3 Mose 14:1-57

  • Kpitiyelɔ ni kpiti lɛ etee lɛ hetsuumɔ (1-32)

  • Shĩai ni kpiti eshwie amɛhe lɛ ahetsuumɔ (33-57)

14  Yehowa tee nɔ ekɛ Mose wie ekɛɛ:  “Nɔ ni nyiɛ sɛɛ nɛɛ ji mla ni kã shi hã kpitiyelɔ yɛ gbi ni abaajaje akɛ ehe tse lɛ nɔ, gbi ni esa akɛ akɛ lɛ aba osɔfo lɛ ŋɔɔ lɛ.+  Osɔfo lɛ aje kpo kɛya nsara lɛ sɛɛ ni eyakwɛ lɛ. Kɛ́ kpitiyelɔ lɛ kpiti lɛ etee lɛ,  osɔfo lɛ afã lɛ ni ekɛ loofɔji enyɔ ni hiɛ kamɔ ni he tse, tseneduru tso, kpãa ni tsuɔ waa, kɛ hisopo aba koni akɛtsuu ehe.+  Osɔfo lɛ afã ni agbe loofɔji lɛ ateŋ ekome yɛ sũ nɔ ko ni akɛ nu ni ayayɛ kɛjɛ nu ni hoɔ mli ewo mli lɛ nɔ.  Shi eŋɔ loofɔlɔ ni hiɛ kã lɛ efata tseneduru tso lɛ, kɛ kpãa ni tsuɔ waa lɛ, kɛ hisopo lɛ he, ni ekɛ fɛɛ atsɔ loofɔlɔ ni agbe lɛ yɛ nu ni ayayɛ kɛjɛ nu ni hoɔ mli nɔ lɛ lá lɛ mli.  No sɛɛ lɛ, ekɛshwã mɔ ni tsuɔ ehe kɛjɛɔ kpiti ni eye lɛ mli lɛ nɔ shii kpawo, ni ejaje akɛ ehe tse, ni eŋmɛɛ loofɔlɔ ni hiɛ kã lɛ he yɛ ŋa lɛ nɔ.+  “Mɔ ni tsuɔ ehe lɛ afɔ etadei lɛ ahe ni eshɛ ehetsɔi fɛɛ ni ekɛ nu aju ehe, kɛkɛ lɛ, ehe baatse. No sɛɛ lɛ, eba nsara lɛ mli, shi ekaya emama tsũ lɛ mli gbii kpawo.  Gbi ni ji kpawo lɛ nɔ lɛ, eshɛ eyiteŋ tsɔi kɛ etsɛŋ kɛ ehiŋmɛi sɛɛ tsɔi fɛɛ. Kɛ́ eshɛ ehetsɔi lɛ fɛɛ egbe naa lɛ, efɔ etadei lɛ ahe, ní ekɛ nu aju ehe, kɛkɛ lɛ ehe baatse. 10  “Gbi ni ji kpaanyɔ lɛ nɔ lɛ, ekɛ gwantɛŋhii* enyɔ ni kpa ko bɛ amɛhe, gwantɛŋbi ni ji yoo ni náko fe afi ni kpa ko bɛ ehe aba,+ ekɛ ashikishaŋ kpakpa efa mlijai nyɔŋma mli etɛ* ni akɛ mu efutu hu aba akɛ ŋmaa* afɔle,+ kɛ mu lɔg susumɔnɔ kome;*+ 11  ni osɔfo lɛ ni jajeɔ akɛ mɔ lɛ he tse lɛ aŋɔ mɔ ni tsuɔ ehe lɛ kɛ nibii ni akɛbaashã afɔle lɛ kɛba Yehowa hiɛ yɛ kpee buu lɛ shinaa lɛ naa. 12  Osɔfo lɛ aŋɔ gwantɛŋhii* lɛ ateŋ ekome, ni ekɛ mu lɔg susumɔnɔ kome lɛ hu afata he ni ekɛhã akɛ sɔ̃ afɔle,+ ni efɔ̃ fɛɛ kɛya kɛba yɛ Yehowa hiɛ akɛ fɔ̃ɔ afɔle.+ 13  Ni egbe gwantɛŋnuu* lɛ yɛ he ni agbeɔ esha afɔle kɛ shãa afɔle kooloi lɛ yɛ lɛ,+ yɛ he ko ni yɔɔ krɔŋkrɔŋ, ejaakɛ sɔ̃ afɔle lɛ ji osɔfo lɛ nɔ,+ tamɔ esha afɔle lɛ nɔŋŋ. Eji nɔ ko ni yɔɔ krɔŋkrɔŋ fe fɛɛ.+ 14  “No sɛɛ lɛ, osɔfo lɛ aŋɔ sɔ̃ afɔle kooloo lɛ lá lɛ eko, ni ekɛkpa mɔ ni tsuɔ ehe lɛ ninejurɔ toi naa kɛ eninejurɔ gɔnti naa kɛ enanejurɔ gɔnti naa. 15  Ni osɔfo lɛ aŋɔ mu lɔg susumɔnɔ lɛ eko,+ ni etsɔ ewo lɛ diɛŋtsɛ enine abɛku kɔkɔ mli. 16  No sɛɛ lɛ, ekɛ eninejurɔ wao atsɔ mu ni yɔɔ enine abɛku kɔkɔ mli lɛ mli, ni ekɛ ewao lɛ ashwã mu lɛ eko shii kpawo yɛ Yehowa hiɛ. 17  Osɔfo lɛ kɛ mu ni eshwɛ yɛ ekɔkɔ mli lɛ eko akpa mɔ ni tsuɔ ehe lɛ ninejurɔ toi naa kɛ eninejurɔ gɔnti naa kɛ enanejurɔ gɔnti naa, yɛ sɔ̃ afɔle kooloo lɛ lá lɛ nɔ. 18  Osɔfo lɛ kɛ mu ni eshwɛ yɛ ekɔkɔ mli lɛ akpa mɔ ni tsuɔ ehe lɛ yiteŋ, ni osɔfo lɛ akpãtã ahã lɛ yɛ Yehowa hiɛ.+ 19  “Osɔfo lɛ ashã esha afɔle kooloo lɛ,+ ni ekpãtã ehã mɔ ni tsuɔ ehe kɛjɛɔ ehe muji lɛ mli lɛ, ni no sɛɛ lɛ, egbe shãa afɔle kooloo lɛ. 20  Ni osɔfo lɛ ashã shãa afɔle lɛ kɛ ŋmaa afɔle+ lɛ yɛ afɔleshaa latɛ lɛ nɔ, ni osɔfo lɛ akpãtã ahã lɛ,+ kɛkɛ lɛ ehe baatse.+ 21  “Shi kɛ́ ohiafo ji lɛ ni ebɛ nɔ ko tsɔ lɛ, no lɛ, ekɛ gwantɛŋnuu* kome aba akɛ sɔ̃ afɔle, ní afɔ̃ kɛya kɛba koni akɛkpãtã ahã lɛ, ni ekɛ ashikishaŋ kpakpa efa mlijai nyɔŋma mli ekome* ni akɛ mu efutu ni akɛbaahã akɛ ŋmaa afɔle, kɛ mu lɔg susumɔnɔ kome, 22  kɛ ŋa mli okpoi enyɔ loo shĩa okpoi bibii enyɔ afata he, yɛ bɔ ni ebaanyɛ ehã naa. Akɛ ekome baahã akɛ esha afɔle, ni akɛ ekroko lɛ hu baahã akɛ shãa afɔle.+ 23  Gbi ni ji kpaanyɔ lɛ nɔ lɛ,+ ekɛ nibii nɛɛ abahã osɔfo lɛ yɛ kpee buu lɛ shinaa lɛ naa yɛ Yehowa hiɛ+ koni akɛtsuu ehe ni ehe atse. 24  “Osɔfo lɛ aŋɔ sɔ̃ afɔle gwantɛŋnuu* lɛ,+ kɛ mu lɔg susumɔnɔ lɛ, ni osɔfo lɛ afɔ̃ kɛya kɛba yɛ Yehowa hiɛ akɛ fɔ̃ɔ afɔle.+ 25  No sɛɛ lɛ, egbe sɔ̃ afɔle gwantɛŋnuu* lɛ, ni eŋɔ sɔ̃ afɔle kooloo lɛ lá lɛ eko, ni ekɛkpa mɔ ni tsuɔ ehe lɛ ninejurɔ toi naa kɛ eninejurɔ gɔnti naa kɛ enanejurɔ gɔnti naa.+ 26  Osɔfo lɛ atsɔ mu lɛ eko ewo lɛ diɛŋtsɛ enine abɛku kɔkɔ mli,+ 27  ni ekɛ eninejurɔ wao ashwã mu ni yɔɔ enine abɛku kɔkɔ mli lɛ eko shii kpawo yɛ Yehowa hiɛ. 28  Ni osɔfo lɛ kɛ mu ni yɔɔ ekɔkɔ mli lɛ eko akpa mɔ ni tsuɔ ehe lɛ ninejurɔ toi naa kɛ eninejurɔ gɔnti naa kɛ enanejurɔ gɔnti naa yɛ he ni ekɛ sɔ̃ afɔle kooloo lɛ lá lɛ kpa lɛ nɔŋŋ. 29  No sɛɛ lɛ, osɔfo lɛ kɛ mu ni eshwɛ yɛ ekɔkɔ mli lɛ akpa mɔ ni tsuɔ ehe lɛ yiteŋ, bɔ ni afee ni ekɛkpãtã ehã lɛ yɛ Yehowa hiɛ. 30  “Ekɛ ŋa mli okpoi lɛ ateŋ ekome loo shĩa okpoi bibii lɛ ateŋ ekome baahã, yɛ bɔ ni ebaanyɛ ehã naa,+ 31  amɛteŋ nɔ ni ebaanyɛ ehé; ekome kɛhã esha afɔle, kɛ ekroko lɛ hu kɛhã shãa afɔle,+ ní ekɛ ŋmaa afɔle lɛ afata he; ni osɔfo lɛ akpãtã ahã mɔ ni tsuɔ ehe lɛ, yɛ Yehowa hiɛ.+ 32  “Enɛ ji mla ni kã shi hã mɔ ni kulɛ eeye kpiti shi ebɛ nɔ ni ekɛbaahé ehetsuumɔ nii lɛ.” 33  Ni Yehowa kɛɛ Mose kɛ Aaron akɛ: 34  “Kɛ́ nyɛyashɛ Kanaan shikpɔŋ+ ni mikɛhãa nyɛ akɛ nyɛnɔ lɛ nɔ,+ ni miŋmɛ gbɛ ni hela ni ji kpiti lɛ shwie shĩa ko he yɛ nyɛshikpɔŋ lɛ nɔ lɛ,+ 35  no lɛ, shĩatsɛ lɛ aba ni ebakɛɛ osɔfo lɛ akɛ, ‘Nɔ ko tamɔ hela ko eshwie mishĩa lɛ he.’ 36  Osɔfo lɛ afã koni ajie shĩa lɛ mli nibii lɛ fɛɛ kɛje kpo dani eba ebakwɛ hela lɛ, bɔ ni afee ni ekajaje akɛ shĩa lɛ mli nibii lɛ fɛɛ ahe tseee; ni no sɛɛ lɛ, osɔfo lɛ abote shĩa lɛ mli ni ekwɛ shĩa lɛ. 37  Ekwɛ he ni nii lɛ eshwie lɛ, ni kɛ́ nɔ ko tamɔ baa ŋmɔŋ su ni miiba lɛ tamɔ wuɔfɔ loo nɔ ko tsuru eshwie shĩa lɛ gbogboi lɛ ahe, ni ana akɛ ebote gbogboi lɛ amli vii lɛ, 38  no lɛ, osɔfo lɛ atsɔ shĩa lɛ shinaa lɛ mli kɛje kpo ni eŋmɛ shĩa lɛ mli gbii kpawo.+ 39  “No sɛɛ lɛ, osɔfo lɛ aku sɛɛ abakwɛ shĩa lɛ yɛ gbi ni ji kpawo lɛ nɔ. Kɛ́ hela lɛ elɛɛ shi yɛ shĩa lɛ gbogboi lɛ ahe lɛ, 40  no lɛ, osɔfo lɛ afã ni ajie tɛi ni hela lɛ eshwie he lɛ, ni ayashɛrɛ ashwie maŋ lɛ sɛɛ he ko ni tseee. 41  No sɛɛ lɛ, ehã aŋmala shĩa lɛ mligbɛ fitsofitso, ni ayatsi sũ* ni aŋmala lɛ ashwie maŋ lɛ sɛɛ he ko ni tseee. 42  No sɛɛ lɛ, akɛ tɛi krokomɛi ahɔlɔ hei ni ajie tɛi lɛ yɛ lɛ, ni akɛ sũ kroko afee mɔɔta ni akɛkpa* shĩa lɛ gbogboi lɛ ahe. 43  “Shi kɛ́ be ni ajie tɛi lɛ ni aŋmala shĩa lɛ gbogboi lɛ ahe, ní asaa akɛ sũ kroko ekpa* he sɛɛ lɛ hela lɛ ku sɛɛ eba ekoŋŋ lɛ, 44  no lɛ, osɔfo lɛ aya shĩa lɛ mli ni eyakwɛ. Kɛ́ hela lɛ elɛɛ shi yɛ shĩa lɛ mli lɛ, no lɛ, kpiti fɔŋ+ ji nɔ ni eshwie shĩa lɛ he lɛ. Shĩa lɛ he tseee. 45  Ehã akumɔ shĩa lɛ ashwie shi—etɛi lɛ kɛ etsei lɛ kɛ sũ ni akɛkpa* shĩa lɛ he lɛ fɛɛ—ní aloo kɛya maŋ lɛ sɛɛ he ko ni tseee.+ 46  Shi mɔ fɛɛ mɔ ni boteɔ shĩa lɛ mli yɛ gbii ni aŋmɛ mli+ lɛ eko nɔ lɛ he tseee kɛyashi gbɛkɛ;+ 47  ni mɔ fɛɛ mɔ ni baakã shĩa lɛ mli lɛ afɔ etadei lɛ ahe, ni mɔ fɛɛ mɔ ni baaye nii yɛ shĩa lɛ mli lɛ afɔ etadei lɛ ahe. 48  “Shi kɛ́ osɔfo lɛ ba ni ebana akɛ hela lɛ elɛɛko shi yɛ shĩa lɛ mli be ni asaa akɛ sũ kroko ekpa* he sɛɛ lɛ, no lɛ, osɔfo lɛ ajaje akɛ shĩa lɛ he tse, ejaakɛ hela lɛ etee. 49  Bɔ ni afee ni atsuu shĩa lɛ he kɛjɛ ehe ni tseee* lɛ mli lɛ, eŋɔ loofɔji enyɔ kɛ tseneduru tso kɛ kpãa ni tsuɔ waa kɛ hisopo.+ 50  Egbe loofɔji lɛ ateŋ ekome yɛ sũ nɔ ko ni akɛ nu ni ayayɛ kɛjɛ nu ni hoɔ mli ewo mli lɛ nɔ. 51  Ni eŋɔ tseneduru tso lɛ kɛ hisopo lɛ kɛ kpãa ni tsuɔ waa lɛ kɛ loofɔlɔ ni hiɛ kã lɛ, ni ekɛ fɛɛ atsɔ loofɔlɔ ni agbe lɛ lɛ lá kɛ nu ni ayayɛ kɛjɛ nu ni hoɔ mli lɛ mli, ni ekɛshwã he ni shĩa lɛ yɔɔ lɛ gbɛ shii kpawo.+ 52  Ni ekɛ loofɔlɔ lɛ lá lɛ kɛ nu ni ayɛ kɛjɛ nu ni hoɔ mli lɛ kɛ loofɔlɔ ni hiɛ kã lɛ kɛ tseneduru tso lɛ kɛ hisopo lɛ kɛ kpãa ni tsuɔ waa lɛ atsuu shĩa lɛ he kɛjɛ ehe ni tseee* lɛ mli. 53  No sɛɛ lɛ, eŋmɛɛ loofɔlɔ ni hiɛ kã lɛ he yɛ maŋ lɛ sɛɛ yɛ ŋa lɛ nɔ, ní ekpãtã ehã shĩa lɛ, kɛkɛ lɛ shĩa lɛ he baatse. 54  “Enɛ ji mla ni kã shi hã kpiti fɛɛ kpiti kɛ nɔ ko ni shwieɔ mɔ yiteŋ loo tsɛŋ tsɔi mli+ 55  kɛ kpiti ni shwieɔ atade mli+ loo shĩa he+ 56  kɛ nibii ni fuɔ yɛ mɔ hewolo nɔ kɛ nɔ ko ni feɔ mɔ ni hiɛ mɔɔ akaka kɛ gbɛ̃i,+ 57  bɔ ni afee ni akɛna be ni nɔ ko he tseee kɛ be ni nɔ ko he tse.+ Enɛ ji mla ni kɔɔ kpiti he lɛ.”+

Shishigbɛ Niŋmaa

Loo “gwantɛŋ oblahii.”
Efa mlijai nyɔŋma mli etɛ feɔ litai 6.6 (kwat 6). Kwɛmɔ Saji Krokomɛi B14 lɛ.
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Lɔg kome feɔ litai 0.31 (pt 0.66). Kwɛmɔ Saji Krokomɛi B14 lɛ.
Loo “gwantɛŋ oblahii.”
Loo “gwantɛŋ oblanyo.”
Loo “gwantɛŋ oblanyo.”
Efa mlijai nyɔŋma mli ekome feɔ litai 2.2 (kwat 2). Kwɛmɔ Saji Krokomɛi B14 lɛ.
Loo “gwantɛŋ oblanyo.”
Loo “gwantɛŋ oblanyo.”
Loo “sũ mɔɔta ni akɛplasta gbogboi lɛ ahe.”
Loo “ni akɛplasta.”
Loo “eplasta.”
Loo “akɛplasta.”
Loo “eplasta.”
Hebri sht. ŋm., “ehe esha.”
Hebri sht. ŋm., “ehe esha.”