Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Klɛŋklɛŋ Wolo Ni Akɛmaje Timoteo 5:1-25

EMLI SAJI

  • Bɔ ni esa akɛ okɛ gbekɛbii kɛ onukpai aye ahã (1, 2)

  • Yei okulafoi ayelikɛbuamɔ (3-16)

    • Esa akɛ mɔ akwɛ lɛ diɛŋtsɛ eshĩabii (8)

  • Okɛ woo ahã asafoŋ onukpai ni tsuɔ nii waa lɛ (17-25)

    • ‘Wain fioo yɛ omusu lɛ hewɔ’ (23)

5  Kaawie nuu onukpa ko hiɛ nyanyaanya.+ Moŋ lɛ, okɛ mlihilɛ awie otsɔɔ lɛ akɛ tsɛ, oblahii hu akɛ nyɛmimɛi hii,  yei onukpai hu akɛ nyɛmɛi, oblayei hu akɛ nyɛmimɛi yei, yɛ hetsemɔ fɛɛ mli.  Susumɔ* yei okulafoi ni ji okulafoi lɛɛlɛŋ* lɛ ahe.+  Shi kɛ́ yoo okulafo ko yɛ bii loo nabii lɛ, amɛkase Nyɔŋmɔjamɔ yɛ amɛ diɛŋtsɛ amɛshĩa klɛŋklɛŋ,+ ni amɛto amɛfɔlɔi kɛ amɛniimɛi kɛ amɛnaamɛi anajiaŋ kɛ nɔ ni sa amɛ,+ ejaakɛ enɛ sa Nyɔŋmɔ hiɛ.+  Agbɛnɛ, yoo ni ji yoo okulafo lɛɛlɛŋ ni bɛ mɔ ko ni baakwɛ lɛ lɛ kɛ ehiɛ fɔ̃ɔ Nyɔŋmɔ nɔ,+ ni eyaa nɔ ekɛ hiɛdɔɔ kpaa Nyɔŋmɔ fai ni esɔleɔ jenamɔ kɛ jetsɛremɔ.+  Shi yoo ni ŋmɛɔ ehe ehãa heloo lɛ akɔnɔ lɛ, ehiɛ kã moŋ shi egbo.  No hewɔ lɛ, yaa nɔ okɛ gbɛtsɔɔmɔi* nɛɛ ahã, koni akaná amɛhe sane fɔŋ ko awie.  Ekã shi faŋŋ akɛ, kɛ́ mɔ ko kwɛɛɛ lɛ diɛŋtsɛ emɛi, kɛ titri lɛ, lɛ diɛŋtsɛ eshĩabii lɛ, ekwa hemɔkɛyeli lɛ, ni eji gbɔmɔ gbonyo fe mɔ ni bɛ hemɔkɛyeli.+  Dani akɛ yoo okulafo ko baafata mɛi ni aŋmala amɛgbɛ́ii lɛ ahe lɛ, esa akɛ efee mɔ ni ená afii 60 kɛyaa, ŋa ni kɛ wu kome hi shi, 10  mɔ ni awieɔ ehe ekpakpa akɛ etsu nitsumɔi kpakpai,+ no ji akɛ, etsɔse bii,+ efee mɛi agbɔ,+ efɔ mɛi krɔŋkrɔŋi anaji ahe,+ eye ebua mɛi ni naa amanehulu lɛ,+ ekɛ ehe hã kɛtsu nitsumɔ kpakpa fɛɛ nitsumɔ kpakpa. 11  Shi okɛ yei okulafoi ni darako lɛ akafata mɛi ni aŋmala amɛgbɛ́ii lɛ ahe, ejaakɛ kɛ́ amɛbɔlɛnamɔ akɔnɔi lɛ bafee gbɛtsiinii yɛ amɛ kɛ Kristo lɛ teŋ lɛ, amɛsumɔɔ akɛ amɛbote gbalashihilɛ mli. 12  Ni abaagbala amɛtoi ejaakɛ amɛŋmɛɛ amɛklɛŋklɛŋ hemɔkɛyeli ni amɛjaje lɛ* he. 13  Yɛ nakai be lɛ mli nɔŋŋ lɛ, amɛkaseɔ anihao hu, ni amɛkpaa shi kɛjɛɔ shĩa kome kɛyaa shĩa kroko; hɛɛ, jeee anihao kɛkɛ amɛfeɔ, shi moŋ, amɛwieɔ mɛi ahe, ni amɛkɛ amɛhe woɔ mɛi asaji amli hu,+ amɛwieɔ nibii ni esaaa akɛ amɛwieɔ. 14  No hewɔ lɛ, miisumɔ akɛ yei okulafoi ni darako lɛ abote gbalashihilɛ mli,+ amɛfɔ bii,+ amɛkwɛ amɛshĩa, amɛkahã shiteekɛwolɔ lɛ miiná hegbɛ ko kwraa kɛmiiwie eeshi wɔ. 15  Anɔkwa, mɛi komɛi eku amɛsɛɛ kɛyanyiɛ Satan sɛɛ momo. 16  Kɛ́ yoo ko ni heɔ Nuŋtsɔ lɛ nɔ eyeɔ lɛ yɛ wekumɛi ni ji yei okulafoi lɛ, eye ebua amɛ, koni jatsu akakã asafo lɛ nɔ. Ni no baahã asafo lɛ anyɛ aye abua mɛi ni ji yei okulafoi lɛɛlɛŋ* lɛ.+ 17  Asafoŋ onukpai lɛ, ni ji mɛi ni kwɛɔ nii anɔ jogbaŋŋ lɛ,+ abu amɛ akɛ amɛsa woo toi enyɔ,+ titri lɛ, mɛi ni tsuɔ nii waa yɛ wiemɔ kɛ nitsɔɔmɔ mli lɛ.+ 18  Ejaakɛ ŋmalɛ lɛ kɛɔ akɛ, “Kaawo tsina naabu kotoku be ni eegbee ŋmaa,”*+ kɛ agbɛnɛ hu, “Nitsulɔ lɛ, enyɔmɔwoo sa lɛ.”+ 19  Kɛ́ akɛ sane fɔ̃ asafoŋ onukpa ko nɔ lɛ, kaakpɛlɛ nɔ, ja odasefoi enyɔ loo etɛ eye he odase dã.+ 20  Mɛi ni yaa nɔ amɛfeɔ esha lɛ, jajemɔ amɛ+ yɛ mɛi fɛɛ ahiɛ,+ koni no afee kɔkɔbɔɔ kɛhã mɛi ni eshwɛ lɛ.* 21  Mikɛ hiɛdɔɔ miifã bo yɛ Nyɔŋmɔ kɛ Kristo Yesu kɛ ŋwɛibɔfoi ni ahala lɛ ahiɛ akɛ okɛ gbɛtsɔɔmɔi nɛɛ atsu nii, ni okaye ohe oyai okojo, ni okafee nɔ ko kɛ hiɛiaŋkwɛmɔ.+ 22  Okɛ oniji okaŋmɛ mɔ ko nɔ oya;*+ ni kaaná gbɛfaŋnɔ yɛ mɛi krokomɛi ahe eshai amli; yaa nɔ onyiɛ yɛ hetsemɔ mli. 23  Kaanu nu dɔŋŋ,* shi nuu wain fioo yɛ omusu kɛ ohe ni yeɔ kpitiokpitio lɛ hewɔ. 24  Mɛi komɛi ahe eshai jeɔ kpo faŋŋ, ni no kɛ amɛ yaa kojomɔ mli amrɔ nɔŋŋ, shi mɛi krokomɛi anɔ feɔ faŋŋ sɛɛ mli.+ 25  Nakai nɔŋŋ hu nitsumɔi kpakpai jeɔ kpo faŋŋ,+ ni nɔ ni ejeee kpo faŋŋ lɛ hu anyɛŋ aya nɔ akɛtee.+

Shishigbɛ Niŋmaa

Greek sht. ŋm., “Okɛ woo ahã.”
Loo “yei okulafoi ni ehia amɛ lɛɛlɛŋ”; ni tsɔɔ akɛ, amɛbɛ mɔ ko ni yeɔ ebuaa amɛ.
Loo “famɔi.”
Loo “amɛtsutsu shiwoo lɛ.”
Loo “yei okulafoi ni ehia amɛ lɛɛlɛŋ”; ni tsɔɔ akɛ, amɛbɛ mɔ ko ni yeɔ ebuaa amɛ.
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Greek sht. ŋm., “koni mɛi ni eshwɛ lɛ ashe gbeyei.”
Ni tsɔɔ akɛ, okɛ oyaiyeli akahala mɔ ko.
Loo “Kaanu nu sɔŋŋ.”