Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Wolo Ni Ji Enyɔ Ni Akɛmaje Timoteo 3:1-17

EMLI SAJI

  • Bei krɛdɛi yɛ naagbee gbii lɛ amli (1-7)

  • Nyiɛmɔ Paulo nɔkwɛmɔnɔ lɛ sɛɛ kpaakpa (8-13)

  • ‘Yaa nɔ ohi shi yɛ nibii ni okase lɛ amli’ (14-17)

    • Ŋmalɛ lɛ fɛɛ jɛ Nyɔŋmɔ mumɔ lɛŋ (16)

3  Shi ná enɛ ole akɛ naagbee gbii lɛ amli lɛ,+ bei krɛdɛi ni mli shihilɛ wa baaba.  Ejaakɛ gbɔmɛi baatsɔmɔ hesuɔlɔi, shikasuɔlɔi, shwãlɔi, henɔwolɔi, mɛi ni wieɔ wiemɔi fɔji,* fɔlɔi anɔ toigbolɔi, mɛi ni hiɛ esɔɔɔ nii, mɛi ni yeee anɔkwa,  mɛi ni bɛ suɔmɔ kɛhã amɛweku mli bii, mɛi ni anyɛɛɛ akɛ amɛ afee kpaŋmɔ, mɛi ni wieɔ mɛi krokomɛi ahe efɔŋ, mɛi ni nyɛɛɛ amɛhe nɔ amɛye, mɛi ni hiɛ yɔɔ la, mɛi ni sumɔɔɔ ekpakpa,  mɛi ni jieɔ mɛi amɛhãa, kuɛŋtilɔi, mɛi ni naa amɛhe tsɔ, mɛi ni sumɔɔ shwɛmɔ-kɛ-ŋɔɔmɔ moŋ fe Nyɔŋmɔ,  mɛi ni anaa amɛ akɛ amɛsumɔɔ Nyɔŋmɔjamɔ shi amɛhãaa ená amɛnɔ hewalɛ* lɛ;+ tsi ohe kɛje nɛkɛ gbɔmɛi ahe.  Mɛnɛɛmɛi ateŋ mɛi komɛi teɔ shi ni amɛjuɔ shi kɛboteɔ shĩai amli, ni amɛŋɔɔ yei ni he waaa ni eshai eyi amɛ obɔ ni akɔnɔi srɔtoi kpalaa amɛ lɛ anom,  yei ni kaseɔ nii daa, shi amɛnyɛɛɛ amɛshɛ anɔkwale lɛ he nilee krɔŋŋ lɛ he lɛ.  Agbɛnɛ, tamɔ bɔ ni Yane kɛ Yambre te shi wo Mose lɛ, nakai nɔŋŋ mɛnɛɛmɛi hu yaa nɔ amɛteɔ shi amɛwoɔ anɔkwale lɛ. Mɛi nɛɛ ajwɛŋmɔ efite kwraa, ni yɛ hemɔkɛyeli lɛ gbɛfaŋ lɛ, Nyɔŋmɔ náaa amɛhe miishɛɛ.  Shi amɛyaŋ amɛhiɛ dɔŋŋ, ejaakɛ amɛbuulufeemɔ* lɛ baaje kpo faŋŋ yɛ mɛi fɛɛ ahiɛ, tamɔ bɔ ni eba lɛ yɛ Yane kɛ Yambre gbɛfaŋ lɛ.+ 10  Shi bo lɛ, onyiɛ mitsɔɔmɔ, kɛ mishihilɛ gbɛ,+ kɛ miyiŋtoo, kɛ mihemɔkɛyeli, kɛ mitsuishitoo, kɛ misuɔmɔ, kɛ mishifimɔ lɛ sɛɛ kpaakpa, 11  ni ole miyiwai kɛ mimanehului lɛ, tamɔ nɔ ni mikɛkpe yɛ Antiokia,+ yɛ Ikonium,+ yɛ Listra+ lɛ nɛkɛ. Mifi shi yɛ yiwai nɛɛ amli, ni Nuŋtsɔ lɛ jie mi kɛjɛ fɛɛ mli.+ 12  Anɔkwa, mɛi fɛɛ ni taoɔ akɛ amɛhi shi yɛ Nyɔŋmɔjamɔ naa yɛ Kristo Yesu mli lɛ, abaawa amɛ hu yi.+ 13  Shi gbɔmɛi fɔji kɛ shishiulɔi baawo wu yɛ efɔŋ mli, ni amɛbaalaka mɛi ni amɛ hu abaalaka amɛ.+ 14  Shi bo lɛ, yaa nɔ ohi shi yɛ nibii ni okase ni hã oyiŋ tsɔ ni ohe oye lɛ amli,+ ejaakɛ ole mɛi aŋɔɔ ni okase yɛ, 15  ni akɛ, obifabiiaŋ+ ojɛ ole ŋmalɛi krɔŋkrɔŋi lɛ,+ nɔ ni baanyɛ ahã otsɔ hiɛshikalɔ ni ahere oyiwala akɛni oyɛ Kristo Yesu mli hemɔkɛyeli lɛ hewɔ.+ 16  Ŋmalɛ muu lɛ fɛɛ jɛ Nyɔŋmɔ mumɔ lɛŋ,+ ni ehe yɛ sɛɛnamɔ kɛhã nitsɔɔmɔ,+ kɛhã mɔjajemɔ, kɛhã nibii ajajemɔ,* kɛhã tsɔsemɔ yɛ jalɛ mli,+ 17  koni Nyɔŋmɔ gbɔmɔ lɛ afee mɔ ni sa jogbaŋŋ, ni asaa lɛ jogbaŋŋ kɛhã nitsumɔ kpakpa fɛɛ nitsumɔ kpakpa.

Shishigbɛ Niŋmaa

Loo “musubɔlɔi.”
Loo “shi amɛkwa emli hewalɛ.”
Loo “amɛkwashiafeemɔ.”
Loo “mɔsaamɔ.”