Maleaki 3:1-18

  • Anɔkwa Nuŋtsɔ lɛ baaba ni ebatsuu esɔlemɔ shĩa lɛ he (1-5)

    • Kpaŋmɔ lɛ tsulɔ lɛ (1)

  • Awo amɛ hewalɛ ni amɛku amɛsɛɛ kɛba Yehowa ŋɔɔ (6-12)

    • Yehowa tsakeee (6)

    • “Nyɛkua nyɛsɛɛ kɛbaa miŋɔɔ, ni mi hu maku misɛɛ kɛba nyɛŋɔɔ” (7)

    • ‘Nyɛkɛ mlijai nyɔŋma mli ekomekomei lɛ fɛɛ abaa, ni Yehowa baafɔse jɔɔmɔi eshwie nyɛnɔ’ (10)

  • Jalɔ kɛ mɔ fɔŋ (13-18)

    • Aŋma kaimɔ wolo yɛ Nyɔŋmɔ hiɛ (16)

    • Srɔto ni yɔɔ jalɔ kɛ mɔ fɔŋ teŋ (18)

3  “Naa! Miitsu mitsulɔ lɛ, ni ebaasaa gbɛ* eto mi.+ Ni trukaa lɛ, anɔkwa Nuŋtsɔ lɛ, mɔ ni nyɛtaoɔ lɛ baaba esɔlemɔ shĩa lɛ;+ ni kpaŋmɔ lɛ tsulɔ lɛ, mɔ ni nyɛnáa ehe miishɛɛ lɛ baaba. Naa! Bɔ fɛɛ bɔ ni fee lɛ, ebaaba,” Yehowa, taiatsɛ lɛ kɛɛ.  “Shi namɔ baanyɛ ebaa gbi lɛ naa adamɔ, ni namɔ baanyɛ shi adamɔ kɛji epue? Ejaakɛ ebaafee tamɔ niiahetsuulɔ la kɛ niiahefɔlɔi asamala.+  Ni ebaata shi tamɔ mɔ ni tsuɔ jwiɛtɛi+ he ni ejieɔ emli muji, ni ebaahã Levibii* lɛ ahe atse; ni ebaatsuu amɛhe tamɔ shika tsuru kɛ jwiɛtɛi, ni amɛbaatsɔmɔ mɛi ni kɛ nikee afɔlei bahãa yɛ jalɛ mli amɛhã Yehowa.  Ni Yuda kɛ Yerusalem nikee afɔle lɛ baasa Yehowa hiɛ,* tamɔ eji yɛ blema gbii lɛ kɛ tsutsu blema afii lɛ amli lɛ.+  “Matsi mabɛŋkɛ nyɛ ní makojo, ni maye odase oya nɔŋŋ mashi ŋkunyaayelɔi+ kɛ gbalafitelɔi kɛ mɛi ni kãmɔɔ amale kitãi lɛ,+ ni maye odase oya nɔŋŋ mashi mɛi ni shishiuɔ apaafonyo+ kɛ yoo okulafo kɛ gbekɛ ni bɛ tsɛ* lɛ,+ ni maye odase oya nɔŋŋ mashi mɛi ni yeee amɛbuaaa gbɔ lɛ.*+ Mɛnɛɛmɛi sheee mi gbeyei,” Yehowa, taiatsɛ lɛ kɛɛ.  “Ejaakɛ miji Yehowa; mitsakeee.*+ Ni nyɛji Yakob bii;* kɛbashi amrɔ nɛɛ, nyɛhiɛ kpãtãko.  Kɛjɛ nyɛtsɛmɛi lɛ agbii lɛ amli tɔ̃ɔ nyɛgbá afã kɛje mimlai lɛ ahe ni nyɛyeee nɔ.+ Nyɛkua nyɛsɛɛ kɛbaa miŋɔɔ, ni mi hu maku misɛɛ kɛba nyɛŋɔɔ,”+ Yehowa, taiatsɛ lɛ kɛɛ. Shi nyɛkɛɔ akɛ: “Te wɔɔfee tɛŋŋ wɔku wɔsɛɛ lɛ?”  “Ani gbɔmɔ adesa baanyɛ ashishiu Nyɔŋmɔ? Shi nyɛ lɛ nyɛmiishishiu mi.” Ni nyɛkɛɔ akɛ: “Mɛɛ gbɛ nɔ wɔshishiuɔ bo?” “Yɛ mlijai nyɔŋma mli ekomekomei* lɛ kɛ oniai lɛ amli.  Alomɔ nyɛ,* ejaakɛ nyɛmiishishiu mi—hɛɛ, maŋ muu lɛ fɛɛ miifee nakai. 10  Nyɛkɛ mlijai nyɔŋma mli ekomekomei lɛ fɛɛ abaa* nitoohe lɛ,+ koni niyenii ahi mishĩa lɛ;+ ni nyɛfainɛ, nyɛkɛ enɛ akaa mi nyɛkwɛa,” Yehowa, taiatsɛ lɛ kɛɛ, “akɛ migbeleŋ ŋwɛi nui lɛ shinai* lɛ mihãŋ nyɛ,+ ni mifɔseŋ jɔɔmɔi mishwieŋ nyɛnɔ* kɛyashi be ni nɔ ko nɔ ko ehiaŋ nyɛ dɔŋŋ lo.”+ 11  “Ni makã niiahiɛkpatalɔ* lɛ hiɛ mahã nyɛ, ni ekpãtãŋ nyɛshikpɔŋ lɛ nɔ nibaa nii lɛ ahiɛ, ni wain tsei ni yɔɔ nyɛŋmɔji amli lɛ hu baawo yibii,”+ Yehowa, taiatsɛ lɛ kɛɛ. 12  “Jeŋmaji lɛ fɛɛ baabu nyɛ akɛ mɛi ni yɔɔ miishɛɛ,+ ejaakɛ nyɛbaatsɔ shikpɔŋ ni hãa anáa miishɛɛ,” Yehowa, taiatsɛ lɛ kɛɛ. 13  “Wiemɔi ni nyɛwieɔ nyɛshiɔ mi lɛ anaa wala,” Yehowa kɛɛ. Ni nyɛkɛɔ akɛ: “Mɛɛ gbɛ nɔ wɔwie wɔshi bo yɛ wɔteŋ?”+ 14  “Nyɛkɛɔ akɛ, ‘Sɛɛnamɔ ko bɛ he akɛ aaasɔmɔ Nyɔŋmɔ.+ Mɛɛ gbɛ nɔ wɔnáa Yehowa, taiatsɛ lɛ, taomɔ nii lɛ anɔ ni wɔyeɔ kɛ nyiɛmɔ ni wɔnyiɛɔ mɔbɔmɔbɔ yɛ ehiɛ lɛ he sɛɛ? 15  Amrɔ nɛɛ, wɔbuɔ mɛi ni yeɔ amɛtsuinaa sane akɛ mɛi ni yɔɔ miishɛɛ. Agbɛnɛ hu, mɛi ni feɔ nifɔjianii lɛ yeɔ omanye.+ Amɛkaa Nyɔŋmɔ ní amɛsheee gbeyei, ni amɛyeɔ amɛhe.’” 16  Nakai be lɛ mli lɛ, mɛi ni sheɔ Yehowa gbeyei lɛ kɛ amɛhe wie, amɛteŋ mɔ fɛɛ mɔ kɛ enaanyo wie, ni Yehowa ka etoi ni ebo amɛ toi jogbaŋŋ. Ni aŋma kaimɔ wolo yɛ Yehowa hiɛ+ ahã mɛi ni sheɔ lɛ gbeyei kɛ mɛi ni jwɛŋɔ egbɛ́i lɛ nɔ* lɛ.+ 17  “Ni gbi nɔ ni mahã amɛtsɔ nii ni mishwɛɛɛ he kwraa lɛ,”+ Yehowa, taiatsɛ lɛ kɛɛ, “amɛbaatsɔ minɔ.+ Mimusuŋ baatsɔ mi yɛ amɛhe, tamɔ bɔ ni mɔ musuŋ tsɔɔ lɛ yɛ ebi ni sɔmɔɔ lɛ lɛ he lɛ.+ 18  Ni nyɛbaasaa nyɛna srɔto ni yɔɔ jalɔ kɛ mɔ fɔŋ teŋ,+ kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ lɛ teŋ.”

Shishigbɛ Niŋmaa

Loo “ebaaje gbɛ.”
Hebri sht. ŋm., “Levi bihii.”
Loo “baahã Yehowa tsui anyɔ emli.”
Loo “awusã.”
Loo “mɛi ni hãaa gbɔ aná hegbɛi ni sa lɛ lɛ.”
Loo “mitsakeko.”
Hebri sht. ŋm., “Yakob bihii.”
Loo “taitii.”
Shishitsɔɔmɔi komɛi kɛɔ akɛ, “Nyɛkɛ loomɔ miilomɔ mi.”
Loo “Nyɛkɛ taitii lɛ fɛɛ abaa.”
Loo “agbói.”
Hebri sht. ŋm., “mitsɔŋ jɔɔmɔi lɛ fɛɛ mishwieŋ nyɛnɔ.”
Eeenyɛ efee akɛ, aatsɔɔ kooloi bibii tamɔ baalabii ni kpãtãa nii ahiɛ lɛ.
Loo “mɛi ni susuɔ egbɛ́i lɛ he.” Shishitsɔɔmɔi komɛi kɛɔ akɛ, “mɛi ni kɛ egbɛ́i lɛ shwɛɛɛ kwraa.”