Klɛŋklɛŋ Wolo Ni Akɛmaje Timoteo 1:1-20

  • Ŋamɔ (1, 2)

  • Amale tsɔɔlɔi ahe kɔkɔbɔɔ (3-11)

  • Adro Paulo (12-16)

  • Naanɔi a-Maŋtsɛ (17)

  • ‘Wu ta kpakpa lɛ’ (18-20)

1  Paulo, Kristo Yesu bɔfo yɛ Nyɔŋmɔ, wɔ-Yiwalaherelɔ lɛ, kɛ Kristo Yesu, wɔhiɛnɔkamɔ lɛ,+ famɔ naa,  kɛ wolo nɛɛ miimaje Timoteo,*+ bi krɔŋŋ+ yɛ hemɔkɛyeli lɛ mli: Dromɔ kɛ mɔbɔnalɛ kɛ toiŋjɔlɛ ni jɛ Nyɔŋmɔ, ni ji Tsɛ lɛ, kɛ Kristo Yesu, wɔ-Nuŋtsɔ lɛ dɛŋ ahã bo.  Bɔ ni miwo bo hewalɛ akɛ ohi Efeso be ni mibaya Makedonia lɛ, nakai nɔŋŋ mifeɔ amrɔ nɛɛ, koni ofã mɛi komɛi akɛ amɛkatsɔɔ tsɔɔmɔ kroko,  ni amɛkɛ amɛjwɛŋmɔ akaya adesãi+ kɛ wekutɔkpai anɔ hu. Sɛɛnamɔ ko jɛɛɛ nibii nɛɛ amli kɛbaaa,+ shi moŋ ehãa akaa yiŋ awieɔ moŋ fe nɔ ni eeehã aná nɔ ko ni jɛ Nyɔŋmɔ ŋɔɔ ni kɛ hemɔkɛyeli yɔɔ tsakpãa.  Anɔkwa, yiŋtoo ni yɔɔ gbɛtsɔɔmɔ* nɛɛ sɛɛ ji suɔmɔ+ ni jɛ tsui ni mli tse kɛ henilee kpakpa kɛ hemɔkɛyeli+ ni osato bɛ mli lɛ mli.  Akɛni mɛi komɛi je nibii nɛɛ asɛɛ hewɔ lɛ, amɛku amɛsɛɛ kɛtee wiemɔi ni sɛɛnamɔ bɛ he lɛ ahe.+  Amɛmiitao ni amɛtsɔmɔ mlatsɔɔlɔi,+ shi amɛnuuu nibii ni amɛwieɔ loo nibii ni amɛmaa nɔ mi veveeve lɛ ashishi.  Agbɛnɛ wɔle akɛ Mla lɛ hi kɛji mɔ ko kɛtsu nii yɛ gbɛ ni sa nɔ,*  ni eyɔse akɛ, jeee jalɔ hewɔ awoɔ mla, shi moŋ awoɔ ahãa mlatɔlɔi+ kɛ atuatselɔi, mɛi ni ebuuu Nyɔŋmɔ kɛ eshafeelɔi, mɛi ni yeee anɔkwa* kɛ mɛi ni buleɔ krɔŋkrɔŋ nibii, tsɛmɛi kɛ nyɛmɛi agbelɔi, gbɔmɔgbelɔi, 10  ajwamaŋbɔlɔi,* hii ni kɛ hii náa bɔlɛ,* gbɔmɔjulɔi, amalelɔi, kitãmlikulɔi,* kɛ nibii krokomɛi fɛɛ ni teɔ shi woɔ tsɔɔmɔ ni hãa mɔ náa hewalɛ*+ 11  yɛ miishɛɛ Nyɔŋmɔ lɛ sane kpakpa ni yɔɔ nyam ni atu awo midɛŋ lɛ naa.+ 12  Miida wɔ-Nuŋtsɔ Kristo Yesu, mɔ ni hã mi hewalɛ lɛ shi, ejaakɛ ebu mi anɔkwafo, ni ekɛ sɔɔmɔ wo midɛŋ,+ 13  eyɛ mli akɛ tsutsu lɛ miji mɔ ko ni wieɔ wiemɔi fɔji* kɛ yiwalɔ kɛ mɔ ni ebuuu nɔ ko moŋ.+ Shi ana mi mɔbɔ ejaakɛ lé ni mileee kɛ hemɔkɛyeli ni mibɛ hewɔ mifee nakai. 14  Shi wɔ-Nuŋtsɔ lɛ dromɔ lɛ fa aahu kɛteke nɔ, ni nɔ ni fata he ji hemɔkɛyeli kɛ suɔmɔ ni yɔɔ Kristo Yesu mli lɛ. 15  Anɔkwa wiemɔ ni sa akɛ amɔ mli kwraa nɛ: Kristo Yesu ba je lɛ mli koni ebahere eshafeelɔi ayiwala.+ Miji mɛi nɛɛ ateŋ mɔ ni ehiii fe fɛɛ.+ 16  Shi ana mi mɔbɔ, koni Kristo Yesu atsɔ mi ni miji eshafeelɔi ateŋ mɔ ni ehiii fe fɛɛ lɛ nɔ ejie etsuishitoo lɛ fɛɛ kpo, ni ekɛ mi afee nɔkwɛmɔnɔ ehã mɛi ni kɛ amɛhemɔkɛyeli lɛ baakpasa lɛ koni amɛná naanɔ wala lɛ.+ 17  Agbɛnɛ akɛ woo kɛ anunyam ahã naanɔi a-Maŋtsɛ lɛ,+ mɔ ni fiteee,+ ni anaaa lɛ,+ Nyɔŋmɔ kome lɛ,+ kɛya naanɔi anaanɔ. Amen. 18  Mibi Timoteo, miitu gbɛtsɔɔmɔ* nɛɛ miiwo odɛŋ, yɛ gbalɛi ni agba yɛ ohe lɛ kɛ gbeekpamɔ naa, koni oya nɔ okɛ nomɛi awu ta kpakpa lɛ,+ 19  ni ohiɛ hemɔkɛyeli kɛ henilee kpakpa,+ nɔ ni mɛi komɛi tsi amɛto afã ni amɛkɛ amɛhemɔkɛyeli lɛ yasha shi lɛ. 20  Mɛi nɛɛ ateŋ mɛi komɛi ji Himeneo+ kɛ Aleksanda, ni mikɛ amɛ ewo Satan dɛŋ+ koni atsɔ tsɔsemɔ nɔ atsɔɔ amɛ akɛ esaaa akɛ amɛwieɔ wiemɔ fɔŋ.*

Shishigbɛ Niŋmaa

Eshishi ji, “Mɔ Ni Woɔ Nyɔŋmɔ Hiɛ Nyam.”
Loo “kitã; famɔ.”
Greek sht. ŋm., “yɛ mla naa.”
Loo “mɛi ni ejieee suɔmɔ ní tsakeee kpo.”
Kwɛmɔ Wiemɔi Titrii Amligbalamɔ lɛ, “Ajwamaŋbɔɔ.”
Greek sht. ŋm., “hii ni kɛ hii wɔɔ.”
Loo “amale kitãkalɔi.”
Loo “ni tsaa mɔ; ni sɛɛnamɔ yɔɔ he.”
Loo “miji musubɔlɔ.”
Loo “kitã; famɔ.”
Loo “amɛbɔɔ musu.”