Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JULY 2014

“Yehowa Le Mɛi ni Ji Enii Lɛ”

“Yehowa Le Mɛi ni Ji Enii Lɛ”

“Kɛ́ mɔ ko miisumɔ Nyɔŋmɔ lɛ, lɛ Nyɔŋmɔ le.”—1 KOR. 8:3.

1. Gbaa Biblia mli sane ko ni tsɔɔ akɛ Nyɔŋmɔ tsuji komɛi lakaa amɛhe. (Kwɛmɔ mfoniri ni yɔɔ nikasemɔ lɛ shishijee lɛ.)

FEEMƆ shihilɛ nɛɛ he mfoniri okwɛ: Osɔfonukpa Aaron damɔ Yehowa kpee buu lɛ hiɛ leebi ko, ni ehiɛ ŋɛsu ní eeshã tsofa-kɛŋma, ni Kora kɛ mɛi 250, ní amɛteŋ mɔ fɛɛ mɔ hiɛ ŋɛsu kɛdamɔ emasɛi lɛ hu miishã tsofa-kɛŋma kɛmiihã Yehowa. (4 Mose 16:16-18) Kɛ́ okwɛ amɛ lɛ, obaasusu akɛ amɛ fɛɛ amɛji Yehowa anɔkwa jálɔi. Shi Kora kɛ mɛi ni fata ehe lɛ ji atuatselɔi henɔwolɔi, ni miitao ashɔ̃ osɔfoyeli lɛ kɛjɛ Aaron dɛŋ. (4 Mose 16:1-11) Amɛyasusu akɛ Nyɔŋmɔ baakpɛlɛ amɛjamɔ lɛ nɔ, shi amɛlaka amɛhe kwraa. Nɔ ni amɛfee lɛ tsɔɔ moŋ akɛ amɛmiijɛ Yehowa, mɔ ni naa adesai atsuiiaŋ, ni ele osato ni amɛfeɔ lɛ.Yer. 17:10.

2. Mɛni Mose tsɔ hiɛ ewie? Te ewiemɔ lɛ ba mli ehã tɛŋŋ?

2 Gbi ni tsɔ nakai gbi lɛ hiɛ lɛ, Mose wie akɛ: “Wɔ́ ni ji wɔ́ lɛ Yehowa baahã ale mɔ ni ji enɔ̃.” (4 Mose 16:5) Te Yehowa fee tɛŋŋ ehã ale mɛi ni ji enɔkwa jálɔi kɛ mɛi ni ji osatofoi lɛ? Biblia lɛ tsɔɔ akɛ: “La jɛ Yehowa ŋɔɔ ni ebashã [Kora kɛ] hii ohai enyɔ kɛ nyɔŋmai enumɔ lɛ ni kɛ tsofa-kɛŋma ba lɛ.” (4 Mose 16:35; 26:10) Aaron pɛ eshwɛ, ni tsɔɔ akɛ, lɛ ji mɔ ni Yehowa kpɛlɛɔ enɔ akɛ osɔfo kɛ anɔkwa jálɔ.Nyɛkanea 1 Korintobii 8:3.

3. (a) Mɛni ba yɛ Paulo beaŋ? (b) Mɛni wɔbaanyɛ wɔkase kɛjɛ bɔ ni Yehowa tsu atuatselɔi ni te shi yɛ Mose beaŋ lɛ ahe nii lɛ mli?

 3 Sane nɛɛ sɛɛ nɔ ni fe afii 1,500 lɛ, nɔ ko ni tamɔ nakai nɔŋŋ ba yɛ Kristofoi asafo lɛ mli. Paulo tsɔɔ mli akɛ, mɛi komɛi ni kɛɛ amɛji Kristofoi lɛ bɔi amale tsɔɔmɔi tsɔɔmɔ yɛ asafo lɛ mli. Shi akɛni hemɔkɛyeli kwalɔi nɛɛ yɛ asafo lɛ mli lolo hewɔ lɛ, mɔ ko baasusu akɛ amɛji Yehowa anɔkwa jálɔi. Shi amɛnifeemɔ lɛ baanyɛ aye anɔkwa Kristofoi lɛ awui. Nɛkɛ klaji ni eŋɔ too hewolo amɛha amɛhe nɛɛ bɔi “mɛi komɛi ahemɔkɛyeli lɛ” butumɔ. (2 Tim. 2:16-18) Shi ani Yehowa enaaa nɔ ni yaa nɔ lɛ? Ena, ni eka shi faŋŋ akɛ Paulo le nakai, ejaakɛ ele bɔ ni Nyɔŋmɔ tsu Kora kɛ esamaŋfoi lɛ atuatsemɔ lɛ he nii ehã yɛ blema. Bɔ ni afee ni wɔ hu wɔná nɔmimaa akɛ Nyɔŋmɔ naa nibii ni yaa nɔ lɛ, nyɛhãa wɔsusua sane ko ni Paulo ŋma Timoteo lɛ he wɔkwɛa.

“MI YEHOWA LƐ, MITSAKEEE”

4. Mɛni Paulo le yɛ Yehowa he? Mɛni Paulo kɛɛ Timoteo?

4 Paulo le akɛ Yehowa le mɛi ni ji osatofoi kɛ mɛi ni ji anɔkwa jálɔi. Wiemɔi ni ekɛtsu nii yɛ wolo ni eŋma Timoteo lɛ mli lɛ tsɔɔ faŋŋ akɛ ele enɛ. Be ni etsɔɔ bɔ ni hemɔkɛyeli kwalɔi lɛ fiteɔ mɛi ni yɔɔ asafo lɛ mli lɛ ekomɛi ahemɔkɛyeli lɛ sɛɛ lɛ, ewie akɛ: “Enɛ fɛɛ sɛɛ lɛ, Nyɔŋmɔ faneshi ni wa lɛ ma shi shiŋŋ, ni ehiɛ nɛkɛ naasɔomɔnɔ nɛɛ akɛ, ‘Yehowa le mɛi ni ji enii lɛ,’ kɛ agbɛnɛ hu, ‘Mɔ fɛɛ mɔ ni boɔ tsɛɔ Yehowa gbɛ́i lɛ atsi ehe kɛje nii ni ejaaa he.’”2 Tim. 2:18, 19, NW.

5, 6. Mɛni sa kadimɔ waa yɛ “Nyɔŋmɔ faneshi ni wa lɛ” ni Paulo kɛtsu nii lɛ he? Ni te wiemɔ nɛɛ ná Timoteo nɔ hewalɛ ehã tɛŋŋ?

5 Mɛni sa kadimɔ waa yɛ wiemɔi ni Paulo kɛtsu nii yɛ ŋmalɛ nɛɛ mli lɛ he? Akɛ wiemɔ ni ji, “Nyɔŋmɔ faneshi ni wa lɛ” tsu nii yɛ ŋmalɛ nɛɛ pɛ mli. Bei pii lɛ, Biblia lɛ kɛ wiemɔ ni ji “faneshi” lɛ tsuɔ nii kɛhãa nibii srɔtoi, ni blema Israel maŋtiase Yerusalem fata he. (Lala 87:1, 2) Agbɛnɛ hu, akɛ gbɛfaŋnɔ ni Yesu tsuɔ yɛ Yehowa yiŋtoo mli lɛ to faneshi loo shishitoo he. (1 Kor. 3:11; 1 Pet. 2:6) Be ni Paulo wie “Nyɔŋmɔ faneshi ni wa lɛ” he lɛ, no mli lɛ mɛni etsɔɔ lɛ?

6 Paulo tsɛ nɔ ni Mose kɛɛ Kora ni aŋma yɛ 4 Mose 16:5 lɛ yisɛɛ, ni no sɛɛ lɛ etsĩ “Nyɔŋmɔ faneshi ni wa lɛ” tã. No mli lɛ, Paulo miiwie nibii ni tee nɔ yɛ Mose beaŋ lɛ he koni ekɛwo Timoteo hewalɛ, ní ekɛkai lɛ akɛ Yehowa le mɛi fɛɛ ni feɔ osato yɛ esafo lɛ mli lɛ, ni ebaatsu amɛhe nii yɛ be ni sa mli. Taakɛ Kora nifeemɔ lɛ tsakeee Yehowa yiŋtoo lɛ, nakai nɔŋŋ hemɔkɛyeli kwalɔi ni yɔɔ asafo lɛ mli lɛ anifeemɔi tsakeŋ Nyɔŋmɔ yiŋtoo. Paulo gbalaaa nɔ ni “Nyɔŋmɔ faneshi ni wa lɛ” tsɔɔ lɛ mli fitsofitso. Fɛɛ sɛɛ lɛ, nɔ ni ekɛɛ Timoteo lɛ ye ebua lɛ koni ekɛ ehiɛ afɔ̃ Yehowa nɔ kwraa.

7. Mɛni hewɔ wɔyɔɔ nɔmimaa akɛ Yehowa baafee nɔ ni ja ni ebaaye anɔkwa be fɛɛ be lɛ?

7 Yehowa shishitoo mlai lɛ tsakeee. Lala 33:11 lɛ kɛɔ akɛ: “Yehowa ajina lɛ damɔɔ shi shiŋŋ kɛyaa naanɔ, etsuiŋ jwɛŋmɔi lɛ yɛ hã yinɔbii fɛɛ.” Ŋmalɛi krokomɛi wieɔ Yehowa nɔyeli, esuɔmɔ ni tsakeee, ejalɛ, kɛ enɔkwayeli lɛ he akɛ amɛhiɔ shi kɛyaa naanɔ. (2 Mose 15:18; Lala 106:1; 111:3; 117:2) Maleaki 3:6 lɛ kɛɔ akɛ: “Ejaakɛ mi Yehowa lɛ, mitsakeee.” Nakai nɔŋŋ Yakobo 1:17 lɛ kɛɔ akɛ, “sutsakemɔ kɛ tsɔmɔ susuma ko bɛ” Yehowa.

 NIŊMAA KO NI HÃA ANÁA HEMƆKƐYELI YƐ YEHOWA MLI

8, 9. Mɛni wɔbaanyɛ wɔkase kɛjɛ wiemɔi ni aŋmala yɛ “Nyɔŋmɔ faneshi ni wa lɛ” he lɛ mli?

8 Yɛ blema lɛ, afɔɔ niŋmaa yɛ tsũi afaneshii ahe. Bei pii lɛ, afeɔ enɛ koni mɛi ana mɔ ni ma tsũ lɛ loo mɔ ni ji shĩatsɛ. Paulo ji Biblia ŋmalɔi lɛ ateŋ klɛŋklɛŋ mɔ ni kɛ nifeemɔ nɛɛ fee nɔkwɛmɔnɔ. * Aŋmala nibii enyɔ yɛ “Nyɔŋmɔ faneshi ni wa” ni Paulo tsĩ tã yɛ 2 Timoteo 2:19 lɛ he. Klɛŋklɛŋ nɔ lɛ ji, “Yehowa le mɛi ni ji enii lɛ,” ni nɔ ni ji enyɔ lɛ ji, “Mɔ fɛɛ mɔ ni boɔ tsɛɔ Yehowa gbɛ́i lɛ atsi ehe kɛje nii ni ejaaa he.” Enɛ hãa wɔkaiɔ sane ni yɔɔ 4 Mose 16:5 lɛ.Nyɛkanea.

9 Mɛni mɛi ni ji Yehowa nii lɛ baanyɛ akase kɛjɛ wiemɔi ni aŋmala yɛ “Nyɔŋmɔ faneshi ni wa lɛ” he lɛ mli? No ji akɛ, Yehowa jeŋba he mlai kɛ shishitoo mlai lɛ damɔ anɔkwa saji enyɔ komɛi ni he hiaa waa anɔ. Nomɛi ji, (1) Yehowa sumɔɔ mɛi ni yeɔ lɛ anɔkwa lɛ, ni (2) Yehowa nyɛɔ nifeemɔi ni ejaaa. Te enɛ kɔɔ hemɔkɛyeli kwamɔ ni yaa nɔ yɛ asafo lɛ mli lɛ he tɛŋŋ?

10. Te hemɔkɛyeli kwalɔi lɛ anifeemɔ lɛ sa anɔkwafoi ni hi shi yɛ Paulo beaŋ lɛ ahe tɛŋŋ?

10 Hemɔkɛyeli kwalɔi lɛ anifeemɔ lɛ gba Timoteo kɛ anɔkwafoi krokomɛi lɛ anaa. Ekolɛ, Kristofoi komɛi baabi nɔ hewɔ ni aŋmɛ aŋkroaŋkroi ni tamɔ nɛkɛ lɛ gbɛ koni amɛhi asafo lɛ mli lɛ. Eeenyɛ efee akɛ, anɔkwafoi lɛ ayiŋ etɛ̃ɛɛ amɛ kɛji Yehowa na srɔto ni yɔɔ anɔkwa ni amɛyeɔ lɛ kɛ osato ni hemɔkɛyeli kwalɔi lɛ feɔ lɛ teŋ.Bɔf. 20:29, 30.

Timoteo hãaa hemɔkɛyeli kwalɔi lɛ anifeemɔ lɛ aná enɔ hewalɛ (Kwɛmɔ kuku 10-12)

11, 12. Mɛɛ gbɛ nɔ eka shi faŋŋ akɛ wolo ni Paulo ŋma lɛ wo Timoteo hemɔkɛyeli lɛ mli hewalɛ?

11 Ŋwanejee ko bɛ he akɛ, wolo ni Paulo ŋma lɛ wo Timoteo hemɔkɛyeli lɛ mli hewalɛ, ni ekai lɛ akɛ Yehowa hã ana faŋŋ akɛ, Kora kɛ esamaŋfoi lɛ miifee osato. Yehowa kpoo amɛ ni ekpata amɛhiɛ, shi ehã ana akɛ Aaron ji anɔkwafo. Yɛ gbɛ ko nɔ lɛ, Paulo miikɛɛ akɛ, eyɛ mli akɛ amale Kristofoi futu amɛ moŋ, shi Yehowa baana mɛi fɛɛ ni ji enii lɛ, taakɛ efee yɛ Mose beaŋ lɛ.

12 Yehowa tsakeee; wɔbaanyɛ wɔkɛ wɔhiɛ afɔ̃ enɔ be fɛɛ be. Enyɛɔ nɔfɔŋfeemɔ, ni ebaakpata mɛi fɛɛ ni feɔ nibii gbohii ni tsakeee amɛtsui lɛ ahiɛ yɛ be ni sa mli. Akai Timoteo ni ekpoo nibii fɔji ni mɛi ni kɛɛ amɛji Kristofoi lɛ feɔ  lɛ, ejaakɛ esa akɛ “mɔ fɛɛ mɔ ni boɔ tsɛɔ Yehowa gbɛ́i lɛ” akpoo nɔfɔŋfeemɔ. *

AJUROƆ MƐI NI JƐƆ AMƐTSUIŊ AMƐJÁA YEHOWA LƐ BE FƐƐ BE

13. Mɛɛ nɔmimaa wɔbaanyɛ wɔná?

13 Wiemɔi ni akɛ mumɔ tsirɛ Paulo ni eŋma lɛ baanyɛ awaje wɔ hu. Klɛŋklɛŋ lɛ, le ni wɔle akɛ Yehowa naa anɔkwa ni wɔyeɔ lɛ lɛ hãa wɔtsui nyɔɔ wɔmli. Jeee akɛ enaa kɛkɛ, shi moŋ, mɛi ni ji enii lɛ asane kã etsui nɔ waa. Biblia lɛ kɛɔ akɛ: “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehãa mɛi ni amɛtsui ehi kɛwula shi yɛ egbɛfaŋ lɛ.” (2 Kron. 16:9) No hewɔ lɛ, wɔbaanyɛ wɔná nɔmimaa akɛ, kɛ́ wɔjɛ “tsui ni mli tse” mli wɔjá Yehowa lɛ, ehiɛ kpaŋ wɔnɔ kɔkɔɔkɔ.1 Tim. 1:5; 1 Kor. 15:58.

14. Mɛɛ jamɔ Yehowa hiɔ?

14 Agbɛnɛ hu, wɔle akɛ Yehowa miihi mɛi ni feɔ osato yɛ ejamɔ mli, ni enɛ sa kadimɔ waa. Akɛni ehiŋmɛii “kpaa shikpɔŋ muu lɛ fɛɛ nɔ” hewɔ lɛ, ebaanyɛ ena mɛi ni tsui ‘ehiii kɛwulaaa shi yɛ egbɛfaŋ lɛ.’ Abɛi 3:32 lɛ kɛɔ akɛ: “Yehowa miihi kutumpɔfo,” ni ji mɔ ko ni kwaa efeɔ tamɔ eyeɔ Yehowa anɔkwa, shi efeɔ esha yɛ teemɔŋ lɛ. Eyɛ mli akɛ ekolɛ kutumpɔfo ko baanyɛ alaka adesai kɛyashi be ko moŋ, shi enyɛŋ elaka Yehowa, ejaakɛ Yehowa yɛ hewalɛ waa ni esumɔɔ jalɛ nifeemɔ. No hewɔ lɛ, “mɔ ni tsimɔɔ enɔtɔmɔ nɔ lɛ, eshwereŋ.”Abɛi 28:13; nyɛkanea 1 Timoteo 5:24; Hebribii 4:13.

15. Mɛni esa akɛ wɔkwa, ni mɛni hewɔ?

15 Yehowa webii lɛ ateŋ mɛi babaoo sumɔɔ lɛ kɛ amɛtsui fɛɛ. Ebaafee nɔ ni wa waa akɛ mɔ ko aaaje gbɛ efee osato yɛ Yehowa jamɔ mli. Kɛ̃lɛ, kɛ́ mɛi fee osato yɛ Mose beaŋ kɛ mra be mli Kristofoi lɛ abeaŋ lɛ, no lɛ ebaanyɛ eba lɛ nakai yɛ wɔ hu wɔbeaŋ. (2 Tim. 3:1, 5) Shi ani enɛ tsɔɔ akɛ esa akɛ wɔyiŋ afee wɔ kɔshikɔshi yɛ anɔkwa ni wɔnyɛmimɛi Kristofoi lɛ yeɔ Yehowa lɛ he, ní wɔsusu akɛ benɛ amɛfeɔ nɔ ko ni esaaa yɛ teemɔŋ? Dabi! Esaaa akɛ wɔyiŋ feɔ wɔ kɔshikɔshi yɛ wɔnyɛmimɛi lɛ ahe, be mli ni wɔbɛ nɔdaamɔnɔ ko. (Nyɛkanea Romabii 14:10-12; 1 Korintobii 13:7.) Kɛfata he lɛ, kɛ́ wɔyiŋ feɔ wɔ kɔshikɔshi yɛ anɔkwa ni wɔnyɛmimɛi lɛ yeɔ Yehowa lɛ he lɛ, ebaanyɛ efite wekukpaa ni yɔɔ wɔ kɛ Yehowa teŋ lɛ.

16. (a) Mɛni esa akɛ wɔteŋ mɔ fɛɛ mɔ afee koni osatofeemɔ akahe shi yɛ etsuiŋ? (b) Mɛni wɔbaanyɛ wɔkase kɛjɛ akrabatsa ni yitso ji, “ Nyɛyaa Nɔ Nyɛpɛia . . . Nyɛyaa Nɔ Nyɛkaa . . .” lɛ mli?

16 Esa akɛ Kristofonyo fɛɛ Kristofonyo “aka lɛ diɛŋtsɛ enitsumɔ ekwɛ.” (Gal. 6:4) Akɛni wɔyeee emuu hewɔ lɛ, kɛ́ wɔkwɛɛɛ ni ahi lɛ, wɔbaasɔmɔ Yehowa yɛ yiŋtoi ni ejaaa ahewɔ ní wɔyɔseee. (Heb. 3:12, 13) No hewɔ lɛ, yɛ be kɛ beaŋ lɛ, esa akɛ wɔpɛi yiŋtoi ahewɔ ni wɔsɔmɔɔ Yehowa lɛ mli. Wɔbaanyɛ wɔbi wɔhe akɛ: ‘Ani mijáa Yehowa akɛni misumɔɔ lɛ, ni mile akɛ lɛ ji jeŋ muu fɛɛ nɔyelɔ lɛ hewɔ? Aloo mikɛ mijwɛŋmɔ maa nibii kpakpai ni mikpaa gbɛ akɛ minine baashɛ nɔ yɛ Paradeiso lɛ mli lɛ anɔ titri?’ (Kpoj. 4:11) Kɛ́ wɔkɛ sanebimɔi ni tamɔ nɛkɛ ka wɔhe wɔkwɛ lɛ, ebaahã wɔfã osatofeemɔ kɛ eshishi fɛɛ kɛjɛ wɔtsuiŋ.

ANƆKWAYELI KƐ MIISHƐƐ BAA

17, 18. Mɛni hewɔ esa akɛ wɔjɛ wɔtsuiŋ fɛɛ wɔjá Yehowa lɛ?

17 Kɛ́ wɔbɔ mɔdɛŋ wɔfã osatofeemɔ  kɛ eshishi fɛɛ kɛjɛ wɔtsuiŋ lɛ, wɔbaaná he sɛɛ babaoo. Biblia lɛ kɛɔ akɛ: “Ajɔɔ gbɔmɔ ni Yehowa ebuuu nɔsha ko ehãaa lɛ, ni apasa bɛ emumɔ mli lɛ!” (Lala 32:2) Anɔkwa, kɛ́ wɔjɛ wɔtsuiŋ fɛɛ wɔjá Yehowa lɛ, wɔmii baashɛ wɔhe amrɔ nɛɛ, ni wɔbaaná miishɛɛ ni sɛɛ efooo hu wɔsɛɛ.

18 Etsɛŋ kwraa, Yehowa baakpa mɛi fɛɛ ni yaa nɔ amɛfeɔ esha yɛ teemɔŋ ni tsakeee amɛtsui lɛ ahe mama, ni ebaahã ana “srɔto ni yɔɔ jalɔ kɛ efɔŋfeelɔ teŋ, kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ teŋ.” (Mal. 3:18) Shi ní nakai be lɛ shɛko nɛɛ, le ni wɔle akɛ “Nuŋtsɔ [Yehowa] hiŋmɛii kã jalɔi ahe, ni eboɔ amɛfaikpamɔ toi” lɛ hãa wɔtsɛɔ wɔtsui wɔŋmɛɔ wɔmli.1 Pet. 3:12..

^ kk. 8 Nii ni aŋmaa awoɔ faneshii ahe lɛ eko ji nɔ ni atsĩ tã yɛ Kpojiemɔ 21:14 lɛ. Atsɔɔ yɛ jɛmɛ akɛ, aŋmala bɔfoi 12 lɛ agbɛ́ii yɛ “shishitoi (aloo fanesii)” 12 lɛ ahe.

^ kk. 12 Nikasemɔ ni nyiɛ sɛɛ lɛ baahã wɔna bɔ ni wɔɔfee wɔkase Yehowa, ni wɔtsi wɔhe kɛje nii ni ejaaa he..