Klɛŋklɛŋ Wolo Ni Akɛmaje Korintobii Lɛ 15:1-58
15 Agbɛnɛ nyɛmimɛi, miikai nyɛ sane kpakpa ni mijaje mitsɔɔ nyɛ,+ ni nyɛ hu nyɛmɔ mli, ni nyɛdamɔ shi shiŋŋ yɛ mli hu lɛ.
2 Kɛ́ nyɛhiɛ sane kpakpa ni mijaje mitsɔɔ nyɛ lɛ mli kpɛŋŋ lɛ, abaatsɔ no nɔ hu ahere nyɛyiwala, ja nyɛhe Nuŋtsɔ lɛ nɔ nyɛye efolo.
3 Ejaakɛ klɛŋklɛŋ nibii ni mikɛhã nyɛ ni mi hu miná lɛ ateŋ ekomɛi ji akɛ, Kristo gbo yɛ wɔhe eshai ahewɔ tamɔ bɔ ni Ŋmalɛ lɛ tsɔɔ lɛ;+
4 ni akɛ afu lɛ,+ hɛɛ, akɛ atee lɛ shi+ yɛ gbi ni ji etɛ lɛ nɔ+ tamɔ bɔ ni Ŋmalɛ lɛ tsɔɔ lɛ;+
5 ni akɛ ejie ehe kpo etsɔɔ Kefa,*+ ni no sɛɛ lɛ Mɛi Nyɔŋma Kɛ Enyɔ lɛ.+
6 No sɛɛ lɛ, ejie ehe kpo etsɔɔ nyɛmimɛi ni fa fe 500 yɛ be kome mli,+ mɛi ni amɛteŋ mɛi babaoo kɛ wɔ yɔɔ lolo, shi amɛteŋ mɛi komɛi egboi* lɛ.
7 Enɛ sɛɛ lɛ, ejie ehe kpo etsɔɔ Yakobo,+ ni no sɛɛ lɛ bɔfoi lɛ fɛɛ.+
8 Shi amɛ fɛɛ amɛsɛɛ lɛ, ejie ehe kpo etsɔɔ mi+ hu tamɔ mɔ ko ni be shɛɛɛ ni afɔ lɛ.
9 Ejaakɛ miji bibioo kwraa yɛ bɔfoi lɛ ateŋ, ni misaaa mɔ ni atsɛɔ lɛ bɔfo po, ejaakɛ miwa Nyɔŋmɔ asafo lɛ yi.+
10 Shi Nyɔŋmɔ dromɔ naa miji mɔ ni miji nɛɛ. Ni edromɔ ni edro mi lɛ efeee efolo, shi moŋ mitsu nii waa fe amɛteŋ mɔ fɛɛ mɔ; shi jeee mi, shi Nyɔŋmɔ dromɔ ni kɛ mi yɔɔ lɛ ni.
11 No hewɔ lɛ, kɛ́ mi ni jio, amɛ ni jio, bɔ ni wɔshiɛɔ nɛ, ni bɔ ni nyɛhe nyɛye nɛ.
12 Agbɛnɛ, kɛ́ aashiɛ akɛ atee Kristo shi kɛjɛ gbohii ateŋ lɛ,+ te tɛŋŋ ni nyɛteŋ mɛi komɛi kɛɔ akɛ gbohiiashitee ko bɛ lɛ?
13 Anɔkwa, kɛ́ gbohiiashitee ko bɛ lɛ, belɛ ateko Kristo shi.
14 Shi kɛ́ ateko Kristo shi lɛ, no lɛ ekã shi faŋŋ akɛ wɔshiɛmɔ lɛ efee efolo, ni nyɛhemɔkɛyeli lɛ hu efee efolo.
15 Agbɛnɛ hu, akpa wɔ shi hu akɛ Nyɔŋmɔ he amale odasefoi ji wɔ,+ ejaakɛ wɔyeɔ odase wɔshiɔ Nyɔŋmɔ ni wɔkɛɔ akɛ etee Kristo lɛ shi,+ mɔ ni kɛ́ eji anɔkwale akɛ ateee gbohii ashi lɛ, belɛ eteko lɛ shi lɛ.
16 Ejaakɛ kɛ́ ateee gbohii ashi lɛ, belɛ ateko Kristo hu shi.
17 Agbɛnɛ, kɛ́ ateko Kristo shi lɛ, no lɛ, sɛɛnamɔ bɛ nyɛhemɔkɛyeli lɛ he; nyɛkamɔ nyɛhe eshai lɛ amli lolo.+
18 Belɛ mɛi ni egboi* yɛ Kristo mli lɛ hu ahiɛ ekpãtã.+
19 Kɛ́ wala nɛɛ mli kɛkɛ wɔhiɛ kã Kristo nɔ yɛ lɛ, no lɛ, wɔnii yɛ mɔbɔ fe mɛi fɛɛ.
20 Shi agbɛnɛ, atee Kristo shi kɛjɛ gbohii ateŋ akɛ mɛi ni egboi* lɛ ateŋ klɛŋklɛŋ yibii.+
21 Akɛni gbele tsɔ gbɔmɔ nɔ kɛba hewɔ lɛ,+ gbohiiashitee hu baatsɔ gbɔmɔ nɔ kɛba.+
22 Ejaakɛ bɔ ni Adam mli ni mɛi fɛɛ gboiɔ yɛ lɛ,+ nakai nɔŋŋ hu Kristo lɛ mli abaahã mɛi fɛɛ ahiɛ akãmɔ yɛ.+
23 Shi mɔ fɛɛ mɔ yɛ lɛ diɛŋtsɛ egbɛhe ni sa: Kristo ji klɛŋklɛŋ yibii lɛ,+ no sɛɛ lɛ, mɛi ni ji Kristo lɛ nii lɛ, yɛ be ni eba lɛ mli.+
24 No sɛɛ lɛ, naagbee lɛ, be mli ni ekɛ Maŋtsɛyeli lɛ baahã e-Nyɔŋmɔ kɛ e-Tsɛ lɛ, be ni efo nɔyeli fɛɛ kɛ hegbɛ fɛɛ kɛ hewalɛ fɛɛ sɛɛ lɛ.+
25 Ejaakɛ esa akɛ eye maŋtsɛ kɛyashi Nyɔŋmɔ kɛ ehenyɛlɔi lɛ fɛɛ baawo enajiashi.+
26 Ni naagbee henyɛlɔ ni abaafo esɛɛ ji gbele.+
27 Ejaakɛ Nyɔŋmɔ “kɛ nibii fɛɛ wo enajiashi.”+ Shi kɛ́ ekɛɛ akɛ ‘akɛ nibii fɛɛ ewo eshishi’ lɛ,+ eyɛ faŋŋ akɛ mɔ ni kɛ nibii fɛɛ wo eshishi lɛ fataaa he.+
28 Shi kɛ́ akɛ nibii fɛɛ wo eshishi lɛ, no sɛɛ lɛ Bi lɛ diɛŋtsɛ hu kɛ ehe baawo mɔ ni kɛ nibii fɛɛ wo eshishi lɛ shishi,+ koni Nyɔŋmɔ atsɔ nibii fɛɛ ahã mɔ fɛɛ mɔ.+
29 Kɛjeee nakai lɛ, mɛni mɛi ni abaptisiɔ amɛ awoɔ gbele mli lɛ baafee?+ Kɛ́ ateee gbohii ashi kwraa lɛ, mɛni hewɔ abaptisiɔ amɛ awoɔ gbele mli lɛ mɔ?
30 Mɛni hewɔ wɔ hu wɔyɔɔ oshãra mli ŋmɛlɛtswaa fɛɛ ŋmɛlɛtswaa lɛ?*+
31 Daa gbi lɛ, mikɛ gbele kpeɔ hiɛ kɛ hiɛ. Nyɛmimɛi, enɛ ji anɔkwale shiishi, tamɔ shwãa ni mishwãa yɛ nyɛhewɔ yɛ Kristo Yesu, wɔ-Nuŋtsɔ lɛ mli lɛ.
32 Kɛ́ mikɛ kooloi awuiyelɔi wu yɛ Efeso tamɔ mɛi krokomɛi lɛ,*+ mɛɛ sɛɛnamɔ yɔɔ he kɛhã mi? Kɛ́ ateee gbohii ashi lɛ, no lɛ “nyɛhãa wɔyea ni wɔnua, ejaakɛ wɔ́ benɛ wɔgboi.”+
33 Nyɛkahãa alakaa nyɛ. Naanyobɔɔ gbonyo fiteɔ sui kpakpai.*+
34 Nyɛhɛlea shi yɛ jalɛ gbɛ nɔ, ni nyɛkayaa nɔ nyɛfea esha, ejaakɛ nyɛteŋ mɛi komɛi bɛ Nyɔŋmɔ he nilee. Miiwie enɛ ni mikɛwo nyɛ hiɛgbele.
35 Shi mɔ ko baakɛɛ akɛ: “Mɛɛ gbɛ nɔ abaatsɔ atee gbohii ashi? Hɛɛ, mɛɛ gbɔmɔtso amɛkɛbaaba?”+
36 Bo ni obɛ jwɛŋmɔ! Nɔ ni oduɔ lɛ, ja egbo dani ehiɛ baakã.
37 Ni nɔ ni oduɔ lɛ, jeee tso* ni baada lɛ oduɔ lɛ, shi moŋ dumɔwu kome ko kɛkɛ, wiiti jio, dumɔwu kroko jio;
38 shi Nyɔŋmɔ hãa lɛ tso bɔ ni esumɔɔ, ni ehãa dumɔwui lɛ eko fɛɛ eko, lɛ diɛŋtsɛ etso.
39 Esoro heloo fɛɛ heloo, esoro gbɔmɛi aheloo, ni esoro tsinai aheloo, ni esoro loofɔji aheloo, ni esoro nu mli loi aheloo.
40 Ni ŋwɛi gbɔmɔtsei yɛ,+ ni shikpɔŋ nɔ gbɔmɔtsei hu yɛ;+ shi esoro ŋwɛi gbɔmɔtsei lɛ anunyam, ni esoro shikpɔŋ nɔ gbɔmɔtsei lɛ hu anunyam.
41 Esoro hulu anunyam, ni esoro nyɔɔŋtsere hu anunyam,+ esoro ŋulamii anunyam; anɔkwa, esoro ŋulami kome anunyam yɛ ŋulami kroko nɔ he.
42 Nakai nɔŋŋ gbohiiashitee lɛ hu ji. Aduɔ gbɔmɔtso lɛ yɛ fitemɔ mli; ateɔ lɛ shi yɛ nɔ ni fiteee mli.+
43 Aduɔ gbɔmɔtso lɛ yɛ nɔ ni bɛ nyam mli; ateɔ lɛ shi yɛ anunyam mli.+ Aduɔ gbɔmɔtso lɛ yɛ nɔ ni he waaa mli; ateɔ lɛ shi yɛ hewalɛ mli.+
44 Aduɔ gbɔmɔtso lɛ akɛ heloŋ gbɔmɔtso; ateɔ lɛ shi akɛ mumɔŋ gbɔmɔtso. Kɛ́ heloŋ gbɔmɔtso yɛ lɛ, mumɔŋ gbɔmɔtso hu yɛ.
45 Nakai aŋma akɛ: “Klɛŋklɛŋ gbɔmɔ ni ji Adam lɛ tsɔ gbɔmɔ* ni hiɛ kã.”+ Naagbee Adam lɛ tsɔ mumɔ ni hãa wala.+
46 Shi jeee mumɔŋ nɔ lɛ ji klɛŋklɛŋ nɔ. Heloo nɔ lɛ ji klɛŋklɛŋ nɔ, ni no sɛɛ lɛ, mumɔŋ nɔ lɛ.
47 Klɛŋklɛŋ gbɔmɔ lɛ jɛ shikpɔŋ lɛ nɔ, ni sũ* akɛfee lɛ;+ gbɔmɔ ni ji enyɔ lɛ jɛ ŋwɛi.+
48 Bɔ ni mɔ ni akɛ sũ fee lɛ lɛ yɔɔ lɛ, nakai nɔŋŋ mɛi ni akɛ sũ fee amɛ lɛ hu yɔɔ; ni bɔ ni mɔ ni jɛ ŋwɛi lɛ yɔɔ lɛ, nakai nɔŋŋ mɛi ni yɔɔ ŋwɛi lɛ hu yɔɔ.+
49 Ni bɔ ni wɔtamɔ mɔ ni akɛ sũ fee lɛ lɛ,+ nakai nɔŋŋ wɔbaatsɔmɔ tamɔ mɔ ni jɛ ŋwɛi lɛ hu.+
50 Shi nyɛmimɛi, nɔ ni mikɛɔ nyɛ ji akɛ, heloo kɛ lá nine nyɛŋ ashɛ Nyɔŋmɔ Maŋtsɛyeli lɛ nɔ, ni nɔ ni fiteɔ hu nine nyɛŋ ashɛ nɔ ni nyɛŋ afite nɔ.
51 Naa! Miikɛɛ nyɛ teemɔŋ sane ko: Jeee wɔ fɛɛ wɔbaagboi,* shi abaatsake wɔ fɛɛ,+
52 amrɔ nɔŋŋ, yɛ hiŋmɛitswaa kome mli, be mli ni akpãa naagbee tɛtɛrɛmantɛrɛ lɛ. Ejaakɛ tɛtɛrɛmantɛrɛ lɛ baagbɛɛ,+ ni abaatee gbohii lɛ ashi akɛ mɛi ni nyɛŋ afite, ni abaatsake wɔ.
53 Ejaakɛ esa akɛ nɔ ni fiteɔ nɛɛ awo nɔ ni nyɛŋ afite,+ ni nɔ ni gboɔ nɛɛ awo nɔ ni nyɛŋ agbo.+
54 Shi kɛ́ nɔ ni fiteɔ nɛɛ wo nɔ ni nyɛŋ afite, ni nɔ ni gboɔ nɛɛ wo nɔ ni nyɛŋ agbo lɛ, no lɛ, wiemɔ ni aŋma lɛ baaba mli akɛ: “Ami gbele kɛtee naanɔ.”+
55 “Gbele, nɛgbɛ okunimyeli lɛ yɔɔ? Gbele, nɛgbɛ nɔ ni okɛtsɛ̃ɔ mɔ lɛ yɔɔ?”+
56 Tsɛ̃mɔ ni kɛ gbele baa ji esha,+ ni esha hewalɛ ji Mla lɛ.*+
57 Shi shidaa ahã Nyɔŋmɔ, ejaakɛ lɛ etsɔɔ wɔ-Nuŋtsɔ Yesu Kristo nɔ ehãa wɔyeɔ kunim lɛ!+
58 No hewɔ lɛ, minyɛmimɛi ni misumɔɔ, nyɛfia shi shiŋŋ,+ nyɛkagbugbaa, ni be fɛɛ be lɛ, nyɛtsua babaoo+ yɛ Nuŋtsɔ lɛ nitsumɔ lɛ mli, ejaakɛ nyɛle akɛ nitsumɔ ni nyɛtsuɔ waa yɛ Nuŋtsɔ lɛ mli lɛ efeŋ efolo.+
Shishigbɛ Niŋmaa
^ Atsɛɔ lɛ Petro hu.
^ Loo “ewɔ.”
^ Loo “ewɔ.”
^ Loo “ewɔ.”
^ Loo “be fɛɛ be lɛ?”
^ Shishitsɔɔmɔi komɛi kɛɔ akɛ, “yɛ gbɔmɛi asusumɔ naa lɛ.”
^ Loo “fiteɔ jeŋba kpakpa.”
^ Greek sht. ŋm., “gbɔmɔtso.”
^ Loo “susuma.”
^ Greek sht. ŋm., “mulu.”
^ Loo “wɔbaawɔ.”
^ Loo “esha náa hewalɛ kɛjɛɔ Mla lɛ dɛŋ.”
