3 Mose 23:1-44

  • Gbii krɔŋkrɔŋi kɛ gbii juji (1-44)

    • Hejɔɔmɔ Gbi (3)

    • Hehoo (4, 5)

    • Blodo Ni Ashikishaŋ-sha Bɛ Mli Gbi Jurɔ (6-8)

    • Klɛŋklɛŋ yibii ni akɛhãa akɛ afɔle (9-14)

    • Otsii Agbi Jurɔ (15-21)

    • Gbɛ kpakpa ni atsɔɔ nɔ akpaa nii (22)

    • Tɛtɛrɛmantɛrɛ Kpãmɔ Gbi Jurɔ (23-25)

    • Kpatamɔ Gbi (26-32)

    • Agbai Agbi Jurɔ (33-43)

23  Yehowa tee nɔ ekɛ Mose wie ekɛɛ:  “Okɛ Israelbii lɛ awie ni okɛɛ amɛ akɛ, ‘Yehowa gbii juji+ ni ato ni esa akɛ nyɛtswa he adafi* lɛ,+ kpeei krɔŋkrɔŋi ni. Migbii juji ni ato lɛ nɛ:  “‘Gbii ekpaa akɛtsu nii, shi gbi ni ji kpawo lɛ ji hejɔɔmɔ gbi ni esa akɛ ajɔɔ he kwraa,+ kpee krɔŋkrɔŋ ni. Nyɛkatsua nitsumɔ ko nitsumɔ ko kwraa. Eji hejɔɔmɔ gbi kɛhã Yehowa yɛ he fɛɛ he ni nyɛyɔɔ.+  “‘Yehowa gbii juji ni ato, kpeei krɔŋkrɔŋi ni esa akɛ nyɛtswa he adafi* yɛ bei ni ato kɛhã amɛ lɛ amli lɛ nɛ:  Klɛŋklɛŋ nyɔɔŋ lɛ nɔ gbi ni ji 14 lɛ nɔ+ be ni hulu enyɔ shi* lɛ ji Yehowa Hehoo+ lɛ.  “‘Nyɔɔŋ nɛɛ nɔ gbi ni ji 15 lɛ ji Blodo Ni Ashikishaŋ-sha* Bɛ Mli Gbi Jurɔ+ ni ayeɔ ahãa Yehowa lɛ. Nyɛyea blodo ni ashikishaŋ-sha bɛ mli gbii kpawo.+  Yɛ klɛŋklɛŋ gbi lɛ nɔ lɛ, nyɛfea kpee krɔŋkrɔŋ.+ Nyɛkatsua nitsumɔ ko nitsumɔ ko ni wa.  Shi nyɛkɛ afɔle ni akɛ la shãa abahãa Yehowa gbii kpawo. Abaafee kpee krɔŋkrɔŋ yɛ gbi ni ji kpawo lɛ nɔ. Nyɛkatsua nitsumɔ ko nitsumɔ ko ni wa.’”  Yehowa tee nɔ ekɛ Mose wie ekɛɛ: 10  “Okɛ Israelbii lɛ awie ni okɛɛ amɛ akɛ, ‘Kɛ́ nyɛná nyɛyashɛ shikpɔŋ ni mikɛhãa nyɛ lɛ nɔ, ni nyɛkpa enɔ nibaa nii lɛ, nyɛkɛ nyɛnikpamɔnii lɛ amli klɛŋklɛŋ yibii+ lɛ ke kome abahãa osɔfo lɛ.+ 11  Ni ebaafɔ̃ ke lɛ kɛya kɛba yɛ Yehowa hiɛ koni nyɛná Nyɔŋmɔ hiɛ dromɔ. Osɔfo lɛ afɔ̃ ke lɛ yɛ Hejɔɔmɔ Gbi lɛ nɔ jetsɛremɔ. 12  Gbi ni abaafɔ̃ ke lɛ kɛya kɛba lɛ, nyɛkɛ gwantɛŋnuu ni náko fe afi ni kpa ko bɛ ehe abaa akɛ afɔle ni akɛ la shãa ahãa Yehowa. 13  Ehe ŋmaa* afɔle lɛ afee ashikishaŋ kpakpa efa mlijai nyɔŋma mli enyɔ* ní akɛ mu efutu, afɔle ni akɛ la shãa ahãa Yehowa, afɔle ni jeɔ ŋma jogbaŋŋ.* Ehe dãa afɔle lɛ afee wain hin* mlijai ejwɛ mli ekome. 14  Nyɛkayea blodo loo ŋmaa ni ashĩ loo ŋmaa hee ko kwraa kɛyashi gbi nɛɛ baashɛ, kɛyashi be ni nyɛkɛ nyɛ-Nyɔŋmɔ lɛ afɔle lɛ baaba. Eji mla ni kã shi daa hã nyɛyinɔi lɛ fɛɛ, yɛ he fɛɛ he ni nyɛyɔɔ. 15  “‘Nyɛkanea hejɔɔmɔ gbii* kpawo kɛjɛ Hejɔɔmɔ Gbi lɛ nɔ jetsɛremɔ, kɛjɛ gbi ni nyɛkɛ ŋmaa ke lɛ baaba ni afɔ̃ akɛ fɔ̃ɔ afɔle+ lɛ nɔ. Esa akɛ efee otsii muji. 16  Nyɛkanea gbii 50,+ ni ebaayagbee Hejɔɔmɔ Gbi ni ji kpawo lɛ nɔ jetsɛremɔ nɔ, ní nyɛkɛ ŋmaa hee afɔle abahãa Yehowa.+ 17  Nyɛkɛ blodoi enyɔ ajɛa nyɛshihilɛhei lɛ kɛbaa akɛ fɔ̃ɔ afɔle. Akɛ ashikishaŋ kpakpa efa mlijai nyɔŋma mli enyɔ* afee blodoi nɛɛ. Akɛ ashikishaŋ-sha* afutu kɛshã+ akɛ nibaa nii amli klɛŋklɛŋ yibii ni akɛmiihã Yehowa.+ 18  Ni nyɛkɛ gwantɛŋbii kpawo ni ji hii ni kpa ko bɛ amɛhe ni eko fɛɛ eko eye afi, kɛ tsinanuu* kome kɛ gwantɛŋhii enyɔ afataa blodoi lɛ ahe kɛbaa.+ Akɛ enɛɛmɛi kɛ amɛhe ŋmaa afɔle kɛ dãa afɔlei lɛ fɛɛ baafee shãa afɔle ahã Yehowa, afɔle ni akɛ la shãa ni jeɔ ŋma jogbaŋŋ* woɔ Yehowa. 19  Ni nyɛkɛ abotianuu* kome abaa akɛ esha afɔle,+ kɛ gwantɛŋbii enyɔ ni ji hii ni eko fɛɛ eko eye afi akɛ naanyobɔɔ afɔle.+ 20  Osɔfo lɛ afɔ̃ gwantɛŋbii enyɔ ni ji hii lɛ kɛ nibaa nii amli klɛŋklɛŋ yibii blodo lɛ fɛɛ kɛya kɛba akɛ fɔ̃ɔ afɔle yɛ Yehowa hiɛ. Fɛɛ baatsɔ nɔ krɔŋkrɔŋ kɛhã Yehowa, ni akɛhã osɔfo lɛ.+ 21  Gbi nɛɛ nɔ lɛ, nyɛtswaa adafi*+ akɛ nyɛbaafee kpee krɔŋkrɔŋ. Nyɛkatsua nitsumɔ ko nitsumɔ ko ni wa. Eji mla ni kã shi daa hã nyɛ yɛ nyɛshihilɛhei lɛ fɛɛ, yɛ nyɛyinɔi fɛɛ amli. 22  “‘Kɛ́ nyɛmiikpa nyɛshikpɔŋ lɛ nɔ nibaa nii lɛ, kaakpa nɔ ni yɔɔ oŋmɔ lɛ naabunaabu lɛ fɛɛ kɛmɔ shi, ni onikpamɔnii lɛ amli nɔ ni baashwɛ lɛ hu, kaakpa.+ Shi ohã ohiafo*+ kɛ gbɔ.+ Miji Yehowa, nyɛ-Nyɔŋmɔ lɛ.’” 23  Yehowa tee nɔ ekɛ Mose wie ekɛɛ: 24  “Kɛɛmɔ Israelbii lɛ akɛ, ‘Nyɔɔŋ ni ji kpawo lɛ nɔ klɛŋklɛŋ gbi lɛ nɔ lɛ, nyɛjɔa nyɛhe kwraa, eji kpee krɔŋkrɔŋ, eji kaimɔ gbi ni abaakpã tɛtɛrɛmantɛrɛ yɛ nɔ.+ 25  Nyɛkatsua nitsumɔ ko nitsumɔ ko ni wa, ni nyɛkɛ afɔle ni akɛ la shãa abahãa Yehowa.’” 26  Yehowa tsa nɔ ekɛ Mose wie ekɛɛ: 27  “Shi nyɔɔŋ ni ji kpawo nɛɛ nɔ gbi ni ji nyɔŋma lɛ ji Kpatamɔ Gbi lɛ.+ Nyɛfea kpee krɔŋkrɔŋ, ni nyɛwaa nyɛhe yi,*+ ni nyɛkɛ afɔle ni akɛ la shãa abahãa Yehowa. 28  Nyɛkatsua nitsumɔ ko nitsumɔ ko kwraa yɛ nɛkɛ gbi nɛɛ nɔ, ejaakɛ eji kpatamɔ gbi ni akɛbaakpãtã+ ahã nyɛ yɛ Yehowa, nyɛ-Nyɔŋmɔ lɛ hiɛ. 29  Mɔ fɛɛ mɔ* ni waaa ehe yi* yɛ nɛkɛ gbi nɛɛ nɔ lɛ, abaafo lɛ ashɛ afɔ̃* kɛje emaŋbii lɛ ateŋ.+ 30  Ni mɔ fɛɛ mɔ* ni tsuɔ nitsumɔ ko yɛ gbi nɛɛ nɔ lɛ, makpãtã ehiɛ kɛje emaŋbii lɛ ateŋ. 31  Nyɛkatsua nitsumɔ ko nitsumɔ ko kwraa. Eji mla ni kã shi daa hã nyɛyinɔi lɛ fɛɛ, yɛ he fɛɛ he ni nyɛyɔɔ. 32  Eji hejɔɔmɔ gbi ni nyɛkɛbaajɔɔ nyɛhe kwraa, ni nyɔɔŋ lɛ nɔ gbi ni ji nɛɛhu lɛ gbɛkɛ lɛ, nyɛwaa nyɛhe yi.*+ Nyɛyea nyɛhejɔɔmɔ gbi lɛ kɛjɛ gbɛkɛ kɛyashi gbɛkɛ.” 33  Yehowa tee nɔ ekɛ Mose wie ekɛɛ: 34  “Kɛɛmɔ Israelbii lɛ akɛ, ‘Nyɔɔŋ ni ji kpawo nɛɛ nɔ gbi ni ji 15 lɛ ji Agbai Agbi Jurɔ ní abaaye lɛ gbii kpawo ahã Yehowa lɛ.+ 35  Afee kpee krɔŋkrɔŋ yɛ klɛŋklɛŋ gbi lɛ nɔ, ni nyɛkatsua nitsumɔ ko nitsumɔ ko ni wa. 36  Nyɛkɛ afɔle ni akɛ la shãa abahãa Yehowa gbii kpawo. Gbi ni ji kpaanyɔ lɛ nɔ lɛ, nyɛfea kpee krɔŋkrɔŋ,+ ni nyɛkɛ afɔle ni akɛ la shãa abahãa Yehowa. Eji henaabuamɔ krɔŋkrɔŋ diɛŋtsɛ. Nyɛkatsua nitsumɔ ko nitsumɔ ko ni wa. 37  “‘Enɛɛmɛi ji Yehowa gbii juji+ ni ato ni esa akɛ atswa he adafi* akɛ kpeei krɔŋkrɔŋi+ lɛ, koni akɛ afɔle ni akɛ la shãa abahã Yehowa: shãa afɔle+ kɛ ŋmaa afɔle+ kɛ dãa afɔlei+ yɛ bɔ ni ato ahã gbi fɛɛ gbi lɛ naa. 38  Akɛ enɛɛmɛi ahã kɛfata nɔ ni akɛhãa yɛ Yehowa hejɔɔmɔ gbii+ lɛ anɔ, kɛ nyɛnikeenii+ lɛ, nyɛshiwoo afɔlei+ lɛ, kɛ afɔlei ni nyɛjɛɔ nyɛsuɔmɔ mli nyɛkɛhãa,+ ní esa akɛ nyɛkɛhã Yehowa lɛ ahe. 39  Shi nyɔɔŋ ni ji kpawo lɛ nɔ gbi ni ji 15 lɛ nɔ, be ni nyɛbua nyɛshikpɔŋ lɛ nɔ nibaa nii lɛ anaa lɛ, nyɛyea Yehowa gbi jurɔ lɛ gbii kpawo.+ Klɛŋklɛŋ gbi lɛ ji gbi ni akɛbaajɔɔ he kwraa, ni gbi ni ji kpaanyɔ lɛ hu ji gbi ni akɛbaajɔɔ he kwraa.+ 40  Klɛŋklɛŋ gbi lɛ nɔ lɛ, nyɛŋɔa tsei fɛfɛji ayibii kɛ tɛŋ bɛlɛoi+ kɛ tsei kusui aniji kɛ popla tsei ni yɔɔ jɔɔ* lɛ mli lɛ, ni nyɛnyaa+ yɛ Yehowa, nyɛ-Nyɔŋmɔ lɛ, hiɛ gbii kpawo.+ 41  Nyɛkɛ gbii kpawo ayea lɛ akɛ gbi jurɔ nyɛhãa Yehowa daa afi.+ Etsɔ mla ni kã shi hã nyɛyinɔi fɛɛ, nyɛyea lɛ yɛ nyɔɔŋ ni ji kpawo lɛ nɔ. 42  Nyɛhia agbai ashishi gbii kpawo.+ Israelbii lɛ fɛɛ ahi agbai lɛ ashishi, 43  koni yinɔi ni baaba yɛ nyɛsɛɛ lɛ aná ale+ akɛ, agbai amli mihã Israelbii lɛ hi be ni mijie amɛ kɛje Ejipt shikpɔŋ lɛ nɔ kɛbaa lɛ.+ Miji Yehowa, nyɛ-Nyɔŋmɔ lɛ.’” 44  No hewɔ lɛ, Mose wie Yehowa gbii juji ni ato lɛ ahe etsɔɔ Israelbii lɛ.

Shishigbɛ Niŋmaa

Loo “nyɛshiɛ.”
Loo “nyɛshiɛ.”
Hebri sht. ŋm., “yɛ gbɛkɛi enyɔ lɛ ateŋ,” eeenyɛ efee akɛ nɔ ni enɛ tsɔɔ ji, “yɛ gbɛkɛnaashi kɛ gbɛkɛ teŋ”; “be ni hulu enyɔ shi, shi duŋ woko.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Efa mlijai nyɔŋma mli enyɔ feɔ litai 4.4 (kwat 4). Kwɛmɔ Saji Krokomɛi B14 lɛ.
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Hin kome feɔ litai 3.67 (pint 7.75). Kwɛmɔ Saji Krokomɛi B14 lɛ.
Loo “Nyɛkanea otsii.”
Efa mlijai nyɔŋma mli enyɔ feɔ litai 4.4 (kwat 4). Kwɛmɔ Saji Krokomɛi B14 lɛ.
Loo “tsina oblanyo.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “abotia oblanyo.”
Loo “nyɛshiɛa.”
Loo “mɔ ni naa amanehulu.”
Loo “nyɛwaa nyɛsusumai ayi.” Kɛ́ akɛɛ ‘mɔ ko waa ehe yi’ lɛ, bei pii lɛ, nɔ ni etsɔɔ ji akɛ, mɔ lɛ tsĩɔ ehe naa yɛ nibii srɔtoi ahe, ni eko ji akɛ, ehiɔ ŋmaa.
Loo “Susuma fɛɛ susuma.”
Shishitsɔɔmɔi komɛi kɛɔ akɛ, “ehiii ŋmaa.”
Loo “abaagbe lɛ.”
Loo “susuma fɛɛ susuma.”
Loo “nyɛwaa nyɛsusumai ayi.”
Loo “ashiɛ.”
Loo “nujɔɔ.” Kwɛmɔ Wiemɔi Titrii Amligbalamɔ lɛ.