3 Mose 18:1-30

  • Bɔlɛnamɔi ni mla eŋmɛɛɛ gbɛ (1-30)

    • Nyɛkakasea Kanaanbii lɛ (3)

    • Wekumɛi ateŋ bɔlɛnamɔi srɔtoi (6-18)

    • Be mli ni yoo ko miifee yei anii (19)

    • Nuu kɛ nuu loo yoo kɛ yoo ni náa bɔlɛ (22)

    • Gbɔmɔ ni kɛ kooloo náa bɔlɛ (23)

    • ‘Nyɛhe atsea, kɛjeee nakai lɛ shikpɔŋ lɛ baashwe nyɛ ashwie’ (24-30)

18  Yehowa tee nɔ ekɛ Mose wie ekɛɛ:  “Okɛ Israelbii lɛ awie ni okɛɛ amɛ akɛ, ‘Miji Yehowa, nyɛ-Nyɔŋmɔ lɛ.+  Nyɛkafea nyɛnii tamɔ bɔ ni afeɔ yɛ Ejipt shikpɔŋ lɛ nɔ, he ni nyɛhi lɛ, ni nyɛkafea nibii ni afeɔ yɛ Kanaan shikpɔŋ lɛ nɔ, he ni mikɛ nyɛ yaa lɛ.+ Ni nyɛkanyiɛa yɛ amɛmlai lɛ anaa hu.  Nyɛyea miyiŋkpɛi* lɛ anɔ, ni nyɛyea mimlai lɛ hu anɔ, ni nyɛnyiɛa yɛ naa.+ Miji Yehowa, nyɛ-Nyɔŋmɔ lɛ.  Nyɛyea mimlai lɛ kɛ miyiŋkpɛi* lɛ anɔ; mɔ fɛɛ mɔ ni feɔ nakai lɛ, nomɛi baahã eya nɔ ehi shi.+ Miji Yehowa lɛ.  “‘Nyɛteŋ mɔ ko mɔ ko akabɛŋkɛ ewekumɛi kpaakpa lɛ ateŋ mɔ ko ni ekɛ lɛ ná bɔlɛ.*+ Miji Yehowa lɛ.  Okɛ opapa akaná bɔlɛ, ni okɛ omami hu akaná bɔlɛ. Omami ni, ni esaaa akɛ okɛ lɛ náa bɔlɛ.  “‘Okɛ opapa ŋa akaná bɔlɛ.+ Ooshwie opapa hiɛ shi.*  “‘Okɛ onyɛmi yoo akaná bɔlɛ, opapa biyoo jio, omami biyoo jio, afɔ lɛ yɛ shĩa kome too lɛ mli jio, afɔ lɛ yɛ he kroko jio.+ 10  “‘Okɛ obinuu biyoo loo obiyoo biyoo akaná bɔlɛ, ejaakɛ bo diɛŋtsɛ oyayaiaŋ ji amɛ. 11  “‘Okɛ opapa ŋa biyoo ní opapa fɔ lɛ lɛ akaná bɔlɛ, ejaakɛ onyɛmi yoo ni. 12  “‘Okɛ opapa nyɛmi yoo akaná bɔlɛ. Opapa wekunyo kpaakpa ni.+ 13  “‘Okɛ omami nyɛmi yoo akaná bɔlɛ, ejaakɛ omami wekunyo kpaakpa ni. 14  “‘Okɛ opapa nyɛmi nuu ŋa akaná bɔlɛ ní okɛshwie opapa nyɛmi nuu lɛ hiɛ shi.* Onyɛkwɛ̃ ni.+ 15  “‘Okɛ oshaayoo akaná bɔlɛ.+ Obinuu ŋa ni, ni esaaa akɛ okɛ lɛ náa bɔlɛ. 16  “‘Okɛ onyɛmi nuu ŋa akaná bɔlɛ,+ ejaakɛ ooshwie onyɛmi nuu lɛ hiɛ shi.* 17  “‘Okɛ yoo ko kɛ ebiyoo fɛɛ akaná bɔlɛ.+ Kaaŋɔ ebinuu biyoo kɛ ebiyoo biyoo ni okɛ amɛ ná bɔlɛ. Ewekumɛi kpaakpa ji amɛ; eji yakayaka nifeemɔ.* 18  “‘Kaaŋɔ yoo ko ofata enyɛmi yoo he akɛ oŋa kroko*+ ní okɛ lɛ ná bɔlɛ be mli ni enyɛmi yoo lɛ yɛ wala mli lolo. 19  “‘Kaabɛŋkɛ yoo ko be mli ni eefee yei anii ní ehe tseee lɛ ní okɛ lɛ ná bɔlɛ.+ 20  “‘Okɛ onyɛmi gbɔmɔ* ŋa akaná bɔlɛ ní okɛwo ohe muji.+ 21  “‘Kaaŋmɛ gbɛ ní aŋɔ oshwiei lɛ eko eko ahã* Molek.+ Kaabule o-Nyɔŋmɔ lɛ gbɛ́i lɛ yɛ nakai gbɛ nɔ.+ Miji Yehowa lɛ. 22  “‘Okɛ nuu akawɔ tamɔ bɔ ni okɛ yoo wɔɔ lɛ.+ Eji nihiinii. 23  “‘Nuu ko kɛ kooloo ko akaná bɔlɛ ní ekɛwo ehe muji; ni yoo ko hu akaŋɔ ehe ehã kooloo ko ní ekɛ lɛ ná bɔlɛ.+ Enɛ teɔ shi ewoɔ adebɔɔ gbɛjianɔtoo. 24  “‘Okɛ nibii nɛɛ ateŋ eko eko akawo ohe muji, ejaakɛ nibii nɛɛ fɛɛ majimaji ni mishwieɔ amɛ yɛ nyɛhiɛ lɛ kɛwo amɛhe muji.+ 25  No hewɔ lɛ, shikpɔŋ lɛ he tseee, ni mikɛ toigbalamɔ baaba shikpɔŋ lɛ nɔ yɛ etɔmɔ lɛ hewɔ, ni shikpɔŋ lɛ baashwe enɔ bii lɛ eshwie.+ 26  Shi nyɛ lɛ, nyɛyea mimlai kɛ miyiŋkpɛi* lɛ anɔ,+ ni nyɛkafea nihiinii nɛɛ ateŋ eko eko, maŋnyo jio, gbɔ ni yɔɔ nyɛteŋ jio.+ 27  Ejaakɛ shikpɔŋ lɛ nɔ bii ni tsɔ nyɛhiɛ lɛ fee nɛkɛ nihiinii nɛɛ fɛɛ,+ ni amrɔ nɛɛ shikpɔŋ lɛ he tseee. 28  Kɛkɛ lɛ, akɛni nyɛbuleko shikpɔŋ lɛ hewɔ lɛ, eshweŋ nyɛ eshwieŋ tamɔ bɔ ni ebaashwe majimaji ni tsɔ nyɛhiɛ lɛ eshwie lɛ. 29  Kɛ́ mɔ ko fee nihiinii nɛɛ ateŋ eko lɛ, mɛi* fɛɛ ni feɔ nibii nɛɛ eko lɛ, afolɔ amɛ ashɛrɛ ashwie* kɛje amɛmaŋbii lɛ ateŋ. 30  Nyɛyea nɔ ni mifã nyɛ lɛ nɔ, ni nyɛkafea kusumii ni yɔɔ nyaŋemɔ ni mɛi ni tsɔ nyɛhiɛ lɛ fee lɛ ateŋ eko eko,+ bɔ ni afee ni nyɛkɛ nibii nɛɛ akawo nyɛhe muji. Miji Yehowa, nyɛ-Nyɔŋmɔ lɛ.’”

Shishigbɛ Niŋmaa

Loo “mikojomɔi.”
Loo “mikojomɔi.”
Hebri sht. ŋm., “ni ejie eyayaiaŋ kpo,” yɛ biɛ kɛ hei krokomɛi ni nyiɛ sɛɛ ni wiemɔ nɛɛ jeɔ kpo yɛ lɛ, nɛkɛ ji eshishitsɔɔmɔ ŋmiiŋmi.
Hebri sht. ŋm., “Opapa yayaiaŋ ni.”
Hebri sht. ŋm., “ní okɛjie opapa nyɛmi nuu lɛ yayaiaŋ kpo.”
Hebri sht. ŋm., “ejaakɛ onyɛmi nuu lɛ yayaiaŋ ni.”
Loo “eji hiɛgbejianii; eji ajwamaŋianii.”
Hebri sht. ŋm., “akɛ ebienyɛ.”
Loo “okutsoŋnyo; mɔ ko ni okɛbɔɔ.”
Loo “ajɔɔ oshwiei lɛ eko eko nɔ ahã; akɛ oshwiei lɛ eko eko shã afɔle ahã.”
Loo “mikojomɔi.”
Loo “susumai.”
Loo “agbe amɛ.”