3 Mose 21:1-24

  • Osɔfoi lɛ afee krɔŋkrɔŋ, ni amɛkabule amɛhe (1-9)

  • Osɔfonukpa lɛ akabule ehe (10-15)

  • Osɔfoi lɛ afee mɛi ni kpa ko bɛ amɛgbɔmɔtso he (16-24)

21  Yehowa tee nɔ ekɛ Mose wie akɛ: “Okɛ osɔfoi lɛ, ni ji Aaron bihii lɛ, awie ni okɛɛ amɛ akɛ, ‘Nyɛteŋ mɔ ko akabule ehe yɛ emaŋbii lɛ ateŋ mɔ ko ni egbo* hewɔ.+  Shi ebaanyɛ efee nakai yɛ ewekunyo kpaakpa, ni ji emami, epapa, ebinuu, ebiyoo, loo enyɛmi nuu hewɔ,  ni ebaanyɛ ebule ehe yɛ enyɛmi yoo hewɔ, kɛ́ eji oblayoo fro ni yɔɔ emasɛi, ní boteko gbalashihilɛ mli.  Ekabule ehe ni ewo ehe muji yɛ yoo ko ni ji emaŋbii lɛ ateŋ nuu ko ŋa* lɛ hewɔ.  Amɛkashɛ amɛyiteŋ,+ amɛkaku amɛtsɛŋ naa, ni amɛkafolɔ amɛhewolo nɔ gbɛ̃i.+  Amɛfee krɔŋkrɔŋ amɛhã amɛ-Nyɔŋmɔ lɛ,+ ni amɛkawo amɛ-Nyɔŋmɔ lɛ gbɛ́i lɛ he muji,+ ejaakɛ amɛ amɛkɛ Yehowa afɔlei ni akɛ la shãa, ni ji amɛ-Nyɔŋmɔ lɛ niyenii* lɛ hãa, ni esa akɛ amɛfee krɔŋkrɔŋ.+  Osɔfo lɛ kɛ ashawo, yoo ko ni abule lɛ, loo yoo ko ni ewu eshwie lɛ+ akabote gbalashihilɛ mli,+ ejaakɛ osɔfo lɛ, mɔ krɔŋkrɔŋ ji lɛ hã e-Nyɔŋmɔ lɛ.  Buu lɛ mɔ krɔŋkrɔŋ,+ ejaakɛ lɛ ekɛ o-Nyɔŋmɔ lɛ niyenii* lɛ hãa. Esa akɛ obu lɛ mɔ krɔŋkrɔŋ, ejaakɛ mi Yehowa, mɔ ni feɔ nyɛ krɔŋkrɔŋ lɛ, miyɛ krɔŋkrɔŋ.+  “‘Agbɛnɛ, kɛ́ osɔfo ko biyoo yafee ashawo ni ekɛbule ehe lɛ, ewo epapa he muji. Ashã lɛ yɛ la mli.+ 10  “‘Mɔ ni ji osɔfonukpa yɛ enyɛmimɛi lɛ ateŋ, ni afɔse mufɔɔ mu lɛ ashwie eyiteŋ,+ ni awó lɛ osɔfo* koni ewo osɔfo atadei lɛ,+ ekahã eyiteŋ fee tsaŋtsaŋ, ni ekagbála etadei hu.+ 11  Ekabɛŋkɛ gbonyo ko gbonyo ko;*+ ekabule ehe yɛ epapa loo emami po hewɔ. 12  Ekaje jamɔhe lɛ, ni ekabule e-Nyɔŋmɔ lɛ jamɔhe lɛ hu,+ ejaakɛ henɔjɔɔmɔ okadi, ni ji e-Nyɔŋmɔ lɛ mufɔɔ mu+ lɛ yɛ enɔ. Miji Yehowa lɛ. 13  “‘Eŋɔ yoo ni ji oblayoo fro akɛ eŋa.+ 14  Ekɛ yoo okulafo, yoo ni ashwie lɛ, yoo ni abule lɛ, loo ashawo akabote gbalashihilɛ mli; shi eŋɔ oblayoo fro yɛ emaŋbii lɛ ateŋ akɛ eŋa. 15  Ekabule eseshibii lɛ yɛ emaŋbii lɛ ateŋ,+ ejaakɛ miji Yehowa, mɔ ni feɔ lɛ krɔŋkrɔŋ lɛ.’” 16  Yehowa tee nɔ ekɛ Mose wie ekɛɛ: 17  “Kɛɛmɔ Aaron akɛ, ‘Oseshibii lɛ ateŋ nuu ko ni eje kpa akatsi ebɛŋkɛ ni ekɛ e-Nyɔŋmɔ lɛ niyenii* lɛ bahã, yɛ amɛyinɔi fɛɛ amli. 18  Kɛ́ nuu ko yɛ ni kpa ko yɛ egbɔmɔtso he lɛ, ekatsi ebɛŋkɛ: mɔ ni eshwila jio, akpake jio, mɔ ni kpa ko yɔɔ ehiɛ* jio, mɔ ni nine loo enane kome kɛ fe ekome jio, 19  mɔ ni nane loo enine eku jio, 20  afutsɛ jio, mɔ ni yɔɔ kpitioo fe nine* jio, mɔ ni kpa ko yɔɔ ehiŋmɛi he jio, mɔ ni afei efee lɛ jio, mɔ ni afilimata* eshwie ehe jio, mɔ ni dɔrɔ ejwara+ jio. 21  Osɔfo Aaron seshibii lɛ ateŋ mɔ ko ni kpa ko yɔɔ egbɔmɔtso he akatsi ebɛŋkɛ ni ekɛ Yehowa afɔlei ni akɛ la shãa lɛ bahã. Akɛni kpa ko yɛ egbɔmɔtso he hewɔ lɛ, ekatsi ebɛŋkɛ ni ekɛ e-Nyɔŋmɔ lɛ niyenii* lɛ bahã. 22  Ebaanyɛ eye e-Nyɔŋmɔ lɛ nibii ni yɔɔ krɔŋkrɔŋ fe fɛɛ+ kɛ nibii ni yɔɔ krɔŋkrɔŋ lɛ amli niyenii* lɛ eko.+ 23  Shi ekabɛŋkɛ pateeshɛŋ+ lɛ, ni ekabɛŋkɛ afɔleshaa latɛ+ lɛ hu, ejaakɛ kpa ko yɛ egbɔmɔtso he; ni ekabule mijamɔhe+ lɛ, ejaakɛ miji Yehowa, mɔ ni feɔ amɛ krɔŋkrɔŋ lɛ.’”+ 24  No hewɔ lɛ, Mose kɛɛ Aaron kɛ ebihii lɛ kɛ Israelbii lɛ fɛɛ enɛ.

Shishigbɛ Niŋmaa

Loo “yɛ emaŋbii lɛ ateŋ susuma ko.”
Loo “yɛ yoo ko ni wu yɔɔ emaŋbii lɛ ateŋ.”
Hebri sht. ŋm., “blodo,” ni ji afɔlei lɛ.
Hebri sht. ŋm., “blodo,” ni ji afɔlei lɛ.
Hebri sht. ŋm., “ni awo edɛŋ obɔ.” Kwɛmɔ 2Mo 29:9 shn.
Loo “susuma ko susuma ko ni egbo.” Hebri wiemɔkuli ni ji neʹphesh ni akɛtsu nii yɛ biɛ lɛ kɔɔ Hebri wiemɔkuli ko ni shishi ji “egbo” lɛ he.
Hebri sht. ŋm., “blodo.”
Hebri sht. ŋm., “mɔ ni gugɔ eje kpa.”
Shishitsɔɔmɔi komɛi kɛɔ akɛ, “mɔ ni etã loo fe nine.”
Loo “odɔŋ.”
Hebri sht. ŋm., “blodo.”
Hebri sht. ŋm., “blodo.”