Yakobo Wolo Lɛ 1:1-27

  • Ŋamɔ (1)

  • Shifimɔ hãa anáa miishɛɛ (2-15)

    • Hemɔkɛyeli ni aka akwɛ (3)

    • Yaa nɔ obi yɛ hemɔkɛyeli mli (5-8)

    • Nɔ ni ashweɔ lɛ kɛ mɔ yaa esha kɛ gbele mli (14, 15)

  • Nikeenii kpakpai fɛɛ jɛɔ ŋwɛi (16-18)

  • Wiemɔ lɛ numɔ kɛ ekɛnitsumɔ (19-25)

    • Gbɔmɔ ni miikwɛ ashwishwɛ mli (23, 24)

  • Jamɔ ni he tse ni abuleko (26, 27)

1  Yakobo,+ Nyɔŋmɔ kɛ Nuŋtsɔ Yesu Kristo nyɔŋ, kɛ wolo nɛɛ miimaje wekui 12 ni egbɛ eshwã lɛ: Miiŋa nyɛ!  Minyɛmimɛi, kɛ́ nyɛkɛ shihilɛi ni mli wawai* srɔtoi kpe lɛ, nyɛbua lɛ miishɛɛ sɔŋŋ,+  ejaakɛ nyɛle akɛ nyɛhemɔkɛyeli ni aka akwɛ yɛ nɛkɛ gbɛ nɔ lɛ kɛ shifimɔ baa.+  Shi nyɛhãa shifimɔ lɛ agbea enitsumɔ naa, koni nyɛye emuu ni nyɛhi kɛwula shi yɛ gbɛ fɛɛ gbɛ nɔ, koni ekashwɛ nyɛ nɔ ko.+  No hewɔ lɛ, kɛ́ hiɛshikamɔ ehia nyɛteŋ mɔ ko lɛ, eya nɔ ebi Nyɔŋmɔ,+ ejaakɛ ejɛɔ etsui mli ekɛhãa mɛi fɛɛ ni etekeɔ nɔ, ni ewieee mɔ hiɛ,*+ ni abaahã lɛ.+  Shi eya nɔ ebi yɛ hemɔkɛyeli mli,+ ni eyiŋ akafee lɛ kɔshikɔshi kwraa,+ ejaakɛ mɔ ni yiŋ feɔ lɛ kɔshikɔshi lɛ, etamɔ ŋshɔke ni kɔɔyɔɔ tswaa kɛyaa kɛbaa.  Anɔkwa, nakai gbɔmɔ lɛ, ekakpa gbɛ akɛ ebaaná nɔ ko kɛjɛ Yehowa* dɛŋ;  eji jwɛŋmɔi enyɔnyɔɔnyɔtsɛ,+ ni efiii shi yɛ egbɛi fɛɛ amli.  Shi nyɛmi ni ehia lɛ yɛ shihilɛ mli lɛ, emii ashɛ ehe* yɛ enɔ ni awó lɛ hewɔ,+ 10  ni niiatsɛ lɛ hu, yɛ shi ni aba lɛ lɛ hewɔ,+ ejaakɛ ebaaho eya tamɔ jwɛiaŋ fɔfɔi. 11  Ejaakɛ bɔ ni hulu teɔ shi ni etsoɔ waa ni eŋalaa kwɛ̃ɛ nii, ni kwɛ̃ɛ nii lɛ fɔfɔi lɛ kpalaa shwieɔ shi, ni efɛo lɛ fiteɔ lɛ, nakai nɔŋŋ niiatsɛ lɛ hu hiɛ baakpãtã yɛ nibii ni etiuɔ sɛɛ lɛ amli.+ 12  Gbɔmɔ ni yaa nɔ efiɔ shi yɛ shihilɛ ni mli wa mli lɛ yɛ miishɛɛ,+ ejaakɛ kɛ́ Nyɔŋmɔ ná ehe miishɛɛ lɛ, ebaaná wala akekere lɛ,+ nɔ ni Yehowa* wo shi akɛ ekɛbaahã mɛi ni yaa nɔ amɛsumɔɔ lɛ lɛ.+ 13  Kɛ́ mɔ ko kɛ shihilɛ ni mli wa ko miikpe lɛ, ekakɛɛ akɛ: “Nyɔŋmɔ miika mi.” Ejaakɛ anyɛŋ akɛ nibii fɔji aka Nyɔŋmɔ, ni lɛ diɛŋtsɛ hu ekaaa mɔ ko. 14  Shi mɔ fɛɛ mɔ lɛ, nɔ ni lɛ diɛŋtsɛ eshweɔ lɛ, no gbalaa lɛ ni elakaa lɛ,* ni enɛ ji nɔ ni kaa lɛ.+ 15  No sɛɛ lɛ, nɔ ni ashweɔ lɛ, kɛ́ eŋɔ hɔ lɛ, efɔɔ esha; esha lɛ hu, kɛ́ afee agbe naa lɛ, efɔɔ gbele.+ 16  Minyɛmimɛi ni misumɔɔ, nyɛkahãa alakaa nyɛ. 17  Nikeenii kpakpai fɛɛ kɛ nikeenii ni hi kɛwula shi fɛɛ lɛ, ŋwɛi ejɛɔ ekpelekeɔ shi,+ kɛjɛɔ ŋwɛi lai a-Tsɛ lɛ ŋɔɔ,+ mɔ ni tsakeee tamɔ hɔɔŋ ni tsiɔ ehe lɛ.*+ 18  Etsɔ anɔkwale lɛ wiemɔ lɛ nɔ efɔ wɔ yɛ lɛ diɛŋtsɛ esuɔmɔ naa,+ koni wɔtsɔmɔ ebɔɔ nii lɛ ateŋ klɛŋklɛŋ yibii komɛi.+ 19  Minyɛmimɛi ni misumɔɔ, nyɛnáa nyɛlea enɛ: Esa akɛ mɔ fɛɛ mɔ he afee oya kɛ sane toiboo, ekaye ehe oyai kɛwie,+ emli akafu oya,+ 20  ejaakɛ gbɔmɔ mlifu tsuuu Nyɔŋmɔ jalɛ nii.*+ 21  No hewɔ lɛ, nyɛjiea muji fɛɛ kɛ nii gbonyo fɛɛ nii gbonyo* yɛ nyɛhe nyɛshɛrɛa nyɛshwiea,+ ni nyɛkɛ mlijɔlɛ amɔ wiemɔ lɛ ni baanyɛ ahere nyɛyiwala* ni aduɔ yɛ nyɛmli lɛ mli. 22  Shi nyɛtsɔmɔa mɛi ni kɛ wiemɔ lɛ tsuɔ nii,+ ni jeee enulɔi kɛkɛ, ni nyɛkɛ amale susumɔi miilaka nyɛ diɛŋtsɛ nyɛhe. 23  Ejaakɛ kɛ́ mɔ ko ji wiemɔ lɛ nulɔ kɛkɛ, ni ejeee mɔ ni kɛtsuɔ nii lɛ,+ nɛkɛ gbɔmɔ nɛɛ tamɔ mɔ ko ni miikwɛ lɛ diɛŋtsɛ ehiɛ* yɛ ashwishwɛ mli. 24  Ejaakɛ ekwɛɔ ehe, ni eyaa, ni amrɔ nɔŋŋ lɛ, ehiɛ kpaa nɔ gbɔmɔ ni eji lɛ nɔ. 25  Shi mɔ ni maa eyi shi ekwɛɔ heyeli mla ni eye emuu lɛ mli,+ ni ekãa he efeɔ lɛ, ebatsɔɔ mɔ ni tsuɔ nitsumɔ lɛ, shi jeee mɔ ni nuɔ ni ehiɛ kpaa nɔ; ni ebaaná miishɛɛ yɛ nɔ ni etsuɔ lɛ mli.+ 26  Kɛ́ gbɔmɔ ko susuɔ akɛ eji Nyɔŋmɔ jálɔ, shi ekudɔɔɔ elilɛi jogbaŋŋ* lɛ,+ eelaka lɛ diɛŋtsɛ etsui, ni ejamɔ lɛ, efolo ni. 27  Jamɔ ni he tse ni abuleko yɛ wɔ-Nyɔŋmɔ kɛ wɔ-Tsɛ lɛ hiɛ ji enɛ: akɛ mɔ akwɛ awusãi+ kɛ yei okulafoi+ yɛ amɛmanehulu lɛ mli,+ ni ekwɛ ehe nɔ jogbaŋŋ ni je lɛ akawo ehe muji.+

Shishigbɛ Niŋmaa

Loo “nyɛkɛ kai.”
Loo “etaooo tɔmɔ yɛ mɔ he.”
Greek sht. ŋm., “eshwã.”
Loo “ni dũɔ lɛ tamɔ bɔ ni akɛ tsɔnenaa loo lakaa kooloo ko ni adũɔ lɛ lɛ.”
Loo “mɔ mli ni hɔɔŋ lɛ he tsɔmɔmɔ ko bɛ lɛ.”
Loo “kɛ nii ni ja yɛ Nyɔŋmɔ hiɛ baaa.”
Shishitsɔɔmɔi komɛi kɛɔ akɛ, “nibii gbohii ni afeɔ kɛtekeɔ nɔ lɛ.”
Loo “nyɛsusumai ayiwala.”
Loo “ehiɛ su.”
Loo “ewooo elilɛi manyoflɛ.”