Nɔ Ni Mateo Ŋma 6:1-34

  • GƆŊ NƆ SHIƐMƆ (1-34)

    • “Nyɛkafea nyɛjalɛ nifeemɔi lɛ yɛ gbɔmɛi ahiɛ” (1-4)

    • Bɔ ni asɔleɔ (5-15)

      • Sɔlemɔ he nɔkwɛmɔnɔ (9-13)

    • Ŋmaahilɛ (16-18)

    • Jwetrii yɛ shikpɔŋ lɛ nɔ kɛ yɛ ŋwɛi (19-24)

    • Nyɛkpaa nyɛtsui ni nyɛyeɔ lɛ (25-34)

      • Nyɛyaa nɔ nyɛtaoɔ Maŋtsɛyeli lɛ klɛŋklɛŋ (33)

6  “Nyɛkwɛa jogbaŋŋ ni nyɛkafea nyɛjalɛ nifeemɔi lɛ yɛ gbɔmɛi ahiɛ koni amɛna nyɛ;+ kɛjeee nakai lɛ, nyɛnáŋ jweremɔnɔ ko kɛjɛŋ nyɛ-Tsɛ ni yɔɔ ŋwɛi lɛ dɛŋ.  No hewɔ lɛ, kɛ́ oyaafee ohiafoi ejurɔ lɛ,* kaakpã tɛtɛrɛmantɛrɛ kɛtsɔ hiɛ, tamɔ bɔ ni osatofoi lɛ feɔ yɛ kpeehei lɛ kɛ gbɛjegbɛi lɛ anɔ koni gbɔmɛi awo amɛhiɛ nyam lɛ. Lɛɛlɛŋ, miikɛɛ nyɛ akɛ, amɛná amɛjweremɔnɔ lɛ fɛɛ momo.  Shi bo lɛ, kɛ́ oofee ohiafoi ejurɔ lɛ, kaahã onine abɛku le nɔ ni oninejurɔ feɔ lɛ,  koni ejurɔ ni ofeɔ ohiafoi lɛ ahi okɛ amɛ pɛ teŋ. Kɛkɛ lɛ, o-Tsɛ ni miikwɛ kɛmiijɛ teemɔŋ lɛ baato bo najiaŋ.+  “Agbɛnɛ hu, kɛ́ nyɛbaasɔle lɛ, nyɛkafea nyɛnii tamɔ osatofoi lɛ,+ ejaakɛ amɛsumɔɔ ni amɛdamɔ kpeehei lɛ kɛ gbɛjegbɛi wuji lɛ akoji lɛ anɔ koni mɛi ana amɛ.+ Lɛɛlɛŋ, miikɛɛ nyɛ akɛ, amɛná amɛjweremɔnɔ lɛ fɛɛ momo.  Shi bo lɛ, kɛ́ obaasɔle lɛ, botemɔ otsũ mli he ni mɔ ko enaaa bo, ni be ni oŋa oshinaa lɛ, sɔlemɔ ohã o-Tsɛ ni yɔɔ teemɔŋ lɛ.+ Kɛkɛ lɛ, o-Tsɛ ni miikwɛ kɛmiijɛ teemɔŋ lɛ baato bo najiaŋ.  Kɛ́ oosɔle lɛ, kaawie wiemɔ kome too lɛ nɔŋŋ shii abɔ, tamɔ bɔ ni jeŋmajiaŋbii lɛ feɔ lɛ, ejaakɛ amɛsusuɔ akɛ amɛwiemɔ babaoo lɛ baahã abo amɛ toi.  No hewɔ lɛ, nyɛkatamɔa amɛ, ejaakɛ nyɛ-Tsɛ lɛ le nibii ni he hiaa nyɛ+ dani nyɛbiɔ lɛ po.  “No hewɔ lɛ, nyɛsɔlea yɛ nɛkɛ gbɛ nɔ:+ “‘Wɔ-Tsɛ ni yɔɔ ŋwɛi, ogbɛ́i+ lɛ he atse.*+ 10  O-Maŋtsɛyeli+ lɛ aba. Afee nɔ ni osumɔɔ+ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.*+ 11  Ŋmɛnɛ lɛ, hã wɔ niyenii* ni he hiaa wɔ kɛhã ŋmɛnɛ gbi nɛɛ;+ 12  ni okɛ wɔnyɔji lɛ ake wɔ, tamɔ bɔ ni wɔ hu wɔkɛkeɔ mɛi ni hiɛ wɔ nyɔji lɛ.+ 13  Ni okɛ wɔ akaya kaa* mli,+ shi jiemɔ wɔ* kɛje mɔ fɔŋ lɛ dɛŋ.’+ 14  “Ejaakɛ kɛ́ nyɛkɛ mɛi atɔmɔi ke amɛ lɛ, nyɛŋwɛi Tsɛ lɛ hu kɛbaake nyɛ;+ 15  shi kɛ́ nyɛkɛ mɛi atɔmɔi ekeee amɛ lɛ, nyɛ-Tsɛ lɛ hu kɛ nyɛtɔmɔi ekeŋ nyɛ.+ 16  “Kɛ́ nyɛmiihi ŋmaa lɛ,+ nyɛkpaa nyɛhiɛ mɔbɔmɔbɔfeemɔ tamɔ osatofoi lɛ feɔ lɛ, ejaakɛ amɛhãa amɛhiɛ feɔ taŋtaŋ* koni mɛi ana akɛ amɛmiihi ŋmaa.+ Lɛɛlɛŋ, miikɛɛ nyɛ akɛ, amɛná amɛjweremɔnɔ lɛ fɛɛ momo. 17  Shi bo lɛ, kɛ́ oohi ŋmaa lɛ, kpa oyiteŋ mu ni ofɔ ohiɛ, 18  koni mɛi akana akɛ oohi ŋmaa, ja o-Tsɛ ni yɔɔ teemɔŋ lɛ pɛ. Kɛkɛ lɛ, o-Tsɛ ni miikwɛ kɛmiijɛ teemɔŋ lɛ baato bo najiaŋ. 19  “Nyɛkpaa jwetrii ni nyɛbuaa naa nyɛhãa nyɛhe yɛ shikpɔŋ lɛ nɔ,+ he ni abɛi ni yeɔ mama kɛ ŋkanale fiteɔ nii, ni julɔi hu gbuɔ kɛboteɔ mli kɛbajuɔ yɛ lɛ. 20  Shi moŋ, nyɛbuaa jwetrii anaa nyɛhãa nyɛhe yɛ ŋwɛi,+ he ni abɛi ni yeɔ mama loo ŋkanale fiteee nii,+ ni julɔi hu egbuuu kɛboteee mli kɛyajuuu yɛ lɛ. 21  Ejaakɛ he ni ojwetri yɔɔ lɛ, jɛmɛ otsui hu baahi. 22  “Gbɔmɔtso lɛ kane ji hiŋmɛi lɛ.+ No hewɔ lɛ, kɛ́ ohiŋmɛi kwɛɔ nɔ kome* lɛ, ogbɔmɔtso muu lɛ fɛɛ baakpɛ.* 23  Shi kɛ́ ohiŋmɛi kɔ̃ɔ nii anɔ* lɛ,+ ogbɔmɔtso muu lɛ fɛɛ baawo duŋ. Kɛ́ la ni yɔɔ omli lɛ ji duŋ lɛɛlɛŋ lɛ, kwɛ bɔ ni nakai duŋ lɛ yɔɔ kpii hã! 24  “Mɔ ko nyɛŋ etsɔ nyɔŋ ehã nuŋtsɔmɛi enyɔ; ejaakɛ no lɛ, ebaanyɛ mɔ kome ni ebaasumɔ mɔ kroko lɛ,+ loo ebaakpɛtɛ mɔ kome he ni ebuŋ mɔ kroko lɛ ehãŋ nɔ ko. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.+ 25  “Enɛ hewɔ lɛ, miikɛɛ nyɛ akɛ: Nyɛkpaa nyɛtsui ni nyɛyeɔ+ yɛ nyɛwala he* yɛ nɔ ni nyɛbaaye loo nɔ ni nyɛbaanu lɛ hewɔ, aloo yɛ nyɛgbɔmɔtsei lɛ ahe yɛ nɔ ni nyɛbaawo lɛ hewɔ.+ Ani wala* jara waaa fe niyenii, ni gbɔmɔtso lɛ hu jara waaa fe atade?+ 26  Nyɛkwɛa ŋwɛi loofɔji lɛ;+ amɛduuu nii, amɛkpaaa nii, ni amɛbuaaa nii anaa amɛwooo nitoohei, shi nyɛŋwɛi Tsɛ lɛ lɛɔ amɛ kɛ̃. Ani nyɛjara waaa kwraa fe amɛ? 27  Nyɛteŋ namɔ baanyɛ atsɔ etsui ni eyeɔ lɛ nɔ etsa ewalasɛɛkɛlɛ nɔ ninetalɔ kome?+ 28  Agbɛnɛ hu, mɛni hewɔ nyɛyeɔ nyɛtsui yɛ atade he? Nyɛkasea nii kɛjɛa koo mli lili fɔfɔii lɛ adɛŋ, bɔ ni amɛdaraa; amɛgbooo deŋme, ni amɛtsɛ̃ɛɛ kpãa;* 29  shi mi lɛ, miikɛɛ nyɛ akɛ, yɛ Solomon+ anunyam lɛ fɛɛ sɛɛ po lɛ, ewulaaa tamɔ enɛɛmɛi ateŋ ekome. 30  No hewɔ lɛ, kɛji nɛkɛ Nyɔŋmɔ wulaa kwɛ̃ɛ nii ni yɔɔ koo mli ni ŋmɛnɛ lɛ amɛyɛ, ni wɔ́ lɛ akɛwo flɔnɔɔ mli lɛ, ani ewulaŋ nyɛ babaoo, nyɛ ni nyɛhemɔkɛyeli faaa? 31  No hewɔ lɛ, nyɛkayea nyɛtsui kɔkɔɔkɔ+ nyɛkɛa akɛ, ‘Mɛni wɔbaaye?’ aloo, ‘Mɛni wɔbaanu?’ aloo, ‘Mɛni wɔbaawo?’+ 32  Ejaakɛ nibii nɛɛ fɛɛ asɛɛ jeŋmaji lɛ kɛ hiɛdɔɔ tiuɔ. Nyɛŋwɛi Tsɛ lɛ le akɛ nibii nɛɛ fɛɛ ahe miihia nyɛ. 33  “No hewɔ lɛ, nyɛyaa nɔ nyɛtaoa Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ, ni akɛ nibii krokomɛi nɛɛ fɛɛ baafata he ahã nyɛ.+ 34  No hewɔ lɛ, nyɛkayea nyɛtsui yɛ wɔ́ he kɔkɔɔkɔ,+ ejaakɛ wɔ́ hu kɛ lɛ diɛŋtsɛ etsuiyelii baaba. Gbi fɛɛ gbi kɛ emli naagbai.*

Shishigbɛ Niŋmaa

Loo “kɛ́ oyaake ohiafoi anii lɛ.” Kwɛmɔ Wiemɔi Titrii Amligbalamɔ lɛ.
Loo “ahiɛ ogbɛ́i lɛ krɔŋkrɔŋ; afee ogbɛ́i lɛ krɔŋkrɔŋ.”
Loo “Afee nɔ ni osumɔɔ yɛ ŋwɛi kɛ shikpɔŋ lɛ nɔ fɛɛ.”
Greek sht. ŋm., “blodo.”
Ni ji, efɔŋ he kaa.
Loo “kpɔ̃ wɔ.”
Loo “amɛhiɛɔ amɛhe basabasa.”
Loo “nɔ tse; bɛ haŋtsii.”
Loo “baayi obɔ kɛ la.”
Greek sht. ŋm., “ehiii; ji efɔŋ.”
Loo “nyɛsusumai ahe.”
Loo “susuma lɛ.”
“Kpãatsɛ̃mɔ” ji gbɛ ni atsɔɔ nɔ akɛ nibii tamɔ odonti kɛ kooloo hetsɔi feɔ kpãa ni akɛfeɔ mama.
Loo “Gbi fɛɛ gbi nɔ naagbai fa hã lɛ.”