Hnei Haykanush, ketre föe ka hane nyiqaane cainöje trootro, hna öhne ezine la hnalapa i eahlo la ketre passeport. Nge ame hnine lai passeport, hetrenyi la ca kart ne huli mani memine la ketre mani ka tru. Hnei eahlo pë hë hna canga thuemacane la föi eahlo, ka hane fe nyiqaane cainöje trootro.

Ngacama hetre gufa i nyidro, ngo hnei nyidroti kö hna bëeke fë la passeport kowe la atrekë ewekën. Matre, ame la nyidroti a traqa kowe la hnalapa ne la atrekë paseporen, hnene la hnepe lapa asë hna haine la aqane ujë i nyidro. Hnei Haykanush me föi eahlo hna qaja ka hape, ame la kepine matre ujë jë nyidro tune lai ke, hnene laka, lue ka ini Tusi Hmitrötr nyidro. Nge thupene lai, nyidroti pë hë a qaja jë la pengöne la Itretre Anyipici Iehova, me hamë itusi koi angatr.

Pine laka, tru catre la hni ne ole ne la hnepe lapa, haawe, hnei angatre hna mekune troa hamë manie koi Haykanush, ngo tha hna kapa kö hnei eahlo. Ngo ame ju kö la drai thupen, hnene lai thin hna tro koi Haykanush, me ielene la lue trefëne troa kapa la ketre otrene wanakoim ka mingöming, nge hetrenyi hune ej la ketre diamant.

Nyipici laka, tune la hnepe lapa celë, ala nyimu la itre atr ka sesëkötr ngöne la angatr a atre la aqane huliwa i Haykanush me föi eahlo. Ngo hapeu, nemene la aqane goeëne Iehova la aqane nyipici nyidro? Nge nyipi ewekë kö tro sa hane nyipici tui nyidro?

Tha jole kö troa sa la lue hnyinge celë. Pine nemen? Pine laka, xecie hnyawa kowe la itre hlue i Iehova laka, nyipi ewekë catre kö troa melëne la itre thiina i Nyidrë hune la troa thele la itre diamant, me gool, me itre xa ewekë ju kö ka tru alameken. Ame la itre ewekë ka tru alamekene koi Iehova, tre tha ceitu kö memine la hna thele hnene la itre atr. (Isaia 55:8, 9) Ka xecie hnyawa kowe la itre hlue i Iehova laka, atraqatre kö la madrine i Nyidrë la angatr a catre melëne la itre thiina i Nyidrë.

Kola mama lai ngöne la aqane qeje pengöne hnei Tusi Hmitrötr la inamacan me trotrohnin. Ite Edomë 3:13-15 a qaja ka hape: “Manathithi hë la ate öhne la inamacan, memine la ate hete trotrohnin. Ke tru la thangan’ eje hune la thangane la sileva, memine la tropan’ eje hune la gol. Nyipi ewekë eje hune la ite penina, nge ame la nöjei tenge nyi ’ö asë tha ijije kö ej.” Haawe, mama cile hi laka, ka sisitria kö koi Iehova la itre thiina cili hune la itre mo ka tru alameken.

Tro sa pane ce ithanatane la ketre thiina i Akötresie, ene la troa nyipici.

Iehova hi la tulu göi troa nyipici, ke ame Nyidrë tre, “ka tha’teine thoi.” (Tito 1:2) Ketre, kola mama la aqane wang atrune Nyidrë la thiina cili ngöne lo Paulo a cinyihane kowe la itre keresiano ne Heberu, ka hape: “Thithijë nyipunie thatraqai hun ; ke eëhuni a mekune laka hetenyi hë huni la mekuthethewe ka loi, eëhuni a ajane troa loi thina [maine nyipici] ngöne la nöjei ewekë asëjëihë.”—Heberu 13:18.

Hnei Iesu mina fe hna amamai tulu göi troa nyipici. Ame lo ijine kola kootrë nyidrë hnei Kaiafa, atre huuje ka sisitria, hnei Kaiafa hna hnyingë nyidrë ka hape, “Ini a isisinyikeu me eö göi Akötesie ka mel, mate tro eö a qaja koi hun, ka hape, eö la Keriso Hupuna i Akötesie, hape u ?” Tha hnei Iesu kö hna thoi, ngo hnei nyidrëti pe hna qaja mekötin ka hape, nyidrëti hi la Mesia. Hnei Iesu hna nyipici ngacama atre hnyawa hi nyidrëti laka, nyidrëti hi a thue jë i angatr troa xölehuji nyidrë, me humuthi nyidrë.—Mataio 26:63-67.

Ngo tune kaa fe së? Tro kö së a huliwa qene atrekënö maine thoi göi troa kepe thupen?

Eje hi laka, tha ka hmaloi kö troa huliwa nyipici ngöne la hnedrai së, ke kola lapa xötreithi së hnene la itre atr ka “hnimi angate kö, me meciu mani.” (2 Timoteo 3:2) Ketre, elë menu catre hë la itre thupen mo, nge xalaithe hi la itre huliwa, matre tha cile hë la itre atr troa huliwa qene atrekënö, me thoi, me atrekënö. Hna jilapan asë la fen hnene la itre aqane ujë cili, matre kola mekune ka hape, pëkö xa jëne troa trenamo enehila. Matre, hna hane löthe fe la itre xa keresiano hnene la aqane mekune cili, nge pine laka angatr a hane “pi hete mo,” tha loi hë la aqane imelekeu i angatr me itre trejin.—1 Timoteo 3:8; Tito 1:7.

Ngo eje hi laka, tha itre keresiano asë kö la ka hane ujë tun, ke angatr a catre nyipici tui Iesu. Ka tru koi angatre la troa melëne la itre thiina i Akötresie, hune la troa hetre mo maine hetre göhnë ka tru. Celë hi matre, ame ngöne la hna ini, tha angatre kö a igoeë qa göi troa hetre hatre ka loi. (Ite Edomë 20:23) Ngacama tha hna nyithupene kö koi së la hne së hna huliwa nyipici tui Haykanush, ngo, ame  la ka nyipi ewekë, tre ene la troa kuca pala hi la meköt xajawa i Iehova, me hetrenyi la mekuthetheu ka loi. Lue manathithi lai ka sisitria catre hune la itre mo!

Hanawange la hna melëne hnei Gagik. Öni angeic: “Hnenge ekö hna huliwa ngöne la ketre entreprise ka tru. Hnei eahuni hna majemine huliwa qene atrekënö matre tha tro kö eahuni a hotre koi mus. Nge pine laka eni a cilëne la ketre göhnë ka tru, qâ i eni hi troa ‘ce wange’ memine la itre ka kepe hotr, matre tha tro kö a tranyi hun. Ame hë la pun, kola jele atrekënö ni. Ngo ame hë la eni a atre la nyipici, xele ju hi ni ma huliwa tune lai ngacama lolo catre la thupe i eni. Hnenge pë hë hna acile la sipu entreprise i eni, nge ame hë e cili, eni ha huliwa nyipici, me hotre hnyawa koi mus.”—2 Korinito 8:21.

Öni Gagik hmaca: “Nyipici laka, nango jol pi hë koi ni troa thupëne hnyawa la hnepe lapang, ke tha tru pe kö la manie hnenge hna kapa. Ngo tru catre pe la madrineng enehila, nge eje hi laka, lapa hnyawa ha la mekuthetheung ke lolo hë la thiinang xajawa i Iehova. Eni hë a amamai tulu kowe la lue neköng, nge hna hane fe thue hnëqang e hnine la ekalesia. Ketre, kolo ha qaja aloinyi ni hnene la itre ka kepe hotr me itre ka ce huliwa me eni.”

Atraqatre la madrine i Iehova kowe la itre hlue i Nyidrë ka isine troa melëne la itre thiina i Nyidrë, tune la troa huliwa nyipici. (Tito 2:10) Nge maine tro sa ujë tune lai, tha tro pi kö Nyidrëti a nuaxöji së. Hnei Davita joxu hna hane melëne lai, öni angeic: “Nekönate ni ekö, ngo qatë hë enehila ; nge tha öhne kö ni la ate ka meköti a hna tij, memine la ite matra i angeic’ a sipo xen.”—Salamo 37:25.

Hnei Rutha mina fe hna hane öhne la ixatua i Iehova. Ketre föe ka nyipici Rutha, ke hnene laka, tha hnei angeice kö hna trotriji Naomi ngacama qatre föe hë eahlo. Hnei angeice fe hna fek kowe la nöje Isaraela, me nyi hluene la Akötresie ka cas. (Rutha 1:16, 17) Ketre, hnei angeice hna trongëne hnyawa la itre wathebo ne la nöj, me huliwa catre troa hleme la itre wene hna amë pe thatraqane la itre ka puafala. Nge tune lo hna qaja hnei Davita, tha hnei Iehova kö hna nuaxöji Rutha me Naomi.(Rutha 2:2-18) Tha hnei Nyidrëti hmekuje kö hna hamëne la ka ijije koi Rutha, ngo hnei Nyidrëti fe hna atrunyi angeic, me aijijë angeic troa ketre xötrapane i Davita joxu me Iesu lo Mesia!—Rutha 4:13-17; Mataio 1:5, 16.

Nyipici laka, tha ka hmaloi kö kowe la itre xa hlue i Iehova troa hetre manie thatraqane la mele i angatr. Ngo pine laka, tha aja i angatre kö troa huliwa qene atrekënö, haawe angatr a huliwa catr göi troa hetrenyi la ka ijij. E cili, angatr a amamane laka, nyipi ewekë catre kö koi angatr la troa melëne la itre thiina i Akötresie, hune la troa hetrenyi la itre mo ne fen.—Ite Edomë 12:24; Efeso 4:28.

Tui Rutha, nyimutre la itre keresiano e cailo fen ka mejiune koi Iehova. Angatr a qale catre kowe la Atre thingehnaeane ka hape: “Tha trojë kö ni a nue eö, nge tha trojë kö ni a tiji ’ö.” (Heberu 13:5) Hnei Iehova hna anyimua amamane la men me aja i Nyidrë troa xatuane la itre hlue i Nyidrë ka hane huliwa nyipici. Ketre, Nyidrëti a eatrëne lo hna thingehnaeane ka hape, tro pala hi la itre hlue i Nyidrë a hetrenyi la ka ijij.—Mataio 6:33.

Maine nyipici laka, itre atr a wang atrune la itre diamant me itre xa ewekë ju kö, ngo tha eje kö la aqane waiewekë ne la Keme së e koho hnengödrai. Nyidrëti pe a wang atrune catrëne la itre thiina së ka lolo, tune la troa huliwa nyipici, ke sisitria kö itre ej hune la itre mo ne fen!