Քրիստոնեական ժողովի Գլուխը Հիսուսն է (Եփեսացիներ 5։23)։ Այսօր Հիսուսը երկնքից առաջնորդում է իր հետևորդներին «հավատարիմ և իմաստուն ծառայի» միջոցով (կարդա Մատթեոս 24։45)։ Հիսուսը անձամբ է նշանակել «ծառային» և նրան տվել է որոշակի իշխանություն։ Սակայն նա պետք է հնազանդվի Քրիստոսին և ծառայի նրա եղբայրներին։ Իսկ ո՞վ է այդ ծառան։ Ինչպե՞ս է նա հոգ տանում մեր մասին։

1. Ո՞վ է «հավատարիմ և իմաստուն ծառան»

Եհովան իր ժողովրդին միշտ առաջնորդել է մեկ կամ մի քանի մարդկանց միջոցով (Մաղաքիա 2։7; Եբրայեցիներ 1։1)։ Հիսուսի մահից հետո առաքյալները և Երուսաղեմի երեցները սկսեցին առաջնորդություն տալ ժողովին (Գործեր 15։2)։ Այդ օրինակին հետևելով՝ այսօր երեցների մի փոքր խումբ՝ Եհովայի վկաների Կառավարիչ մարմինը, հոգևոր սնունդ է տրամադրում և կազմակերպում է քարոզչական գործը։ Այս խումբը «այն հավատարիմ և իմաստուն ծառան [է], որին [Հիսուսը].... նշանակեց» (Մատթեոս 24։45ա)։ Կառավարիչ մարմնի բոլոր անդամները սուրբ ոգով օծված քրիստոնյաներ են, ովքեր իրենց երկրային կյանքի ավարտից հետո համալրելու են Քրիստոսի երկնային կառավարության կազմը։

2. Հավատարիմ ծառան ինչպե՞ս է հոգևոր սնունդ մատակարարում

Հիսուսն ասաց, որ հավատարիմ ծառան «[իր հավատակիցների] կերակուրը կտա ճիշտ ժամանակին» (Մատթեոս 24։45բ)։ Ճիշտ ինչպես ֆիզիկական կերակուրն է մեզ առողջ և ուժեղ դարձնում, այնպես էլ հոգևոր կերակուրը, այսինքն՝ աստվածաշնչյան խորհուրդները, ուժ կտան, որ նվիրված մնանք Եհովային և կատարենք Հիսուսի հանձնարարած գործը (1 Տիմոթեոս 4։6)։ Մենք հոգևոր կերակուրը ստանում ենք ժողովի հանդիպումների և համաժողովների ժամանակ, ինչպես նաև Աստվածաշնչի վրա հիմնված հրատարակությունների և տեսանյութերի միջոցով։ Դրանք մեզ օգնում են հասկանալ Աստծու կամքը և ամրացնել նրա հետ ունեցած մեր մտերմությունը։

 ԻՄԱՆԱՆՔ ԱՎԵԼԻՆ

3. Եհովայի ժողովուրդը պետք է կազմակերպված լինի

Հիսուսի առաջնորդությամբ Կառավարիչ մարմինը կազմակերպում է Եհովայի վկաների գործունեությունը։ Առաջին քրիստոնյաներին նույնպես Հիսուսը նման կերպ էր առաջնորդում։ Դիտեք ՏԵՍԱՆՅՈՒԹԸ։

Կարդացեք 1 Կորնթացիներ 14։33, 40, այնուհետև քննարկեք հետևյալ հարցը։

• Այս համարներն ինչպե՞ս են ցույց տալիս, որ Եհովան ցանկանում է՝ իր Վկաները կազմակերպված լինեն։

4. Հավատարիմ ծառան կազմակերպում է մեր քարոզչական գործը

Քարոզչությունը ամենակարևոր գործն էր, որ առաջին դարի քրիստոնյաները կատարում էին։ Կարդացեք Գործեր 8։14, 25 և քննարկեք հետևյալ հարցերը։

• Նրանցից ովքե՞ր էին կազմակերպում քարոզչական գործը։

• Պետրոսն ու Հովհաննեսն ինչպե՞ս արձագանքեցին մյուս առաքյալների տված հրահանգներին։

Քարոզչությունը ամենակարևոր գործն է, որ Կառավարիչ մարմինը կազմակերպում է։ Դիտեք ՏԵՍԱՆՅՈՒԹԸ։

 Հիսուսն ընդգծեց, թե որքան կարևոր է քարոզչական գործը։ Կարդացեք Մարկոս 13։10 և քննարկեք հետևյալ հարցերը։

• Քարոզչական գործն ինչո՞ւ է այդքան կարևոր Կառավարիչ մարմնի համար։

• Ինչո՞ւ է անհրաժեշտ, որ «հավատարիմ և իմաստուն ծառան» կազմակերպի համաշխարհային այս գործը։

5. Հավատարիմ ծառան առաջնորդություն է տալիս

Կառավարիչ մարմինը առաջնորդություն է տալիս բոլոր Վկաներին։ Իսկ ինչպե՞ս է Կառավարիչ մարմինը որոշումներ կայացնում։ Տես, թե առաջին դարի կառավարիչ մարմինն ինչպես էր դա անում։ Կարդացեք Գործեր 15։1, 2, այնուհետև քննարկեք հետևյալ հարցերը։

• Առաջին դարում որոշ քրիստոնյաների միջև ի՞նչ հարցի շուրջ տարաձայնություն առաջացավ։

• Հարցը լուծելու համար Պողոսը, Բառնաբասը և մյուսները ո՞ւմ դիմեցին։

Կարդացեք Գործեր 15։12–18, 23–29, այնուհետև քննարկեք այս հարցը։

• Նախքան որոշում կայացնելը կառավարիչ մարմինն ի՞նչ արեց, որ հետևի Աստծու առաջնորդությանը (տես 12-րդ, 15-րդ և 28-րդ համարները)։

Կարդացեք Գործեր 15։30, 31 և 16։4, 5 համարները, այնուհետև քննարկեք հետևյալ հարցերը։

• Առաջին դարի քրիստոնյաներն ինչպե՞ս արձագանքեցին կառավարիչ մարմնի տված առաջնորդությանը։

• Եհովան ինչպե՞ս օրհնեց նրանց հնազանդությունը։

Կարդացեք 2 Տիմոթեոս 3։16 և Հակոբոս 1։5 համարները, այնուհետև քննարկեք այս հարցը։

• Որոշումներ կայացնելիս Կառավարիչ մարմինն ինչպե՞ս է փնտրում Աստծու առաջնորդությունը մեր օրերում։

 ԱՄՓՈՓՈՒՄ

Կառավարիչ մարմինը Քրիստոսի կողմից նշանակված «հավատարիմ ու իմաստուն ծառան» է։ Այն առաջնորդություն և հոգևոր կերակուր է տալիս բոլոր ճշմարիտ քրիստոնյաներին։

Վերհիշենք

• Ո՞վ է նշանակել «հավատարիմ և իմաստուն ծառային»։

• Կառավարիչ մարմինը ինչպե՞ս է հոգ տանում մեր մասին։

• Հավատո՞ւմ ես, որ Կառավարիչ մարմինը «հավատարիմ և իմաստուն ծառան» է։