3 Mose 11:1-47

  • Kooloi ni he tse kɛ nɔ ni he tseee (1-47)

11  Ni Yehowa kɛɛ Mose kɛ Aaron akɛ:  “Nyɛkɛa Israelbii lɛ akɛ, ‘Shikpɔŋ lɛ nɔ kooloi* ni nyɛbaanyɛ nyɛye nɛ:+  Kooloo fɛɛ kooloo ni yɔɔ nane tokotai* ni agbála mli ni gbɛ kãmɔ mli ní gɔiɔ eniyenii etaa lɛ, nyɛbaanyɛ nyɛye.  “‘Shi nyɛkayea kooloi ni nyiɛ sɛɛ nɛɛ ni gɔiɔ amɛniyenii amɛtaa loo agbála amɛnane tokotai* amli lɛ: afukpɔŋɔ, egɔiɔ eniyenii etaa moŋ, shi agbálako enane tokotai* lɛ amli. Ehe tseee hãaa nyɛ.+  Nyɛkayea afutuɔkɔ*+ hu, ejaakɛ egɔiɔ eniyenii etaa moŋ, shi agbálako enane tokotai* lɛ amli. Ehe tseee hãaa nyɛ.  Nyɛkayea kpɛŋkplɛ hu, ejaakɛ egɔiɔ eniyenii etaa moŋ, shi agbálako enane tokotai* lɛ amli. Ehe tseee hãaa nyɛ.  Nyɛkayea kplotoo+ hu, ejaakɛ agbála enane tokotai* lɛ amli ni gbɛ kãmɔ mli moŋ, shi egɔiii eniyenii etaaa. Ehe tseee hãaa nyɛ.  Nyɛkayea amɛloo lɛ eko eko, ni nyɛkataa amɛgbohii ahe hu. Amɛhe tseee hãaa nyɛ.+  “‘Nii fɛɛ ni yɔɔ nu mli lɛ ateŋ nɔ ni nyɛbaanyɛ nyɛye nɛ: Nɔ fɛɛ nɔ ni yɔɔ nu mli ni yɔɔ fiji kɛ he totoi, ŋshɔi amli nɔ jio, fai amli nɔ jio, nyɛbaanyɛ nyɛye.+ 10  Shi nɔ fɛɛ nɔ ni yɔɔ ŋshɔi kɛ fai amli ni bɛ fiji kɛ he totoi lɛ, kooloi bibiibibii* lɛ eko jio, bɔɔ nii* krokomɛi fɛɛ ni hiɛ kamɔ ni yɔɔ nui lɛ amli lɛ eko jio, nyaŋemɔ nii ni kɛhã nyɛ. 11  Hɛɛ, nyɛnyaŋea amɛ, ni nyɛkayea amɛloo lɛ eko eko,+ ni amɛgbohii lɛ hu, nyɛnyaŋea. 12  Nɔ fɛɛ nɔ ni yɔɔ nui lɛ amli ni bɛ fiji kɛ he totoi lɛ ji nyaŋemɔ nii kɛhã nyɛ. 13  “‘Bɔɔ nii ni filikiɔ ni esa akɛ nyɛnyaŋe nɛ; nyɛkayea, ejaakɛ amɛji nyaŋemɔ nii: okropɔŋ+ kɛ ŋshɔ hiɛ akroma kɛ akpaŋa diŋ+ 14  kɛ laalɔɔ tsuru kɛ laalɔɔ diŋ henɔi fɛɛ 15  kɛ kwaakwaalabite henɔi fɛɛ 16  kɛ duguma kɛ patu kɛ oka kɛ akroma henɔi fɛɛ 17  kɛ patu bibioo kɛ amiŋ* kɛ patu ni toii kɛlɛ 18  kɛ omiɔhɔɔ* kɛ ŋa nɔ dɔkɔdɔkɔ kɛ akpaŋa 19  kɛ klitso kɛ gɔdɔ henɔi fɛɛ kɛ huupu* kɛ aputupata. 20  Kooloi bibiibibii* fɛɛ ni yɔɔ fiji, ni nyiɛɔ amɛnaji ejwɛ lɛ fɛɛ anɔ lɛ ji nyaŋemɔ nii kɛhã nyɛ. 21  “‘Kooloi bibiibibii* fɛɛ ni yɔɔ fiji, ni nyiɛɔ amɛnaji ejwɛ lɛ fɛɛ anɔ lɛ ateŋ nɔ ni nyɛbaanyɛ nyɛye pɛ ji nɔ ni yɔɔ naji enyɔ ni atsara ni kwɔlɔ fe naji krokomɛi lɛ ni amɛkɛtumɔɔ yɛ shikpɔŋ lɛ nɔ lɛ. 22  Enɛɛmɛi ateŋ nɔ ni nyɛbaanyɛ nyɛye nɛ: baalabii* henɔi srɔtoi ni fãa kɛjɛɔ he kome kɛyaa he kroko kɛ baalabii krokomɛi ni ayeɔ+ kɛ krilii kɛ agãi. 23  Kooloi bibiibibii* krokomɛi fɛɛ ni yɔɔ fiji lɛ ji nyaŋemɔ nii kɛhã nyɛ. 24  Enɛɛmɛi baahã nyɛfee mɛi ni he tseee. Mɔ fɛɛ mɔ ni taa amɛgbohii ahe lɛ he tseee kɛyashi gbɛkɛ.+ 25  Mɔ fɛɛ mɔ ni kɔɔ amɛgbohii lɛ eko ehiɛɔ lɛ, efɔ etadei lɛ ahe;+ ehe tseee kɛyashi gbɛkɛ. 26  “‘Kooloo fɛɛ kooloo ni yɔɔ nane tokotai* ni agbála mli shi gbɛ kãmɔɔɔ mli, ni egɔiii eniyenii etaaa lɛ he tseee hãaa nyɛ. Mɔ fɛɛ mɔ ni taa amɛhe lɛ he tseee.+ 27  Kooloi fɛɛ* ni nyiɛɔ amɛnaji ejwɛ lɛ fɛɛ anɔ lɛ ateŋ eko fɛɛ eko ni kɛ enaji ashishi he ni yɔɔ tɛtrɛɛ lɛ maa shi kɛnyiɛɔ* lɛ he tseee hãaa nyɛ. Mɔ fɛɛ mɔ ni taa amɛgbohii ahe lɛ he tseee kɛyashi gbɛkɛ. 28  Mɔ ni wóɔ amɛgbohii lɛ eko lɛ afɔ etadei lɛ ahe,+ ni ehe tseee kɛyashi gbɛkɛ.+ Amɛhe tseee hãaa nyɛ. 29  “‘Shikpɔŋ lɛ nɔ kooloi ni yi fa babaoo ni he tseee hãaa nyɛ nɛ: obishi kɛ kwakwe+ kɛ odaakɛlɛo henɔi fɛɛ 30  kɛ tsunyɛ kɛ mampam kɛ ŋa mli tsunyɛ* kɛ shia mli odaakɛlɛo kɛ obosumaketeo.* 31  Kooloi bibiibibii* nɛɛ ahe tseee hãaa nyɛ.+ Mɔ fɛɛ mɔ ni taa amɛgbohii ahe lɛ he tseee kɛyashi gbɛkɛ.+ 32  “‘Agbɛnɛ, kɛ́ amɛgboi lɛ, nɔ fɛɛ nɔ ni amɛbaagbee nɔ lɛ he tseee, tso nii jio, atade jio, kooloo hewolo jio, kpekpe jio. Nibii* fɛɛ ni akɛtsuɔ nii lɛ, akɛwo nu mli, ni amɛhe tseee kɛyashi gbɛkɛ; no sɛɛ lɛ amɛhe baatse. 33  Kɛ́ amɛgbee sũ nɔ ko mli lɛ, nyɛjwaraa lɛ, ni nɔ fɛɛ nɔ ni yɔɔ mli lɛ he tseee.+ 34  Niyenii fɛɛ niyenii ni sũ nɔ ni tamɔ nɛkɛ lɛ mli nu baasa he lɛ he tseee, ni nɔ fɛɛ nɔ ni anuɔ ni yɔɔ sũ nɔ ni tamɔ nɛkɛ mli lɛ he tseee. 35  Nɔ fɛɛ nɔ ni amɛgbohii lɛ eko baagbee nɔ lɛ he tseee. Kɛ́ eji flɔnɔɔ jio, latɛ bibioo jio, esa akɛ akumɔ lɛ dukuduku. Nibii nɛɛ ahe tseee, ni amɛbaakã he amɛfee nibii ni he tseee kɛhã nyɛ. 36  Nuhiŋmɛi kɛ bu ni akɛtoɔ nu pɛ baakã he afee nɔ ni he tse, shi mɔ fɛɛ mɔ ni taa kooloi nɛɛ agbohii ahe lɛ he tseee. 37  Kɛ́ amɛgbohii lɛ eko gbee wu ko ni abaadu nɔ lɛ, wu lɛ he tse. 38  Shi kɛ́ akɛ nu fɔ dumɔwu ko, ni amɛgbohii lɛ eko gbee nɔ lɛ, no lɛ, dumɔwu lɛ he tseee hãaa nyɛ. 39  “‘Agbɛnɛ, kɛ́ kooloo ko ni nyɛyeɔ lɛ eko gbo lɛ, mɔ fɛɛ mɔ ni taa egbonyo lɛ he lɛ he tseee kɛyashi gbɛkɛ.+ 40  Mɔ fɛɛ mɔ ni yeɔ kooloo ni egbo lɛ loo lɛ eko lɛ, efɔ etadei lɛ ahe, ni ehe tseee kɛyashi gbɛkɛ.+ Mɔ fɛɛ mɔ ni wóɔ kooloo lɛ gbonyo lɛ, efɔ etadei lɛ ahe, ni ehe tseee kɛyashi gbɛkɛ. 41  Shikpɔŋ lɛ nɔ kooloi bibiibibii* lɛ fɛɛ lɛ, nyaŋemɔ nii ni.+ Nyɛkayea. 42  Nyɛkayea kooloo fɛɛ kooloo ni wamɔɔ yɛ emusu nɔ, kooloi fɛɛ ni nyiɛɔ amɛnaji ejwɛ lɛ fɛɛ anɔ, aloo shikpɔŋ lɛ nɔ kooloi bibiibibii* fɛɛ ni yɔɔ naji pii lɛ, ejaakɛ amɛ fɛɛ lɛ, nyaŋemɔ nii ni.+ 43  Nyɛkahãa kooloi bibiibibii* lɛ ateŋ eko hã nyɛtsɔmɔ mɛi* ni anyaŋeɔ, ni nyɛkɛ eko akabulea nyɛhe, ní no hã nyɛtsɔmɔ mɛi ni he tseee.+ 44  Ejaakɛ, miji Yehowa, nyɛ-Nyɔŋmɔ lɛ,+ ni nyɛhãa nyɛhe atsea koni nyɛfee krɔŋkrɔŋ,+ ejaakɛ miyɛ krɔŋkrɔŋ.+ No hewɔ lɛ, nyɛkahãa kooloi bibiibibii* ni tsiɔ amɛhe yɛ shikpɔŋ lɛ nɔ lɛ ateŋ eko hã nyɛfee mɛi* ni he tseee. 45  Ejaakɛ miji Yehowa, mɔ ni nyiɛ nyɛhiɛ kɛshi Ejipt shikpɔŋ lɛ nɔ koni mahã nyɛna akɛ miji Nyɔŋmɔ+ lɛ, ni nyɛfea krɔŋkrɔŋ,+ ejaakɛ miyɛ krɔŋkrɔŋ.+ 46  “‘Enɛ ji mla ni kɔɔ kooloi, bɔɔ nii ni filikiɔ, bɔɔ nɔ fɛɛ bɔɔ nɔ* ni hiɛ kã ni nyiɛɔ nui lɛ amli, kɛ kooloi* bibiibibii* fɛɛ ni yɔɔ shikpɔŋ lɛ nɔ lɛ ahe, 47  bɔ ni afee ni akɛna srɔto ni yɔɔ nii ni he tse kɛ nii ni he tseee teŋ, kɛ kooloi ni abaanyɛ aye kɛ nɔ ni anyɛŋ aye teŋ.’”+

Shishigbɛ Niŋmaa

Loo “bɔɔ nii ni hiɛ kamɔ.”
Loo “koklotoi.”
Loo “amɛkoklotoi.”
Loo “ekoklotoi.”
Eji kooloo ko ni tamɔ adaŋko agbo ní bɛ lei ní hiɔ hei ni tɛsai yɔɔ.
Loo “ekoklotoi.”
Loo “ekoklotoi.”
Loo “ekoklotoi.”
Loo “kooloi bibiibibii ni keɔ yuu kɛnyiɛɔ.”
Loo “susumai.”
Blɔfo mli lɛ, “kɔmorant.” Eji loofɔlɔ agbo ko kɛ enaji tabotabo tamɔ dɔkɔdɔkɔ naji. Ehiɔ faa naa, ni etsɛ̃ɔ kɛboteɔ nu shishi eyamɔɔ loo.
Eji dɔkɔdɔkɔ henɔ ko ni da.
Blɔfo mli lɛ, “hoopoe.” Eji loofɔlɔ ko ni dalɛ tamɔ shĩa okpo kɛ ekoŋ kakadaŋŋ.
Loo “Kooloi bibiibibii ni keɔ yuu kɛnyiɛɔ.”
Loo “Kooloi bibiibibii ni keɔ yuu kɛnyiɛɔ.”
Baalabi ji agã henɔ ko.
Loo “Kooloi bibiibibii ni keɔ yuu kɛnyiɛɔ.”
Loo “koklotoi.”
Loo “Bɔɔ nii fɛɛ ni hiɛ kamɔ.”
Kooloi ni atsɔɔ yɛ biɛ lɛ ji kooloi tamɔ jata, alɔnte, gbee, kɛ amɛhenɔi lɛ.
Eji odaakɛlɛo henɔ ko. Blɔfo mli lɛ, “newt.”
Mɛi komɛi tsɛɔ lɛ “obisaŋkoto.”
Loo “Kooloi bibiibibii ni keɔ yuu kɛnyiɛɔ.”
Ni ji, “tsɛnsii, kɔɔpoi, kɛ nibii krokomɛi ni tamɔ nakai.”
Loo “kooloi bibiibibii ni keɔ yuu kɛnyiɛɔ.”
Loo “kooloi bibiibibii ni keɔ yuu kɛnyiɛɔ.”
Loo “kooloi bibiibibii ni keɔ yuu kɛnyiɛɔ.”
Loo “susumai.”
Loo “kooloi bibiibibii ni keɔ yuu kɛnyiɛɔ.”
Loo “susumai.”
Loo “susuma fɛɛ susuma.”
Loo “susumai.”
Loo “kooloi bibiibibii ni keɔ yuu kɛnyiɛɔ.”