3 Mose 26:1-46

  • Nyɛtsia nyɛhe kɛjea amagajamɔ he (1, 2)

  • Jɔɔmɔi ni jɛɔ toiboo mli kɛbaa (3-13)

  • Toigbele he toigbalamɔ (14-46)

26  “‘Nyɛkafea nyɔŋmɔi ni he bɛ sɛɛnamɔ ko nyɛhãa nyɛhe,+ ni nyɛkɛ amaga ni agbɔ*+ loo wɔŋ tɛ ko akamaa shi nyɛhãa nyɛhe, ni nyɛkɛ tɛ ko ni akpɛ́+ akamaa shi yɛ nyɛshikpɔŋ lɛ nɔ koni nyɛkoto lɛ;+ ejaakɛ miji Yehowa, nyɛ-Nyɔŋmɔ lɛ.  Nyɛyea mihejɔɔmɔ gbii lɛ, ni nyɛkɛ woo ahãa mijamɔhe lɛ.* Miji Yehowa lɛ.  “‘Kɛ́ nyɛtee nɔ nyɛnyiɛ yɛ mimlai lɛ anaa ni nyɛye mikitãi lɛ anɔ daa lɛ,+  no lɛ, mahã nugbɔ anɛ ahã nyɛ yɛ be ni sa mli,+ ni shikpɔŋ lɛ baaba enii,+ ni ŋa mli tsei baawo amɛyibii.  Nyɛŋmaagbeemɔ be lɛ baakã he aahu kɛyashi nyɛwain yibii akpamɔ be lɛ, ni wain yibii akpamɔ be lɛ hu baakã he aahu kɛyashi nidumɔ be lɛ; ni nyɛbaaye nyɛniyenii* nyɛtɔrɔ, ni nyɛbaahi shi shweshweeshwe yɛ nyɛshikpɔŋ lɛ nɔ.+  Mahã toiŋjɔlɛ aba shikpɔŋ lɛ nɔ,+ ni nyɛbaakamɔ shi, ni mɔ ko mɔ ko woŋ nyɛhe gbeyei;+ ni majie kooloi awuiyelɔi kɛje shikpɔŋ lɛ nɔ, ni tawuu klante tsɔŋ nyɛshikpɔŋ lɛ nɔ kɛhoŋ.  Nyɛbaatiu nyɛhenyɛlɔi, ni amɛbaanyɔnyɔi yɛ klante naa yɛ nyɛhiɛ.  Nyɛteŋ mɛi enumɔ baatiu mɛi 100, ni nyɛteŋ mɛi 100 baatiu mɛi 10,000, ni nyɛhenyɛlɔi lɛ baanyɔnyɔi yɛ klante naa yɛ nyɛhiɛ.+  “‘Mahã midromɔ lɛ aba nyɛnɔ,* ni mahã nyɛfɔ ni nyɛshwere babaoo,+ ni maye kpaŋmɔ ni mikɛ nyɛ ekpaŋ lɛ nɔ.+ 10  Be ni nyɛkã he nyɛmiiye afi ni tsɔ hiɛ lɛ mli nibaa nii lɛ, ehe baahia ni nyɛjie emomo lɛ koni nyɛná gbɛ kɛhã ehee lɛ. 11  Ni mikɛ misɔlemɔ buu lɛ baama shi yɛ nyɛteŋ,+ ni mikwaŋ* nyɛ. 12  Manyiɛ nyɛteŋ ni matsɔ nyɛ-Nyɔŋmɔ,+ ni nyɛ hu nyɛbaatsɔ mimaŋ.+ 13  Miji Yehowa, nyɛ-Nyɔŋmɔ lɛ, mɔ ni jie nyɛ kɛje Ejipt shikpɔŋ lɛ nɔ koni nyɛkatsɔmɔ nyɔji nyɛhã amɛ dɔŋŋ lɛ. Ni mikumɔ nyɛkɔɔŋtsei lɛ, ni mihã nyɛhole nyɛyitsei anɔ kɛnyiɛ.* 14  “‘Shi kɛ́ nyɛbooo mi toi loo nyɛyeee kitãi nɛɛ fɛɛ anɔ,+ 15  ni nyɛkpoo mimlai lɛ,+ ni nyɛnyaŋe* miyiŋkpɛi* lɛ, ni nyɛyeee mikitãi lɛ fɛɛ anɔ, ni nyɛku mikpaŋmɔ lɛ mli lɛ,+ 16  no lɛ, mi hu mafee nyɛ nibii ni nyiɛ sɛɛ nɛɛ: mikɛ haomɔ kɛ wɔlɔmɔ fɔŋ kɛ atridii ni naa wa baagbala nyɛtoi, ni no baahã nyɛhiŋmɛii afite, ni nyɛwala* hiɛ baakpãtã. Nyɛbaadu nii* yakatswaa, ejaakɛ nyɛhenyɛlɔi moŋ baaye.+ 17  Majie mihiɛ maka nyɛ, ni nyɛhenyɛlɔi baaye nyɛnɔ kunim;+ ni mɛi ni nyɛɔ nyɛ lɛ baanaanaa nyɛnɔ,+ ni nyɛbaajo foi be ni mɔ ko mɔ ko enyiɛɛɛ nyɛsɛɛ.+ 18  “‘Ni kɛ́ enɛ fɛɛ sɛɛ lɛ nyɛbooo mi toi lɛ, no lɛ, magbala nyɛtoi shii kpawo fe tsutsu lɛ yɛ nyɛhe eshai lɛ ahewɔ. 19  Makumɔ shwãa ni nyɛshwãa waa lɛ, ni mahã nyɛŋwɛi lɛ atsɔ tamɔ dade,+ ní nyɛshikpɔŋ lɛ hu atsɔ tamɔ akɔɔble. 20  Nyɛbaafite nyɛhewalɛ fɛɛ efolo, ejaakɛ nyɛshikpɔŋ lɛ baŋ enii,+ ni shikpɔŋ lɛ nɔ tsei lɛ woŋ yibii. 21  “‘Ni kɛ́ nyɛtee nɔ nyɛte shi nyɛwo mi ni nyɛbooo mi toi lɛ, no lɛ, matswia nyɛ nii shii kpawo fe tsutsu lɛ yɛ nyɛhe eshai lɛ anaa. 22  Matsu kooloi awuiyelɔi kɛaaba nyɛteŋ,+ ni amɛbaagbe nyɛbii lɛ,+ ni amɛbaakpãtã nyɛshĩa kooloi lɛ ahiɛ, ni amɛbaahã nyɛyifalɛ nɔ agbɔ, ni nyɛgbɛjegbɛi lɛ baakamɔ shi efolo.+ 23  “‘Kɛ́ enɛɛmɛi fɛɛ sɛɛ lɛ, nyɛkpɛlɛɛɛ ni majaje nyɛ,+ ni nyɛtee nɔ nyɛte shi nyɛwo mi lɛ, 24  no lɛ, mi hu mate shi mawo nyɛ, ni mi diɛŋtsɛ matswia nyɛ nii shii kpawo yɛ nyɛhe eshai lɛ ahewɔ. 25  Mikɛ oweletɔɔ klante baaba nyɛnɔ yɛ kpaŋmɔ+ lɛ ni nyɛku mli lɛ hewɔ. Kɛ́ nyɛbua nyɛhe naa yɛ nyɛmaji lɛ amli lɛ, mahã hela aba nyɛteŋ,+ ni abaaŋɔ nyɛ awo henyɛlɔ ko dɛŋ.+ 26  Kɛ́ mifite nɔ ni hãa nyɛnáa niyenii* lɛ,+ yei nyɔŋma baashã nyɛniyenii lɛ yɛ flɔnɔɔ kome pɛ mli, ni amɛkɛ nsɛni baaŋmɛ nyɛniyenii lɛ amɛhã nyɛ;+ ni nyɛbaaye nii shi nyɛtɔrɔŋ.+ 27  “‘Kɛ́ enɛ fɛɛ sɛɛ lɛ, nyɛbooo mi toi, ni nyɛtee nɔ nyɛte shi nyɛwo mi lɛ, 28  no lɛ, mate shi mawo nyɛ waa,+ ni mi diɛŋtsɛ magbala nyɛtoi shii kpawo yɛ nyɛhe eshai lɛ ahewɔ. 29  Ni nyɛbaaye nyɛbihii lɛ aloo, ni nyɛbaaye nyɛbiyei lɛ hu aloo.+ 30  Makpãtã nyɛhei grɔŋŋi lɛ ahiɛ,+ ni mafolɔ nibii ni nyɛshãa tsofa-kɛ-ŋma yɛ nɔ lɛ mashwie, ni mabua nyɛgbohii lɛ anaa mashwie nyɛmagai ni yɔɔ nyaŋemɔ* ni wala bɛ amɛmli lɛ anɔ,+ ni matsɔ mihe* kɛje nyɛŋɔɔ bɔ ni baahã nyɛna akɛ miinyaŋe nyɛ.+ 31  Maŋɔ nyɛmaji lɛ mahã klante,+ ni mafee nyɛjamɔhei lɛ amaŋfɔ, ni mihereŋ nyɛfɔlei lɛ aŋma kpakpa* lɛ. 32  Mi diɛŋtsɛ mafee shikpɔŋ lɛ amaŋfɔ,+ ni nyɛhenyɛlɔi ni yɔɔ nɔ lɛ baakwɛ, ni amɛnaa baakpɛ amɛhe yɛ shikpɔŋ lɛ hewɔ.+ 33  Ni magbɛ nyɛ mashwã maji lɛ amli,+ ni magbala klante* kɛnyiɛ nyɛsɛɛ;+ ni nyɛshikpɔŋ lɛ baatsɔ amaŋfɔ,+ ni nyɛmaji lɛ ahiɛ baakpãtã. 34  “‘Nakai be lɛ mli lɛ, shikpɔŋ lɛ baawo hejɔɔmɔ bei nyɔmɔ ni ehiɛ lɛ, gbii abɔ fɛɛ ni ekã shi amaŋfɔ lɛ, be mli ni nyɛyɔɔ nyɛhenyɛlɔi lɛ ashikpɔŋ nɔ lɛ. Nakai be lɛ mli lɛ, shikpɔŋ lɛ baajɔɔ ehe,* ejaakɛ esa akɛ ewo hejɔɔmɔ bei nyɔmɔ ni ehiɛ lɛ.+ 35  Gbii fɛɛ ni shikpɔŋ lɛ kã shi amaŋfɔ lɛ ebaajɔɔ ehe, ejaakɛ ejɔɔɔ ehe yɛ nyɛhejɔɔmɔ bei lɛ amli be ni nyɛyɔɔ nɔ lɛ. 36  “‘Ni mɛi ni yi baaná wala lɛ,+ mahã amɛtsui afã yɛ amɛhenyɛlɔi lɛ ashikpɔŋ lɛ nɔ; ni baa ni kɔɔyɔɔ miitswa lɛ lɛ gbɛɛmɔ kɛkɛ baawo amɛ foi, ni amɛbaajo foi tamɔ mɔ ko ni miijo klante naa foi, ni amɛbaagbeegbee shi be ni mɔ ko mɔ ko enyiɛɛɛ amɛsɛɛ.+ 37  Eyɛ mli akɛ mɔ ko mɔ ko enyiɛɛɛ amɛsɛɛ moŋ, shi amɛbaatɛrɛ ni amɛgbeegbee amɛhe nɔ tamɔ mɛi ni miijo klante naa foi. Nyɛnyɛŋ nyɛhenyɛlɔi ahiɛ nyɛdamɔ.+ 38  Nyɛhiɛ baakpãtã yɛ jeŋmaji lɛ ateŋ,+ ni nyɛhenyɛlɔi lɛ ashikpɔŋ lɛ baami nyɛ. 39  Nyɛteŋ mɛi ni baashwɛ lɛ, abaashi amɛ ní amɛkpɔtɔ yɛ nyɛhenyɛlɔi lɛ ashikpɔŋ lɛ nɔ+ yɛ nyɛtɔmɔ lɛ hewɔ. Hɛɛ, amɛbaakpɔtɔ yɛ amɛtsɛmɛi lɛ atɔmɔi lɛ ahewɔ.+ 40  Kɛkɛ lɛ, amɛbaajaje amɛ diɛŋtsɛ amɛtɔmɔi+ kɛ amɛtsɛmɛi lɛ atɔmɔi kɛ anɔkwa ni amɛtsɛmɛi lɛ yeee lɛ amɛtsɔɔ, ni amɛbaakpɛlɛ nɔ akɛ amɛyeee anɔkwa akɛni amɛte shi amɛwo mi lɛ hewɔ.+ 41  Ni mi hu mite shi miwo amɛ+ ni mikɛ amɛ ba amɛhenyɛlɔi lɛ ashikpɔŋ nɔ.+ “‘Ekolɛ nakai be lɛ mli lɛ, amɛkpiliŋ amɛtsui dɔŋŋ, ni amɛbaaba amɛhe shi,+ ni amɛbaawo amɛtɔmɔ lɛ he nyɔmɔ. 42  Ni makai mikɛ Yakob kpaŋmɔ+ lɛ kɛ mikɛ Isak kpaŋmɔ+ lɛ, ni makai mikɛ Abraham kpaŋmɔ+ lɛ, ni makai shikpɔŋ lɛ. 43  Be ni amɛshi shikpɔŋ lɛ amɛfɔ̃ shi lɛ, nakai beiaŋ lɛ, shikpɔŋ lɛ baawo hejɔɔmɔ bei nyɔmɔ ni ehiɛ lɛ,+ ni ebaakã shi efolo ní amɛbɛ nɔ, ni amɛ hu amɛbaawo amɛtɔmɔ lɛ he nyɔmɔ, ejaakɛ amɛkpoo miyiŋkpɛi* lɛ ni amɛnyaŋe* mimlai lɛ.+ 44  Shi enɛɛmɛi fɛɛ sɛɛ lɛ, be ni amɛyɔɔ amɛhenyɛlɔi lɛ ashikpɔŋ lɛ nɔ lɛ, mikwaŋ amɛ kwraa,+ ni mishɛrɛŋ amɛ mishwieŋ bɔ ni baahã makpãtã amɛhiɛ kwraa, ní no ahã maku kpaŋmɔ ni mikɛ amɛ kpaŋ+ lɛ mli, ejaakɛ miji Yehowa, amɛ-Nyɔŋmɔ lɛ. 45  Amɛ hewɔ lɛ, makai kpaŋmɔ ni mikɛ amɛblematsɛmɛi lɛ kpaŋ lɛ,+ mɛi ni mijie kɛje Ejipt shikpɔŋ lɛ nɔ yɛ jeŋmaji lɛ ahiɛ+ bɔ ni afee ni mahã amɛna akɛ miji amɛ-Nyɔŋmɔ lɛ. Miji Yehowa lɛ.’” 46  Enɛɛmɛi ji taomɔ nii kɛ yiŋkpɛi* kɛ mlai ni Yehowa tsɔ Mose nɔ ekɛhã Israelbii lɛ yɛ Sinai Gɔŋ lɛ nɔ lɛ.+

Shishigbɛ Niŋmaa

Loo “akpɛ́.”
Loo “nyɛnaa akpɛa nyɛhe yɛ mijamɔhe lɛ hewɔ.” Hebri sht. ŋm., “nyɛshea mijamɔhe lɛ gbeyei.”
Loo “nyɛblodo.”
Hebri sht. ŋm., “Matsɔ mihiɛ mahã nyɛ.”
Loo “misusuma kwaŋ.”
Loo “mihã nyɛnyiɛ ní nyɛdɔrɔko nyɛmli.”
Loo “nyɛsusumai nyaŋe.”
Loo “mikojomɔi.”
Loo “nyɛsusuma.”
Loo “dumɔwui.”
Hebri sht. ŋm., “Kɛ́ mifite nyɛblodo tso.” Eeenyɛ efee akɛ, tso ni awieɔ he yɛ biɛ lɛ kɔɔ tsei ni akɛ blodoi tsotsoroɔ nɔ kɛtoɔ lɛ ahe.
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Loo “misusuma baatsɔ ehe.”
Loo “aŋma ni akɛkpãtãa mɔ; aŋma ni jɔɔ mɔ tsui he.” Hebri sht. ŋm., “aŋma ni hãa mɔ he jɔɔ lɛ.”
Loo “majie klante yɛ ehebo mli.”
Loo “baaye hejɔɔmɔ gbi.”
Loo “mikojomɔi.”
Loo “amɛsusuma nyaŋe.”
Loo “kojomɔi.”