Kay Sin-o mga Talaksan ang Imo Masaligan?

Ang isa ka dumuluaw sa Aprika sa nahauna nga tion natingala sang makita niya ang isa ka tawo nga nagatindog sing tiso sa higad sang dalan. Natalupangdan niya nga kada pila ka minuto, ginasagadsad sang tawo ang iya mga tiil kag nagaidog diutay sa isa ka kilid samtang nagatindog gihapon sing tiso. Ulihi na lang nahangpan sang dumuluaw kon ngaa nagaidog ang tawo sang subong sa ginhimo niya. Sa katunayan, ginatinguhaan niya nga mahandungan gihapon sang poste sang telegrapo. Ang landong nagaidog sing hinay samtang ang adlaw sa kahapunanon nagabag-o sing posisyon.

KAANGAY sinang landong nga tuga sang adlaw, ang mga hilikuton kag mga talaksan sang tawo padayon nga nagabalhin kag nagabag-o. Sa kabaliskaran, si Jehova nga Dios, ang “Amay sang langitnon nga mga kapawa,” wala nagabulubag-o. “Sa iya,” sulat ni disipulo Santiago, “walay pagliwanliwan subong sang pagbalhin sang landong.” (Santiago 1:17) Ang Hebreong manalagna nga si Malaquias nagrekord sang kapahayagan mismo sang Dios: “Ako si Jehova; wala ako nagabag-o.” (Malaquias 3:6) Sa pungsod sang Israel sang panahon ni Isaias, ang Dios nagsiling: “Bisan tubtob sa katigulangon sang isa ako amo gihapon inang Isa; kag tubtob sa pagkaubanon sang isa padayon ako nga magapas-an. Magapanghikot gid ako.” (Isaias 46:4) Busa, ang paglipas sang tion wala nagapabag-o sang aton pagsalig sa mga saad sang Labing Gamhanan.

Isa ka Leksion Gikan sa Kasuguan

Subong nga ang mga saad ni Jehova masaligan kag wala nagabulubag-o, amo man ang iya mga talaksan tuhoy sa husto kag sayop. Saligan mo bala ang isa ka negosyante nga may  duha ka timbangan, nga isa lamang ang husto? Indi gid. Sing kaanggid, “ang madaya nga pares sang timbangan kalangil-aran kay Jehova, apang ang eksakto nga bato nga pangtimbang kalahamut-an sa iya.” (Hulubaton 11:⁠1; 20:10) Sa Kasuguan nga ginhatag niya sa mga Israelinhon, ginlakip ni Jehova ini nga sugo: “Indi kamo maghimo sing di-matarong sa paghukom, sa pagtakus, sa pagtimbang ukon sa pagtakus sa mga likido. Dapat may yara kamo husto nga timbangan, husto nga mga pangtimbang, husto nga efa kag husto nga hin. Ako si Jehova nga inyo Dios, nga nagpaguwa sa inyo gikan sa duta sang Egipto.”​—⁠Levitico 19:​35, 36.

Ang pagtuman sa sina nga sugo nagresulta sa kahamuot sang Dios kag madamong materyal man nga benepisyo sa mga Israelinhon. Sing kaanggid, ang pagsunod sa wala nagabag-o nga mga talaksan ni Jehova, indi lamang sa mga timbangan kag mga takus kundi sa tanan nga bahin sang kabuhi, nagaresulta sa mga pagpakamaayo para sa sumilimba nga nagasalig sa iya. Ang Dios nagasiling: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga dapat mo laktan.”​—⁠Isaias 48:17.

Ngaa Naganubo Karon ang mga Talaksan?

Ginapatalupangod sang Biblia ang rason sa pagnubo karon sang mga talaksan. Ang katapusan nga tulun-an sang Biblia, ang Bugna, nagalaragway sang isa ka inaway sa langit, nga ang resulta sini nag-apektar sa tanan nga tawo tubtob karon. Si apostol Juan nagsulat: “Nagdabdab ang inaway sa langit: Si Miguel kag ang iya mga anghel nagpakig-away batok sa dragon, kag ang dragon kag ang mga anghel sini nagpakig-away apang wala ini magdaug, ni may nakita pa nga duog para sa ila sa langit. Gani gintagbong ang daku nga dragon, ang orihinal nga man-ug, ang ginatawag nga Yawa kag Satanas, nga nagapatalang sa bug-os napuy-an nga duta; gintagbong sia sa duta, kag ang iya mga anghel gintagbong upod sa iya.”​—⁠Bugna 12:7-9.

Ano ang gilayon nga resulta sadto nga inaway? Si Juan nagpadayon: “Bangod sini magkalipay, kamo nga mga langit kag kamo nga nagapuyo sa sini! Kailo para sa duta kag para sa dagat, kay ang Yawa nagpanaug sa inyo nga may daku nga kaakig, kay nahibaluan niya nga diutay na lang ang iya tion nga nabilin.”​—⁠Bugna 12:12.

Ang “kailo para sa duta” natabo sang nagdabdab ang Bug-os Kalibutan nga Inaway I sang 1914 kag nagtapos sang dag-on sang mga talaksan nga tuhay gid sa karon. “Ang Dakung Inaway sang 1914-18 kaangay sa isa ka dulunan nga nagatunga sadtong tion gikan sa aton tion,” siling sang istoryador nga si Barbara Tuchman. “Ang pagpapas sa madamo kaayo nga kabuhi nga nangin mapuslanon kag mapatubason kuntani sa masunod nga tinuig, ang paglaglag sa pagtuluuhan, pagbag-o sa mga ideya, kag pagbilin sing di-mabulong nga mga pilas sang kabang-awan, nagtuga sing daku nga pisikal kag sikolohiko nga kal-ang sa ulot sang duha ka panag-on.” Ang isa pa ka istoryador nga si Eric Hobsbawm nag-ugyon: “May yara, kutob sang 1914, daku nga pag-usmod gikan sa mga talaksan nga ginkabig anay nga normal sa imol nga mga pungsod . . . Indi mahapos hangpon ang kasangkaron sang, makapasubo nga nagadasig, pagpanumbalik sang ginatawag sang aton mga katigulangan  sang ika-19 nga siglo nga mga talaksan sang barbarismo.”

Sa iya libro nga Humanity​​—⁠A Moral History of the Twentieth Century, ang awtor nga si Jonathan Glover nagsiling: “Ang isa ka kinaiya sang aton tion amo ang pagkadula sang kasuguan sa moral.” Bisan pa nagaduhaduha sia sa kasuguan sa moral nga gikan sa guwa bangod sang pag-usmod sang relihion sa Nakatundan nga kalibutan, nagpaandam sia: “Ang mga wala nagapati sa aton sa relihioso nga moral nga kasuguan dapat mahangawa gihapon sa pagkadula sini.”

Ang pagkaguba sang pagsalig karon​—⁠sa negosyo man, politika, ukon relihion ukon sa personal kag sa pamilya nga mga kaangtanan pa gani​—⁠kag ang makakulugmat nga mga resulta sini bahin sang malaut nga pahito sang Yawa sa pagdala sing kailo sa mga pumuluyo sang duta. Determinado si Satanas nga makig-away tubtob sa katapusan kag determinado nga laglagon upod sa iya ang tanan nga nagapanikasog sa pagkabuhi suno sa mga talaksan sang Dios.​—⁠Bugna 12:17.

May yara bala paaliwansan, ukon solusyon sa daku kaayo nga pagkaguba sing pagsalig? Si apostol Pedro nagsabat: “Nagahulat kita sing bag-ong mga langit kag bag-ong duta suno sa saad [sang Dios], kag sa sini magapuyo ang pagkamatarong.” (2 Pedro 3:13) Masaligan gid naton ina nga saad bangod indi lamang nga may gahom ang Dios sa pagtuman sang iya katuyuan kundi ginagarantiyahan man niya ang katumanan sini. Nahanungod sa ‘bisan anong pulong nga nagaguwa sa iya baba’ si Jehova nagsiling: “Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga tungod sini ginpadala ko ini.” Masaligan gid nga saad!​—⁠Isaias 55:11; Bugna 21:​4, 5.

Pagkabuhi Suno sa mga Talaksan Sang Dios

Sa isa ka kalibutan nga may nagabulubag-o kag nagausmod nga mga talaksan, ang mga Saksi ni Jehova nagapanikasog sa pagkabuhi suno sa mga talaksan sang paggawi nga ginahatag sang Biblia. Subong resulta, tuhay sila sa kadamuan, kag masunson nga nagganyat ini sang igtalupangod​—⁠kag pagyaguta​—⁠sang iban.

Sa isa ka kombension sang mga Saksi ni Jehova sa London, ginpamangkot sang isa ka reporter sa TV ang isa ka humalambal kon bala ang mga Saksi ni Jehova matuod nga mga Cristiano. Sia nagsabat: “Huo, matuod gid kami nga mga Cristiano bangod si Jesus ang amon huwaran. May yara daku nga kakagod sa kalibutan, kag ginasentro namon ang amon igtalupangod kay Jesucristo subong ang dalan, ang kamatuoran, kag ang kabuhi. Nagatuo kami nga sia ang Anak sang Dios, indi nga isa ka bahin sang Trinidad, gani ang amon paghangop sa Biblia tuhay gikan sa iya sang naandan na nga relihion.”

Sang ginpalayag ang interbyu sa BBC nga telebisyon, ginhinakpan sang reporter ang programa paagi sa pagsiling: “Madamo ako sing nahibaluan kon ngaa ang mga Saksi ni Jehova nagapanuktok sa aton puluy-an. Kag sa banta ko, wala pa ako sing nakita nga 25,000 ka tawo nga nagapanapot kag nagagawi sing maayo gid sa isa lamang ka duog sa isa ka tion.” Maayo gid nga pamatuod gikan sa tagaguwa nga manugpanilag sa kaalam sang pagsunod sa wala nagabag-o nga mga talaksan sang Dios!

Bisan pa mahimo nga sikwayon sang iban ang ideya nga magkabuhi suno sa mga talaksan nga wala nila ginpahamtang, ginapalig-on namon kamo nga tan-awon sa inyo Biblia kag tun-an ang mga talaksan sang Dios. Apang indi lamang mangin kontento sa pahapyaw nga pag-usisa. Sunda ang laygay ni apostol Pablo: “Indi na kamo magpadihon suno sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) Magkadto sa Kingdom Hall sa inyo duog, kag kilalaha ang mga Saksi didto. Masapwan mo nga kinaandan sila nga mga tawo nga nagasalig sa mga saad sang Biblia kag nagapakita sang ila pagsalig sa Dios paagi sa pagtinguha nga magkabuhi suno sa iya mga talaksan.

Ang pagsunod sa wala nagabag-o kag masaligan nga mga talaksan sang Dios sa imo kabuhi magadala gid sa imo sing mga pagpakamaayo. Pamatii ang pangagda sang Dios mismo: “O kon talupangdon mo lamang ang akon mga sugo! Nian ang imo paghidait mangin subong sang suba, kag ang imo pagkamatarong subong sang mga balod sang dagat.”​—⁠Isaias 48:18.

[Mga retrato sa pahina 5]

Sa karon, naguba ang pagsalig sa negosyo, politika, relihion, kag mga kaangtanan sa pamilya