Ang Pagtamod sang Biblia

Nagaulikid Gid Bala ang Dios sa mga Kabataan?

GINATOS ka milyon ka kabataan ang ginahimuslan, ginaabusuhan, kag masingki nga ginaatake kada tuig. Madamo ang nagapangabudlay subong nga daw mga ulipon sa makatalagam nga mga kahimtangan. Ang iban ginkidnap kag ginpilit nga mangin mga soldado ukon mga pampam. Ang pagsalig sang madamo nga kabataan naguba pa gid sang incesto kag sang iban pa nga makangilil-ad nga mga buhat sang pag-abuso sa bata.

Mahangpan kon ngaa ang sinsero kag mainulikdon nga mga indibiduwal nabalaka sa kahimtangan sang kabataan. Samtang nagabaton nga ang tawhanon nga kakagod kag kagarukan amo ang panguna nga kabangdanan sining indi maayo nga pagtratar, mahimo nga nabudlayan gihapon ang pila sa pagbaton nga ginatugutan sang isa ka mahigugmaon nga Dios ini nga inhustisya. Mahimo nagabatyag sila nga ginbayaan sang Dios ining kabataan kag basi wala gid sia nagaulikid sa ila. Matuod bala ini? Ang makahalanusbo bala nga kamatuoran nga ang kabataan ginahimuslan kag masami nga ginaabusuhan nagakahulugan nga ang Dios wala nagaulikid sa ila? Ano ang ginasiling sang Biblia?

Ginapakamalaut sang Dios ang mga Manug-abuso

Wala gid gintuyo ni Jehova nga Dios nga ang kabataan abusuhan sang mapintas nga mga adulto. Ang pag-abuso sa kabataan isa sa labing makahalanusbo  nga mga resulta sang pagrebelde sang katawhan sa hardin sang Eden. Ining pagsikway sa pagkasoberano sang Dios nagdul-ong sa mapintas nga pag-abuso sang mga tawo sa ila isigkatawo.​—⁠Genesis 3:​11-​13, 16; Manugwali 8:9.

Ginakangil-aran sang Dios ang mga nagahimulos sang mga maluya kag sang wala sing mahimo. Madamo sang dumaan nga mga pungsod nga wala nagaalagad kay Jehova ang nagahalad sang kabataan, apang si Jehova nagsiling nga ini ‘isa ka butang nga wala niya ginsugo kag wala gani magtuhaw sa iya tagipusuon.’ (Jeremias 7:31) Ang Dios nagpaandam sa iya dumaan nga katawhan: “Kon inyo paantuson [ang ilo nga bata nga lalaki], nian kon sia magtuaw sa akon, wala sing duhaduha nga pamatian ko ang iya pagtuaw; kag magadabdab gid ang akon kasingkal.”​​—⁠Exodo 22:​22-​24.

Ginahigugma ni Jehova ang Kabataan

Ang kabalaka sang Dios sa kabataan maathag sa maalamon nga mga instruksion nga ginhatag niya sa tawhanon nga mga ginikanan. Ang kabataan nga ginpadaku sa isa ka malig-on nga puluy-an posible nga mangin hamtong kag mapasibusibuon gid nga mga adulto. Sa amo, ang aton Manunuga nagpatok sang pag-asawahay, isa ka tubtob buhi nga kahimusan diin “bayaan sang lalaki ang iya amay kag ang iya iloy kag magahiusa sia sa iya asawa kag sila mangin isa ka unod.” (Genesis 2:24) Sa Biblia, ang seksuwal nga kaangtanan ginatugot lamang sa sulod sang kahimusan sa pag-asawahay agod ang mangin anak maatipan sa isa ka malig-on nga palibot.​—⁠Hebreo 13:4.

Ginapadaku man sang Kasulatan ang importansia sang paghanas sang ginikanan. “Ang mga anak palanublion gikan kay Jehova,” siling sang Biblia, “ang bunga sang tiyan isa ka padya. Kaangay sang mga baslay sa kamot sang gamhanan nga tawo, amo man ang mga anak nga lalaki sang pagkapamatan-on.” (Salmo 127:​3, 4) Ang kabataan isa ka hamili nga dulot gikan sa Dios, kag luyag niya nga mag-uswag sila. Ginapalig-on sang Dios ang mga ginikanan nga hatagan sing maayo nga direksion sa kabuhi ang ila kabataan, subong nga ang isa ka manugpana nagapuntariya sing maayo antes buy-an ang iya mga baslay. “Mga amay,” sugo sang Pulong sang Dios, “dili ninyo pagpaakiga ang inyo mga anak, kundi padayon sila nga padakua sa disiplina kag sa nagatadlong nga panghunahuna ni Jehova.”​—⁠Efeso 6:4.

Ang isa pa ka paagi nga ginpakita ni Jehova ang iya gugma sa kabataan amo ang pagtudlo sa mga ginikanan nga amligan ang ila kabataan gikan sa malaut nga mga tawo. Sa dumaan nga Israel, bisan ang “magagmay nga mga bata” ginsugo nga mamati sa Kasuguan, diin nalakip ang paghibalo sing nagakaigo kag di-nagakaigo nga paggawi sa sekso. (Deuteronomio 31:12; Levitico 18:​6-​24) Luyag sang Dios nga himuon sang mga ginikanan ang tanan agod amligan ang ila kabataan gikan kay bisan sin-o nga mahimo maghimulos ukon mag-abuso sa ila.

Paglaum Para sa Kabataan

Ang mainunungon nga gugma ni Jehova sa kabataan ginpasundayag sing maayo ni Jesucristo, nga himpit nga nagpabanaag sang personalidad sang iya Amay. (Juan 5:19) Sang ang iya mga apostoles, nga nagtinguha sing sayop sa pagbulig kay Jesus, nagdumili nga dalhon sang mga ginikanan ang ila magagmay nga mga bata sa iya, maakigon nga gintadlong sila ni Jesus. “Pabay-i ninyo ang mga bata nga magpalapit sa akon,” siling niya. Kag nian, “ginkugos niya ang mga bata kag ginpakamaayo sila.” (Marcos 10:​13-​16) Ang kabataan indi walay pulos sa panulok ni Jehova nga Dios ukon sang iya Anak.

Ang matuod, paagi sa iya gintangdo nga Hari, si Jesucristo, magahulag ang Dios sa dili madugay agod pauntaton ang pag-abuso sa kabataan. Ang makagod nga mga manughimulos kag ang mapintas nga mga manug-abuso sa sining kalibutan pagadulaon sing dayon. (Salmo 37:​10, 11) Kon tuhoy sa mga mapainubuson nga nagapangita kay Jehova, ang Biblia nagasiling: “Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—⁠Bugna 21:​3, 4.

Samtang wala pa ini, ginapakita sang Dios ang iya gugma karon paagi sa pagtanyag sing espirituwal kag emosyonal nga bulig sa tanan nga ginhimuslan kag gin-abusuhan. “Ang nadula pangitaon ko,” saad niya, “kag ang gintabog pabalikon ko, kag ang nabali pagabugkusan ko kag ang masakiton pabaskugon ko.” (Ezequiel 34:16) Paagi sa iya Pulong, sa iya balaan nga espiritu, kag sa Cristianong kongregasyon, ginapaumpawan ni Jehova ang mga kabataan nga ginapigos kag imol. Daw ano ka makalilipay mahibaluan nga sa karon, subong sang iya himuon sa palaabuton, ‘ang Amay sang mapinalanggaon nga mga kaluoy kag ang Dios sang bug-os nga paglugpay nagalugpay sa aton sa tanan naton nga kapipit-an.’​—⁠2 Corinto 1:​3, 4.

[Picture Credit Line sa pahina 18]

© Mikkel Ostergaard /Panos Pictures