1 Tesalonica 5:1-28
5 Ita no maipapan kadagiti tiempo ken kadagiti panawen,+ kakabsat, saanyon a kasapulan ti masuratan.
2 Ta dakayo pagaammoyo unay a ti aldaw ni Jehova+ umay nga apagpag-isu a kas iti mannanakaw iti rabii.+
3 Inton sasawenda:+ “Talna+ ken talged!” iti kasta giddato a dumteng kadakuada ti kellaat a pannakadadael+ kas iti ut-ot ti panagrigat a dumteng iti masikog a babai;+ ket saandanto a pulos makalisi.+
4 Ngem dakayo, kakabsat, awankayo iti sipnget,+ tapno kellaatennakayo dayta nga aldaw a kas kadagiti mannanakaw,+
5 ta dakayo amin ket annak ti lawag+ ken annak ti aldaw.+ Saannatayo a kukua ti rabii wenno uray ti sipnget.+
6 No kasta, ngarud, saantay koma a maturog+ a kas iti ar-aramiden ti dadduma,+ no di ket agtalinaedtayo koma a siririing+ ken agtalinaedtayo a sipupuot.+
7 Ta dagidiay maturog+ nairuamda a maturog iti rabii,+ ket dagidiay agbartek gagangay a nabartekda iti rabii.
8 Ngem no maipapan kadatayo a kukua ti aldaw, agtalinaedtay koma a sipupuot ket ikapettayo ti kabal ti barukong+ nga isu ti pammati+ ken ayat ket ti namnama ti pannakaisalakan+ kas kabal ti ulo;+
9 agsipud ta ti Dios intudingnatayo, saan nga iti pungtot,+ no di ket iti pananggun-od iti pannakaisalakan+ babaen ken Apotayo a Jesu-Kristo.+
10 Isu natay maipaay kadatayo,+ tapno, uray no agtalinaedtayo a siririing wenno matmaturogtayo, agbiagtayo koma a maikuyog kenkuana.+
11 Gapuna itultuloyyo a liwliwaen ti maysa ken maysa ken pabilgen ti maysa ken maysa,+ a kas iti pudno nga ar-aramidenyo.+
12 Ita kiddawenmi kadakayo, kakabsat, a maaddaankayo iti panagraem kadagidiay agtartrabaho a sipipinget iti tengngayo ken mangidadaulo+ kadakayo iti Apo ken mangbagbaga kadakayo;
13 ket ipaayanyo ida iti ad-adda pay a nalablabes a konsiderasion iti ayat gapu iti aramidda.+ Makikappiakayo iti maysa ken maysa.+
14 Iti sabali a bangir, balakadandakayo, kakabsat, a bagbagaanyo dagiti nagulo,+ agsaokayo iti makaliwliwa kadagiti malmaldaangan a kararua,+ saranayenyo dagiti nakapuy, maaddaankayo iti mabayag a panagitured+ iti isuamin.
15 Kitaenyo nga awan ti mangisupapak iti asinoman ti panangdangran iti panangdangran,+ no di ket kankanayon a surotenyo ti naimbag maipaay iti maysa ken maysa ken iti amin a sabsabali pay.+
16 Agrag-okayo a kankanayon.+
17 Agkararagkayo a di agressat.+
18 Mainaig iti isuamin agyamankayo.+ Ta daytoy ti pagayatan ti Dios a naikaykaysa ken Kristo Jesus maipapan kadakayo.
19 Dikay iddepen ti apuy ti espiritu.+
20 Dikay umsien dagiti panagipadto.+
21 Siguraduenyo dagiti amin a banag;+ kumpetkayo a siiirut iti nasayaat.+
22 Adaywanyo ti tunggal langa ti kinadangkes.+
23 Ti mismo a Dios ti talna+ santipikarennakayo koma a naan-anay.+ Ket sisasalun-at iti tunggal banag mataginayon koma nga awan pakababalawanna ti espiritu ken kararua ken bagiyo kakabsat iti kaadda ni Apotayo a Jesu-Kristo.+
24 Matalek daydiay mangay-ayab kadakayo, ket aramidennanto met dayta.
25 Kakabsat, itultuloydakami nga ikararagan.+
26 Kablaawanyo dagiti amin a kakabsat babaen iti nasantuan nga agep.+
27 Isaadkayo iti sidong ti nadaeg a pagrebbengan baeten ti Apo a daytoy a surat maibasa koma kadagiti amin a kakabsat.+
28 Ti di kaikarian a kinamanangngaasi+ ni Apotayo a Jesu-Kristo maadda koma kadakayo.
