Magbantala Agod Makahimo sing mga Disipulo

“Sang mabatian ni Priscila kag ni Aquila [si Apolos], ginpaupod nila sia sa ila kag ginpaathag sa iya ang dalan sang Dios sing mas husto.”​—⁠BINUHATAN 18:26.

1. (a) Bisan pa “mainit sa espiritu” si Apolos, ano ang kulang sa iya? (b) Ano ang kinahanglan ni Apolos agod mapun-an ang iya kakulangan sa espirituwal?

NAKITA nanday Priscila kag Aquila, isa ka Cristianong mag-asawa sang unang siglo, si Apolos nga nagapamulongpulong sa sinagoga sa siudad sang Efeso. Paagi sa iya talunsay nga mga pulong kag ikasarang sa pagbuyok, nakuha ni Apolos ang atension sang iya mga tagpalamati. “Mainit [sia] sa espiritu,” kag “nagtudlo sing husto sang mga butang tuhoy kay Jesus.” Apang, maathag nga ‘ang bawtismo lamang ni Juan ang nahibaluan’ ni Apolos. Ang ginbantala ni Apolos tuhoy kay Cristo matuod apang limitado lamang. Ang problema amo nga ang iya ihibalo tuhoy kay Cristo kulang. Dapat dugangan ni Apolos ang iya ihibalo tuhoy sa papel ni Jesucristo sa katumanan sang katuyuan ni Jehova.​—⁠Binuhatan 18:24-​26.

2. Anong mabudlay nga hilikuton ang ginbaton nanday Priscila kag Aquila?

² Wala sing pangalag-ag nga ginbuligan  nanday Priscila kag Aquila si Apolos nga mangin isa nga makatuman sang “tanan nga butang” nga ginsugo ni Cristo. (Mateo 28:​19, 20) Ang kasaysayan nagasiling nga ‘ginpaupod nila si Apolos sa ila kag ginpaathag sa iya ang dalan sang Dios sing mas husto.’ Apang, may mga butang tuhoy kay Apolos nga bangod sini nagpangalag-ag ang iban nga mga Cristiano nga tudluan sia. Ano ini? Kag ano ang matun-an naton gikan sa mga panikasog nanday Priscila kag Aquila nga binagbinagon ang Kasulatan upod kay Apolos? Paano ang pagrepaso sa sining maragtason nga hitabo makabulig sa aton nga hatagan sing igtalupangod ang pagsugod sing mga pagtuon sa Biblia sa puluy-an?

Hatagi sing Igtalupangod ang mga Tawo

3. Ngaa ang ginhalinan ni Apolos wala magpugong kanday Priscila kag Aquila nga tudluan sia?

³ Bangod kaliwat sang mga Judiyo, mahimo nga nagdaku si Apolos sa siudad sang Alexandria. Ang Alexandria amo sadto ang kapital sang Egipto kag sentro sang mataas nga tinun-an, kag bantog bangod sang daku nga librarya sini. Ang siudad may madamo nga Judiyong populasyon, lakip na ang mga iskolar. Busa, ang Griegong badbad sang Hebreong Kasulatan nga kilala nga Septuagint ginhimo didto. Indi katingalahan nga si Apolos “batid sa Kasulatan”! Sanday Aquila kag Priscila mga manughimo sing tolda. Kinulbaan bala sila bangod talunsay maghambal si Apolos? Wala. Bangod sang gugma gintalupangod nila si Apolos, ang iya mga kinahanglanon, kag kon paano nila sia mabuligan.

4. Diin kag paano nabaton ni Apolos ang bulig nga iya ginkinahanglan?

⁴ Bisan daw ano man ka talunsay si Apolos, nagkinahanglan sia sing instruksion. Ang kinahanglan niya nga bulig indi masapwan sa bisan diin nga unibersidad kundi masapwan sa tunga sang mga katapo sang Cristianong kongregasyon. Makabenepisyo si Apolos gikan sa mga punto nga magaresulta sa sibu pa nga paghangop tuhoy sa kahimusan sang Dios para sa kaluwasan. ‘Ginpaupod sia nanday Priscila kag Aquila sa ila kag ginpaathag sa iya ang dalan sang Dios sing mas husto.’

5. Ano ang imo masiling tuhoy sa espirituwalidad nanday Priscila kag Aquila?

⁵ Sanday Priscila kag Aquila mabakod sa espirituwal kag malig-on sa pagtuo. Mahimo gid nga ‘handa sila pirme sa pagpangapin sa tagsa nga nagapangayo sing pangatarungan tuhoy sa ila paglaum,’ ini man nga tawo manggaranon, imol, iskolar, ukon ulipon. (1 Pedro 3:15) Si Aquila kag ang iya asawa ‘naggamit sing matadlong sang pulong sang kamatuoran.’ (2 Timoteo 2:15) Maathag nga sinsero sila nga mga estudyante sang Kasulatan. Natandog gid si Apolos sa instruksion nga napasad sa ‘pulong sang Dios, nga buhi kag gamhanan,’ nga nagaapektar sa tagipusuon.​—⁠Hebreo 4:12.

6. Paano naton mahibaluan nga gin-apresyar gid ni Apolos ang bulig nga iya nabaton?

⁶ Gin-apresyar ni Apolos ang halimbawa sang iya mga manunudlo kag nangin lantip pa gid sia sa paghimo sing mga disipulo. Gingamit niya sing epektibo ang iya ihibalo sa hilikuton nga pagbantala sing maayong balita, ilabi na sa tunga sang mga Judiyo. Nakabulig gid si Apolos sa pagbuyok sa mga Judiyo nga magtuo kay Cristo. ‘Bangod sampaton sa Kasulatan,’ napamatud-an niya sa ila nga ang tanan nga mga manalagna sang una nagpaabot sa pagkari ni Cristo. (Binuhatan 18:​24, Kingdom Interlinear Translation) Nagsiling pa ang rekord nga masunod nga nagkadto si Apolos sa Acaya, diin “nakabulig sia sing daku sa mga nagpati tungod sa di-bagay nga kaayo sang Dios; kay sa mabaskog nga paagi bug-os nga ginpamatud-an niya sing dayag nga sayop ang mga Judiyo, samtang ginapakita niya paagi sa Kasulatan nga si Jesus amo ang Cristo.”​—⁠Binuhatan 18:​27, 28.

Magtuon Gikan sa Halimbawa sang Iban nga mga Manunudlo

7. Paano sanday Aquila kag Priscila nangin malantipon nga mga manunudlo?

⁷ Paano sanday Aquila kag Priscila nangin maayo gid nga mga manunudlo sang Pulong sang Dios? Magluwas sang ila kaukod sa personal nga pagtuon kag pagtambong sa mga miting, ang ila suod nga pagpakig-upod kay apostol Pablo mahimo nga nakabulig sing daku. Nag-istar si Pablo sa puluy-an nanday Priscila kag Aquila sa Corinto sa sulod sang 18 ka bulan. Magkaupod sila nga nagtrabaho sa paghimo kag pagkay-o sing mga tolda. (Binuhatan 18:​2, 3) Handurawa lamang ang natabo nga madalom nga mga paghambalanay tuhoy sa Kasulatan. Kag ini nga pagpakig-upod kay  Pablo nagpauswag gid sang ila espirituwalidad! “Sia nga nagalakat upod sa maalam nga mga tawo magaalam,” siling sang Hulubaton 13:20. Ang maayo nga pagpakig-upod may maayo nga epekto sa ila kinabatasan sa espirituwal.​—⁠1 Corinto 15:33.

8. Ano ang natun-an nanday Priscila kag Aquila gikan sa pagpanilag kay Pablo sa iya ministeryo?

⁸ Sang ginpanilagan nanday Priscila kag Aquila si Pablo subong isa ka manugbantala sang Ginharian, nakita nila ang isa ka maayo gid nga halimbawa sang isa ka maayo nga manunudlo. Ang rekord sa Binuhatan nagasiling nga si Pablo “naghatag sing pamulongpulong sa sinagoga [sa Corinto] sa tagsa ka adlaw nga inugpahuway kag nagbuyok sa mga Judiyo kag mga Griego.” Sang ulihi, sang nagbuylog sa iya si Silas kag si Timoteo, “si Pablo nagsugod nga mangin masako kaayo sa pulong, nga nagapanaksi sa mga Judiyo agod pamatud-an nga si Jesus amo ang Cristo.” Sang halos wala sing interesado sa mga katapo sang sinagoga, nakita nanday Priscila kag Aquila nga ginsaylo ni Pablo ang sentro sang iya pagbantala nga hilikuton sa mas paborable nga lokasyon, sa isa ka balay sa tupad sang sinagoga. Nabuligan didto ni Pablo si Crispo, “ang nagadumala nga opisyal sa sinagoga,” nga mangin isa ka disipulo. Mahimo gid nga natalupangdan nanday Priscila kag Aquila nga ang paghimo sa sining isa ka disipulo may daku kag mabungahon nga epekto sa teritoryo. Ang kasaysayan nagsiling: “Si Crispo . . . nangin isa ka tumuluo sa Ginuo, kag subong man ang iya bug-os nga panimalay. Kag madamo sang mga taga-Corinto nga nakabati ang nagtuo kag nabawtismuhan.”​—⁠Binuhatan 18:4-8.

9. Ano ang reaksion nanday Priscila kag Aquila sa halimbawa ni Pablo?

⁹ Ang halimbawa ni Pablo sa ministeryo sa latagon gin-ilog sang iban nga mga manugbantala sang Ginharian, subong nanday Priscila kag Aquila. Ginlaygayan sang apostol ang iban nga mga Cristiano: “Mangin mga manug-ilog kamo sa akon, subong nga ako man kay Cristo.” (1 Corinto 11:1) Nahisanto sa halimbawa ni Pablo, ginbuligan nanday Priscila kag Aquila si Apolos nga mahangpan sing mas husto ang Cristianong mga panudlo. Kag ginbuligan man ni Apolos ang iban. Wala sing duhaduha nga nagbulig man sanday Priscila kag Aquila sa paghimo sing mga disipulo sa Roma, Corinto, kag Efeso.​—⁠Binuhatan 18:​1, 2, 18, 19; Roma 16:​3-5.

10. Ano ang imo natun-an gikan sa Binuhatan kapitulo 18 nga makabulig sa imo sa paghimo-disipulo nga hilikuton?

¹⁰ Ano ang matun-an naton gikan sa pagbinagbinag sa Binuhatan kapitulo 18? Bueno, subong nga sanday Aquila kag Priscila nakatuon gikan kay Pablo, mapauswag naton ang aton ikasarang sa paghimo sing mga disipulo paagi sa pagsunod sa halimbawa sang maayo nga mga manunudlo sang Pulong sang Dios. Makapakig-upod kita sa mga “masako kaayo sa pulong” kag sa mga “nagapanaksi sing maid-id” sa iban. (Binuhatan 18:⁠5, Kingdom Interlinear Translation) Mapanilagan naton kon paano nila ginalab-ot ang tagipusuon sang mga tawo paagi sa paggamit sing makabuluyok nga kalantip sa pagpanudlo. Ini nga mga kalantip makabulig sa aton sa paghimo sing mga disipulo. Kon ang isa ka tawo nagatuon sing Biblia upod sa aton, mahimo kita makapanugda nga  agdahon niya ang iban pa nga mga katapo sang iya pamilya ukon mga kaingod nga magbuylog sa pagtuon. Ukon mahimo naton sia pangabayon nga pahibaluon kita tuhoy sa iban nga mahimo naton matanyagan sing pagtuon sa Biblia.​—⁠Binuhatan 18:​6-8.

Maghimo sing mga Kahigayunan nga Makahimo sing mga Disipulo

11. Diin masapwan ang bag-o nga mga disipulo?

¹¹ Si Pablo kag ang iya mga masigka-Cristiano nagtinguha sa paghimo sing mga disipulo paagi sa pagbantala sa mga pamalay, sa tiendahan, kag samtang nagalakbay​—⁠sa pagkamatuod, bisan diin. Subong isa ka makugi nga manugbantala sang Ginharian nga nagatinguha sa paghimo sing mga disipulo, mapasangkad mo bala ang imo hilikuton nga pag-alagad sa latagon? Makalitan mo bala ang mga kahigayunan agod pangitaon ang mga takus kag bantalaan sila? Ano ang pila ka paagi nga ang aton mga masigkamanugbantala sing maayong balita nakasapo sing mga disipulo? Binagbinagon naton anay ang patag sang pagpanaksi paagi sa telepono.

12-14. Agod ipakita ang mga benepisyo sang pagpanaksi sa telepono, isaysay ang imo kaugalingon nga eksperiensia ukon ang isa nga makita sa sini nga mga parapo.

¹² Samtang nagapanaksi sa mga pamalay sa Brazil, isa ka Cristiano nga tawgon naton nga Maria ang naghatag sing isa ka tract sa isa ka lamharon nga babayi nga manughalin na sa apartment. Naggamit sing tig-ulo sang tract bilang introduksion, namangkot si Maria, “Luyag mo bala madugangan ang imo nahibaluan sa Biblia?” Ang babayi nagsabat: “Huo. Ang problema amo nga isa ako ka maestra kag ang pagtudlo nagaubos sang akon tion.” Ginpaathag ni Maria nga mahimo nila binagbinagon ang mga topiko sa Biblia paagi sa telepono. Ginhatag sang babayi kay Maria ang iya numero sang telepono, kag sadto mismo nga gab⁠-i, nasugdan niya ang isa ka pagtuon paagi sa telepono nga ginagamit ang brosyur nga Ano ang Ginapatuman Sang Dios sa Aton? *

¹³ Samtang nagapanaksi paagi sa telepono, isa ka bug-os tion nga ministro sa Etiopia ang nakibot sang nahambal niya ang isa ka lalaki apang may nabatian nga gahod. Ginpangabay sia sang lalaki nga magtawag na lang liwat. Sang nagtawag sia, nangayo sing pasensia ang lalaki kag nagsiling nga sa una niya nga tawag, nagaaway sila sang iya asawa. Gingamit sang utod nga babayi ang ginsiling sang lalaki subong isa ka kahigayunan agod ipakita ang maalamon nga panuytoy sang Biblia sa pag-atubang sa mga problema sa pamilya. Ginsilingan niya ang lalaki nga madamo nga pamilya ang nabuligan sang Ang Sekreto Sang Kalipay sa Pamilya, isa ka libro nga ginbalhag sang mga Saksi ni Jehova. Pagligad sang pila ka adlaw sa tapos madul-ong ang libro, gintawgan niya liwat ang lalaki. Nagsiling ang lalaki: “Ginsalbar sini nga libro ang amon pag-asawahay!” Sa katunayan, gintipon niya ang iya pamilya agod mapaambit ang maayo nga mga punto nga nabasa niya sa libro. Nasugdan ang isa ka pagtuon sa Biblia, kag wala madugayi nagsugod sa pagtambong sing regular ang lalaki sa Cristianong mga miting.

¹⁴ Isa ka manugbantala sang Ginharian sa Denmark nga nakasugod sing isa ka pagtuon sa Biblia paagi sa pagpanaksi sa telepono ang nagsiling: “Ginpalig-on ako sang manugtatap sa pag-alagad nga makigbahin sa pagpanaksi sa telepono. Sang  primero nangalag-ag ako, nga nagasiling: ‘Indi ko ini gusto.’ Apang, isa ka adlaw nangisog ako kag gintawgan ang una nga tagbalay. Si Sonja ang nagsabat kag, pagkatapos sang malip-ot nga paghambalanay, nagpasugot sia nga magbaton sing isa ka literatura pasad sa Biblia. Isa ka gab-i ginbinagbinag namon ang topiko tuhoy sa pagpanuga, kag luyag niya magbasa sing Life​​—⁠How Did It Get Here? By Evolution or by Creation.⁠ * Nagsiling ako nga maayo kon magkitaay kami kag binagbinagon ang topiko. Nagpasugot sia. Handa na si Sonja para sa pagtuon sang mag-abot ako, kag nagtuon kami kada semana sugod sadto.” Ang aton Cristianong utod nga babayi naghinakop: “Sa sulod sang madamo nga tuig nangamuyo ako nga makakita sing isa ka pagtuon sa Biblia, apang wala ko ginpaabot nga makatigayon ako sing isa paagi sa pagpanaksi sa telepono.”

15, 16. Ano nga mga eksperiensia ang imo masugid agod ipakita ang benepisyo sang pagkaalisto sa nagkalainlain nga paagi sa pagsugod sing mga pagtuon sa Biblia?

¹⁵ Madamo ang nagmadinalag-on bangod sang pag-aplikar sa mga panugda nga magpanaksi sa mga tawo bisan diin man sila. Isa ka Cristianong babayi sa Estados Unidos ang nagparada sang iya salakyan sa tupad sang isa ka pangpasahero nga van sa paradahan. Sang nakita sia sang babayi sa van, ginpaathag sang utod nga babayi kon paano naton ginahimo ang pagtuon sa Biblia. Namati ang babayi, nanaug sa van, kag nagsakay sa salakyan sang utod. Nagsiling sia: “Nalipay gid ako nga nagdulog ka kag nakighambal sa akon. Madugay na nga wala ako makabaton sing bisan ano nga literatura ninyo sa Biblia. Isa pa, luyag ko nga magtuon liwat sa Biblia. Mahimo mo bala ako matun-an?” Sa amo, nakahimo ang aton utod nga babayi sing maayo nga kahimtangan sa pagpaambit sing maayong balita.

¹⁶ Ang masunod amo ang eksperiensia sang isa ka utod nga babayi sa Estados Unidos sang ginduaw niya ang isa ka balay-alatipanan: Ginpalapitan niya ang direktor sang mga aktibidades sa pasilidad kag ginsilingan niya sia nga luyag niya magboluntaryo agod makabulig sa pagpaayaw sa espirituwal nga mga kinahanglanon sang mga residente. Nagsiling pa ang aton utod nga nalipay sia sa pagdumala sing semanal nga pagtuon sa Biblia nga wala sing bayad sa tanan nga luyag magtambong. Gintugutan sia sang direktor nga duawon ang mga kuarto sang mga residente. Wala magdugay, nagdumala sia sing pagtuon sa Biblia sing tatlo ka beses sa isa ka semana sa 26 tanan ka residente, nga ang isa sa ila nagatambong sing regular sa mga miting.

17. Ano nga paagi ang masami nga epektibo sa pagsugod sing mga pagtuon sa Biblia?

¹⁷ Para sa iban nga mga manugbantala sang Ginharian, ang direkta nga pagtanyag sing pagtuon sa Biblia may maayo nga mga resulta. Isa ka aga, ang isa ka kongregasyon nga may 105 ka manugbantala naghimo sing pinasahi nga panikasog sa pagtanyag sing pagtuon sa Biblia sa tagsa ka tagbalay nga ila masugilanon. Otsentay-seis ka manugbantala ang nakigbahin sa pag-alagad sa latagon, kag sa tapos makahinguyang sing duha ka oras sa pagbantala, sa di-magkubos 15 ka bag-o nga pagtuon sa Biblia ang nasugdan.

Padayon nga Pangitaa ang mga Takus

18, 19. Anong importante nga sugo ni Jesus ang dapat naton dumdumon, kag agod matuman ini, ano ang determinado naton nga himuon?

¹⁸ Subong isa ka manugbantala sang Ginharian, mahimo nga luyag mo tilawan ang mga panugda nga ginsambit sa sini nga artikulo. Sa pagkamatuod, maalamon nga binagbinagon mo ang lokal nga mga kinabatasan kon nagabinagbinag sing mga pamaagi sa pagpanaksi. Labaw sa tanan, dumdumon naton ang sugo ni Jesus nga pangitaon ang mga takus kag buligan  sila nga mangin mga disipulo.​—⁠Mateo 10:11; 28:19.

¹⁹ Agod matuman ini, kabay nga ‘gamiton naton sing matadlong ang pulong sang kamatuoran.’ Mahimo naton ini paagi sa paggamit sing pagbuyok nga napasad sing malig-on sa Kasulatan. Magabulig ini sa aton nga matandog ang tagipusuon sang mga mabinatunon kag mapahulag sila nga manghikot. Samtang mapinangamuyuon kita nga nagasandig kay Jehova, mabuligan naton ang iban nga mangin mga disipulo ni Jesucristo. Kag makalilipay gid ini nga hilikuton! Busa, ‘himuon naton ang aton bug-os nga masarangan nga ipakita ang aton kaugalingon nga nahamut-an sang Dios,’ nga nagapadungog pirme kay Jehova subong makugi nga mga manugbantala sang Ginharian, nga nagabantala agod maghimo sing mga disipulo.​—⁠2 Timoteo 2:⁠15.

[Mga nota]

Madumduman Mo Bala?

• Ngaa kinahanglan nga ipaathag sing labi pa kay Apolos ang dalan sang Dios?

• Sa ano nga mga paagi nakatuon sanday Priscila kag Aquila kay apostol Pablo?

• Ano ang natun-an mo gikan sa Binuhatan kapitulo 18 tuhoy sa paghimo-disipulo nga hilikuton?

• Paano ka makahimo sing mga kahigayunan sa paghimo sing mga disipulo?

[Mga Pamangkot sa Pagtinuon]

[Retrato sa pahina 18]

Sanday Priscila kag Aquila ‘nagpaathag sang dalan sang Dios sing mas husto’ kay Apolos

[Retrato sa pahina 20]

Si Apolos nangin lantip sa paghimo sing mga disipulo

[Retrato sa pahina 21]

Si Pablo nagbantala bisan diin sia nagkadto

[Retrato sa pahina 23]

Maghimo sing mga kahigayunan nga makabantala