3 Mose 3:1-17

  • Naanyobɔɔ afɔle lɛ (1-17)

    • Nyɛkayea fɔ loo lá (17)

3  “‘Kɛ́ efɔle lɛ ji naanyobɔɔ afɔle,*+ ni ekɛ tsina miiba lɛ, tsinanuu jio, tsinayoo jio, no lɛ, ekɛ nɔ ni kpa ko bɛ ehe aba Yehowa hiɛ.  Ekɛ enine aŋmɛ kooloo ni ekɛbaashã afɔle lɛ yiteŋ, ni agbe kooloo lɛ yɛ kpee buu lɛ shinaa lɛ naa; ni Aaron bihii lɛ, ni ji osɔfoi lɛ, kɛ lá lɛ ashwã afɔleshaa latɛ lɛ koji lɛ fɛɛ ahe kɛkpe.  Ekɛ naanyobɔɔ afɔle lɛ fã ko baahã akɛ afɔle ni akɛ la shãa ahãa Yehowa,+ ni nomɛi ji: fɔ+ ni ha mlinii lɛ ahe lɛ, kɛ fɔ fɛɛ ni yɔɔ mlinii lɛ ahewɔ lɛ,  kɛ sabai enyɔ lɛ kɛ fɔ ni yɔɔ amɛhe, ní bɛŋkɛ hɛ lɛ. Ejie fɔ ni yɔɔ mlɛbo lɛ he lɛ hu efata sabai lɛ ahe.+  Aaron bihii lɛ kɛshwie shãa afɔle ni kã lai ni jwere la lɛ nɔ yɛ afɔleshaa latɛ lɛ nɔ lɛ nɔ,+ ni amɛshã;* eji afɔle ni akɛ la shãa ni jeɔ ŋma jogbaŋŋ* woɔ Yehowa.+  “‘Kɛ́ ekɛ too miiba ebashã naanyobɔɔ afɔle ehã Yehowa lɛ, ekɛ toonuu loo tooyoo ni kpa ko bɛ ehe aba.+  Kɛ́ ekɛ gwantɛŋnuu* miiba ekɛbahã akɛ afɔle lɛ, no lɛ, ekɛba Yehowa hiɛ.  Ekɛ enine aŋmɛ kooloo ni ekɛbaashã afɔle lɛ yiteŋ, ni agbe kooloo lɛ yɛ kpee buu lɛ hiɛ. Aaron bihii lɛ kɛ elá lɛ ashwã afɔleshaa latɛ lɛ koji lɛ fɛɛ ahe kɛkpe.  Ekɛ naanyobɔɔ afɔle kooloo lɛ mli fɔ lɛ ahã akɛ afɔle ni akɛ la shãa ahãa Yehowa.+ Ejie lei agbo muu lɛ ni bɛŋkɛ kotosɛɛ wu lɛ, kɛ fɔ ni ha mlinii lɛ ahe lɛ, kɛ fɔ fɛɛ ni yɔɔ mlinii lɛ ahewɔ lɛ, 10  kɛ sabai enyɔ lɛ kɛ fɔ ni yɔɔ amɛhe, ní bɛŋkɛ hɛ lɛ. Ejie fɔ ni yɔɔ mlɛbo lɛ he lɛ hu efata sabai lɛ ahe.+ 11  Ni osɔfo lɛ ashã yɛ afɔleshaa latɛ lɛ nɔ akɛ niyenii,* ni ji afɔle ni akɛ la shãa ahãa Yehowa.+ 12  “‘Kɛ́ abotia ekɛbaa ekɛbashã afɔle lɛ, no lɛ, ekɛba Yehowa hiɛ. 13  Ekɛ enine aŋmɛ kooloo ni ekɛbaashã afɔle lɛ yiteŋ, ni agbe kooloo lɛ yɛ kpee buu lɛ hiɛ, ni Aaron bihii lɛ kɛ elá lɛ ashwã afɔleshaa latɛ lɛ koji lɛ fɛɛ ahe kɛkpe. 14  Nɔ ni ekɛbaahã akɛ afɔle ni akɛ la shãa ahãa Yehowa lɛ ji fɔ ni ha mlinii lɛ ahe lɛ, kɛ fɔ fɛɛ ni yɔɔ mlinii lɛ ahewɔ lɛ,+ 15  kɛ sabai enyɔ lɛ kɛ fɔ ni yɔɔ amɛhe, ní bɛŋkɛ hɛ lɛ. Ejie fɔ ni yɔɔ mlɛbo lɛ he lɛ hu efata sabai lɛ ahe. 16  Osɔfo lɛ ashã yɛ afɔleshaa latɛ lɛ nɔ akɛ niyenii,* ni ji afɔle ni akɛ la shãa ni jeɔ ŋma jogbaŋŋ.* Fɔ lɛ fɛɛ lɛ, Yehowa nɔ ni.+ 17  “‘Nyɛkayea fɔ ko fɔ ko loo lá ko lá ko+ kwraa. Enɛ atsɔ mla ni kã shi daa hã nyɛyinɔi lɛ fɛɛ, yɛ he fɛɛ he ni nyɛyɔɔ.’”

Shishigbɛ Niŋmaa

Loo “toiŋjɔlɛ afɔle.”
Hebri sht. ŋm., “amɛhã eje lasu.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “gwantɛŋ oblanyo.”
Hebri sht. ŋm., “blodo,” ni tsɔɔ akɛ, eji Nyɔŋmɔ gbɛfaŋnɔ yɛ naanyobɔɔ afɔle lɛ mli.
Hebri sht. ŋm., “blodo,” ni tsɔɔ akɛ, eji Nyɔŋmɔ gbɛfaŋnɔ yɛ naanyobɔɔ afɔle lɛ mli.
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”