Wolo Ni Akɛmaje Romabii Lɛ 2:1-29

  • Nyɔŋmɔ baakojo Yudafoi kɛ Greekbii fɛɛ (1-16)

    • Bɔ ni henilee tsuɔ nii ehãa (14, 15)

  • Yudafoi lɛ kɛ Mla lɛ (17-24)

  • Tsui lɛ ketiafoo (25-29)

2  No hewɔ lɛ, bo gbɔmɔ, ekɔɔɔ he eko mɔ ni oji,+ kɛ́ okojo lɛ, obɛ naajiemɔ ko; ejaakɛ kɛ́ okojo mɔ kroko lɛ, obuɔ bo diɛŋtsɛ ohe fɔ, ejaakɛ bo mɔ ni okojoɔ mɛi lɛ, nakai nibii lɛ nɔŋŋ ofeɔ.+  Agbɛnɛ, wɔle akɛ Nyɔŋmɔ kojoɔ mɛi ni feɔ nibii nɛɛ, ni ekojomɔ lɛ kɛ anɔkwale kpãa gbee.  Shi bo gbɔmɔ, be mli ni okojoɔ mɛi ni feɔ nibii nɛɛ ni bo hu ofeɔ nakai nibii lɛ nɔŋŋ eko lɛ, ani osusuɔ akɛ bo lɛ, obaajo Nyɔŋmɔ kojomɔ lɛ naa foi?  Aloo bu ni obuuu emlihilɛ+ babaoo kɛ etsui mli ni emɔɔ waa*+ kɛ etsuishitoo lɛ,+ akɛni oleee akɛ Nyɔŋmɔ miibɔ mɔdɛŋ ni enyiɛ ohiɛ kɛya tsuitsakemɔ mli yɛ emlihilɛ lɛ naa lɛ hewɔ?+  Shi okɛ okuɛŋtimɔ kɛ otsui ni otsakeee lɛ miibua mlifu naa oohã bo diɛŋtsɛ ohe kɛmiito mlifu kɛ Nyɔŋmɔ jalɛ kojomɔ kpojiemɔ gbi lɛ.+  Ni ebaawo mɔ fɛɛ mɔ nyɔmɔ bɔ ni sa enitsumɔi lɛ:+  mɛi ni fiɔ shi yɛ nitsumɔ kpakpa mli kɛtaoɔ anunyam kɛ woo kɛ nii ni fiteee lɛ,+ ebaahã amɛ naanɔ wala;  shi mɛi ni sumɔɔ béi* ni amɛbooo anɔkwale lɛ toi shi amɛboɔ nii ni ejaaa toi lɛ, amɛnɔ ji mlifu kɛ mlila.+  Amanehulu kɛ haomɔ baaba gbɔmɔ fɛɛ gbɔmɔ* ni feɔ nibii ni yeɔ mɔ awui lɛ nɔ, Yudanyo klɛŋklɛŋ, kɛ agbɛnɛ hu, Greeknyo; 10  shi anunyam kɛ woo kɛ toiŋjɔlɛ baaba mɔ fɛɛ mɔ ni tsuɔ nitsumɔi kpakpai lɛ nɔ, Yudanyo klɛŋklɛŋ,+ kɛ agbɛnɛ hu Greeknyo.+ 11  Ejaakɛ Nyɔŋmɔ lɛ, ekwɛɛɛ hiɛiaŋ.+ 12  Ejaakɛ mɛi fɛɛ ni bɛ mla ni amɛfee esha lɛ, amɛhiɛ baakpãtã akɛ mɛi ni bɛ mla;+ shi mɛi fɛɛ ni yɔɔ mla shishi ni amɛfee esha lɛ, mla nɔŋŋ akɛbaakojo amɛ.+ 13  Ejaakɛ jeee mɛi ni nuɔ mla lɛ ji jalɔi yɛ Nyɔŋmɔ hiɛ, shi mɛi ni kɛ mla tsuɔ nii lɛ, abaabu amɛ jalɔi.+ 14  Ejaakɛ kɛ́ jeŋmajiaŋbii ni bɛ mla+ lɛ jɛɔ amɛfɔmɔ su mli amɛtsuɔ mla lɛ naa nii lɛ, mɛi nɛɛ, eyɛ mli akɛ amɛbɛ mla moŋ, shi amɛji mla kɛhã amɛ diɛŋtsɛ amɛhe. 15  Amɛ diɛŋtsɛ amɛtsɔɔ akɛ aŋma mla lɛ nitsumɔ lɛ yɛ amɛtsuii amli, ni yɛ nakai be lɛ mli nɔŋŋ lɛ, amɛhenilee yeɔ amɛ odase, ni amɛ diɛŋtsɛ amɛsusumɔi buɔ amɛ fɔ, loo ebuɔ amɛ bem. 16  Enɛ baaba mli yɛ gbi ni Nyɔŋmɔ baatsɔ Kristo Yesu nɔ ekojo gbɔmɛi ateemɔŋ nii lɛ nɔ,+ yɛ sane kpakpa ni mijajeɔ lɛ naa. 17  Agbɛnɛ, kɛ́ atsɛɔ bo Yudanyo,+ ni okɛ ohe fɔ̃ɔ mla nɔ ni oshwãa ofɔ̃ɔ Nyɔŋmɔ nɔ, 18  ni ole esuɔmɔnaa nii, ni onáa nibii ni hi jogbaŋŋ lɛ ahe miishɛɛ ejaakɛ atsɔɔ* bo nii kɛjɛ Mla lɛ mli,+ 19  ni oná nɔmimaa akɛ oji shwilafoi agbɛtsɔɔlɔ, la kɛhã mɛi ni yɔɔ duŋ mli, 20  kwashiai atsɔselɔ, gbekɛbii bibii atsɔɔlɔ, ni oyɛ nilee kɛ anɔkwale ni yɔɔ Mla lɛ mli lɛ he mfoniri lɛ— 21  shi bo mɔ ni otsɔɔ mɔ kroko nii lɛ, ani otsɔɔɔ bo diɛŋtsɛ ohe nii?+ Bo mɔ ni oshiɛɔ akɛ, “Kaaju” lɛ,+ ani ojuɔ? 22  Bo mɔ ni okɛɔ akɛ, “Kaafite gbãla” lɛ,+ ani ofiteɔ gbãla?* Bo mɔ ni ohiɔ amagai lɛ, ani ojuɔ sɔlemɔ shĩai amli nii? 23  Bo mɔ ni okɛ mla shiɔ otsitsi lɛ, ani otɔ̃ɔ Mla lɛ nɔ kɛgbeɔ Nyɔŋmɔ he guɔ? 24  Ejaakɛ “nyɛhewɔ lɛ, awieɔ Nyɔŋmɔ gbɛ́i lɛ he efɔŋ* yɛ jeŋmaji lɛ ateŋ,” tamɔ bɔ ni aŋma lɛ.+ 25  Anɔkwa, kɛ́ oyeɔ mla nɔ lɛ,+ kulɛ ketiafoo+ he yɛ sɛɛnamɔ; shi kɛ́ oji mlatɔlɔ lɛ, oketiafoo lɛ ebatsɔ ketia ni afoko. 26  No hewɔ lɛ, kɛ́ mɔ ko ni afoko lɛ ketia+ hiɔ shi yɛ Mla lɛ mli jalɛ taomɔ nii lɛ anaa lɛ, ani abuŋ eketia ni afoko lɛ akɛ ketiafoo?+ 27  Ni mɔ ni afoko lɛ ketia yɛ heloonaa ni yeɔ Mla lɛ nɔ lɛ kojoɔ bo mɔ ni oyɔɔ mla ni aŋma lɛ, ni afo bo ketia hu, shi otɔ̃ɔ mla lɛ. 28  Ejaakɛ jeee mɔ ni ji Yudanyo yɛ kponɔgbɛ lɛ ji Yudanyo lɛɛlɛŋ,+ ni agbɛnɛ hu, jeee ketia ni afo yɛ heloo lɛ mli yɛ kponɔgbɛ lɛ ji ketiafoo lɛɛlɛŋ.+ 29  Shi mɔ ni ji Yudanyo yɛ mligbɛ lɛ ji Yudanyo lɛɛlɛŋ,+ ni eketiafoo lɛ ji tsui mli nɔ+ ni atsɔ mumɔ lɛ nɔ afo shi jeee mla ko ni aŋma nɔ.+ Nakai mɔ lɛ yijiemɔ lɛ, Nyɔŋmɔ ŋɔɔ ejɛɔ, shi jeee gbɔmɛi aŋɔɔ.+

Shishigbɛ Niŋmaa

Loo “tsui ní enáa.”
Loo “mansɔ̃tsɔɔ.”
Loo “gbɔmɔ fɛɛ gbɔmɔ susuma.”
Loo “akɛ naabu etsɔɔ.”
Kɛ́ mɔ ko ni ebote gbalashihilɛ mli yabɔ ajwamaŋ lɛ, no ji gbalafitemɔ.
Loo “Nyɔŋmɔ gbɛ́i lɛ he musubɔɔ wiemɔ.”