken bulsek+ ken lamolamoka,
18 ibalakadko kenka a gumatangka kaniak iti balitok+ a napasudi babaen iti apuy tapno bumaknangka, ken puraw a makinruar a kawkawes tapno makawesanka ken tapno saan a maiparangarang ti nakababain a kinalamolamom,+ ken sapsapo iti mata nga iyaprosmo kadagita matam+ tapno makakitaka.
19 “‘Amin dagidiay dungdungnguek tubngarek ken disiplinaek.+ Gapuna agregta ken agbabawika.+
20 Adtoy! Agtaktakderak iti ruangan+ ken agtuktuktokak. No ti asinoman mangngegna ti timekko ket luktanna ti ruangan,+ sumrekakto iti balayna ket makipangrabiiak kenkuana ken isu kaniak.
21 Iti daydiay agballigi+ ipaluboskonto a makikatugaw kaniak iti tronok,+ kas iti mismo a panagballigik ken pannakikatugawko+ iti Amak iti tronona.+
22 Daydiay addaan lapayag denggenna koma ti kunaen ti espiritu+ kadagiti kongregasion.’”+
