Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Juun 2016

Tro Kö Epuni a Thixötr?

Tro Kö Epuni a Thixötr?

“Loi e . . . inuekeune nyipunie.”KOLOSE 3:13.

NYIMA: 12175

1, 2. Nemene la aqane perofetane Tusi Hmitrötr la aqane troa kökötre la nöje i Iehova?

AME e cailo fen, hetre organizasio hna nyi atren hnene la itre atr ka nyihlue i Iehova, ene la Itretre Anyipici Iehova. Maine nyipici laka, itre atre lai ka tria, ngo Iehova la ka xomiujine la organizasio cili jëne la uati hmitrötr. Tro sa ce wange la itre aqane amanathithi angatr hnei Nyidrë.

2 Ame lo 1914, ala xalaithe hi la itre ka nyihlue i Iehova. Ngo hnene laka, hnei Iehova hna amanathithine la huliwa ne cainöj, ame hna atre la itre nyipici ne la Tusi Hmitrötr hnene la itre milio lao atr, me hane nyihlue i Iehova. Hna hane perofetane la aqane troa kökötre la nöje i Iehova, kola hape: “Tro ha ala thausane la ala xalaith, nge tro ha nöje ka cate la ka co ; tro ni Iehova a asaqen’ eje ngöne la ijin’ ej.” (Isaia 60:22) Ame enehila, mama hnyawa ha laka eatre hë la hna perofetane celë. Hna aceitunëne la itre hlue i Iehova memine la ketre nöje ka tru. Kola anyipicine lai ke nyimutre pi hë la itre nöj e cailo fen laka, ame la itre atren, tre tha weje kö la etrune la itre hlue i Iehova.

3. Nemene la thiina ka mama thene la itre hlue i Iehova?

3 Ame enhila ngöne la itre drai ne la pun, Iehova a xatuane la  itre hlue i Nyidrë troa catre ihnimikeu. “Akötesieti la ihnim,” matre angatr a nyitipu Nyidrë. (1 Ioane 4:8) Ketre, hnei Iesu hna ahnithe kowe la itretre drei nyidrë ka hape: “Tro nyipunieti a ihnimikeun.” Nge öni nyidrëti hmaca jë: “Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:34, 35) Ame ngöne la itre macatre ka ase hë, hnene la itre hlue i Iehova hna amamane la ihnimi cili, ngacama kola upe la itre atrene la nöje troa isi. Ame ngöne lo hnaaluene isi ka tru, traqa koi 55 milio lao atr hna humuth, ngo pëkö ca hna humuth hnene la itre hlue i Iehova. (E jë la Mika 4:1, 3.) Celë hi ka aijijë angatr troa hane qaja tui Paulo ka hape: “Gufa kö ni ene la madra ne la nöjei ate asë.”—Ite Huliwa 20:26.

4. Pine nemene matre nyine haine la aqane kökötre la nöje i Iehova?

4 Kola kökötre pala hi la etrune la itre hlue i Iehova, ngacama ka catre la ithupëjia me angatr, ene Satana. Angeice hi la “haze ne la fen.” (2 Korinito 4:4) Angeic la tane la itre organizasio ka kuci politik, memine fe la itre jëne ithuemacany, tune la itre nuvel. Matre angeic a thele troa apëne la huliwa ne cainöj jëne la itre ewekë cili. Ngacama gufa kö la huliwa i angeic, ngo angeice pala hi a thele troa sewe së troa nyihlue i Iehova, ke atre hnyawa hi angeic laka, xoxopatre pe hi la ijine i angeic.—Hna Amamane 12:12.

E KUCA JË LA NGAZO HNEI KETRE?

5. Pine nemene matre akötrë së jë hnei itre trejin e itre xa ijin? (Wange ju la pane iatr.)

5 Atre hnyawa hi la itre hlue i Iehova laka, nyipi ewekë catre troa hnimi Akötresie me itre atr. Öni Iesu: “ ‘Tro eö a aja Joxu Akötesi ’ö hnene la hni’ö ka pexej, me u i ’ö ka pexej, me mekune i ’ö ka pexej.’ Celë hi wathebo ka tru nge hnapan. Nge ame la hnaaluen, te, tune mina hi, ka hape, ‘Tro eö a hnime la ate lapa eashenyi ’ö tui eö hi.’ ” (Mataio 22:35-39) Ngo öni Tusi Hmitrötr, hna hnaho së memine la ngazo, thangane la tha idrei Adamu. (E jë la Roma 5:12, 19.) Matre ame itre xa ijin, itre trejin a qaja maine kuca la ketre ewekë ka akötrë së. Tune kaa la aqane tro sa ujë e cili? Tro pala kö a catre la ihnimi së koi Iehova? Tro kö së a catre mele nyipici koi Nyidrë me kowe la itre hlue i Nyidrë? Tusi Hmitrötr a qeje pengöne la itre hlue i Iehova ekö, ka qaja me kuca la itre ewekë ka akötrë itre xan. Tro sa ce wange la ewekë ka traqa koi angatr, memine fe la itre ini koi së.

Maine mele ju fe epuni ngöne la ijine i Eli me lue nekö i angeic, tro kö epuni lai a thixötr? (Wange ju fe la paragarafe 6)

6. Nemene la aqane ujë i Eli kowe la lue nekö i angeic?

6 Eli la atre huuje ka sisitria e Isaraela ekö, ngo lue ka tha idrei la lue nekö i angeice trahmany, kola ena la itre wathebo i Iehova. Öni Tusi Hmitrötr: “Lue nekö i Belial la lue nekö i Eli ; nge pëkö ca metrötre i nyidro koi Iehova.” (1 Samuela 2:12, MN) Atre hnyawa hi Eli la itre ngazo hna kuca hnene la lue nekö i angeic, ngo tha hnei angeice pi kö hna haji nyidro. Ame hë e thupen, hnei Iehova hna ce nyithupene koi Eli me lue nekö i angeic. Matre pë hë matra i Eli göi troa sisedrëne la huliwa i angeic, ene la troa atre huuje ka sisitria. (1 Samuela 3:10-14) Maine mele ju fe epuni ngöne la ijine i Eli me öhne laka, angeic a nue la lue nekö i angeic troa kuca la ngazo, hapeu, tro kö epuni lai a thixötr? Tro kö la ewekë cili a ananazijëne la lapaune i epuni koi Iehova,  me sewe epuni troa kuca la itre huliwa i Nyidrë?

7. Nemene la ngazo hna kuca hnei Davita, nge nemene la hna kuca hnei Iehova?

7 Lolo catre la thiina i Davita, celë hi kepine matre, tru la hnei Iehova hna hnimi angeic, ngacama hetre ngazo ka tru hna kuca hnei angeic. (1 Samuela 13:13, 14; Ite Huliwa 13:22) Hnei angeic hna ce meköl me Batheseba, föi Uria, nge ijine Uria pena ngöne la hna isi, ame hna upune pi la föe. Tha ajane kö Davita matre troa atre, haawe, angeic a upi Uria jë kowe la hnalapa i angeic troa wai Batheseba. Aja i Davita tro Uria a ce meköl me Batheseba matre tro pë hë la itre atr a mekune ka hape, Uria la keme ne la nekönatr. Ngo ame pe, tha weje ju kö Uria la hnalapa i angeic. Haawe, Davita a thele jëne jë matre troa humuthi Uria ngöne la hna isi. Hnene la hna kuca la ngazo ka tru celë hnei Davita, ene pe, atraqatre la akötr hna melëne hnei angeic me hnepe lapa i angeic e thupen. (2 Samuela 12:9-12) Ngo ame pe tru la utipine i Iehova, ame hnei Nyidrëti hna nue la ngazo i angeic. Atre hnyawa hi Nyidrëti laka, Davita la atre ka ajane la meköt. (1 Ite Joxu 9:4) Maine ka mele ju fe epuni ngöne la ijine cili, tune kaa la aqane tro epuni a ujë, tro kö epuni a hmaca hna nyihlue i Iehova pine la ngazo i Davita?

8. (a) Nemene la ngazo hna kuca hnei Peteru? (b) Pine nemene matre hnei Iehova hna thue hnëqa i angeic ngacama hnei angeic hna tria?

8 Hetre ketre atr hna qaja hnei Tusi Hmitrötr, ene Peteru. Hnei Iesu hna ië angeic troa hane ketre aposetolo i nyidrë. Anyimua qaja me kuca hnei Peteru la itre ewekë  ka tha meköti kö. Ame la ketre ijin öni Peteru, tha tro pi kö angeic a nuetriji Iesu ngacama troa trotriji nyidrë hnei itre xan. (Mareko 14:27-31, 50) Ngo ame hë la kola othi Iesu, hnene la itre aposetolo asë, ene Peteru mina fe, hna trotriji nyidrë. Ame ngöne la ijine cili, aköni a kelikelë Iesu hnei Peteru me hape, thatre Iesu kö hnei angeic. (Mareko 14:53, 54, 66-72) Ame hë e thupen, tru la hleuhleu thei angeic pine la hnei angeice hna kuca. Ame hnei Iehova hna nue la ngazo i angeic, me thue xa hnëqa i angeic e thupen. Maine ketre atre drei Iesu fe epuni ngöne la ijine cili, me atre la hna kuca hnei Peteru, hapeu, tro pala kö epuni a mejiune koi Iehova?

Loi e xecie koi së laka, ka meköti pala hi la hna kuca hnei Akötresie

9. Pine nemene matre tro sa mejiune laka, ka meköti pala hi Akötresie?

9 Qa ngöne la itre hna melën hne së hna ce wang, hetre itre hlue i Iehova ka kuca la itre ngazo ka tru, matre hna akötrëne fe la itre xan. E traqa ju la ketre ewekë ka tune lai enehila, nemene la hnei epuni hna troa kuca? Maine jë, tha tro hë epuni lai a hane sine la itre icasikeu, me nuetriji Iehova fe me nöje i Nyidrë. Maine pena, tro epuni e cili a atrehmekune laka, ka utipine Iehova nge ka ajane tro la atr a ietra. Ngo hetre itre ijine laka, tha ietra kö la atr ka kuca la ngazo. Tro kö epuni a mejiune koi Iehova laka, atre hnyawa kö Nyidrë la jol, nge tro kö Nyidrëti a nyinyin ngöne la nyipi ijin? Ame itre xa ijin, kola upetrön eë la atr ka tune lai qa hnine la ekalesia. Ame e cili, loi e xecie koi së laka, ka meköti pala hi la hna kuca hnei Akötresie.

MELE NYIPICI JË

10. Nemene la hna trotrohnin hnei Iesu ngöne la kola akötrë nyidrë hnene la aqane ujë i Iuda me Peteru?

10 Hetrenyi e hnine la Tusi Hmitrötr la itre atr ka mele nyipici koi Iehova me kowe la nöje i Nyidrë, ngacama kola kuca la ngazo hnene la itre ka lapa xötreithi angatr. Iesu la tulu ka sisitria! Thupene la hnei nyidrëti hna thithi ngöne la jidri ka pexej, hnei nyidrëti hna iëne la ala 12 lao aposetolo. Ngo hnei Iuda Isakariota, ketre e angatr, hna wanaxoeë nyidrë. Ketre, hnei Peteru fe hna kelikelë Iesu me hape, thatre nyidrëti kö hnei angeic. (Luka 6:12-16; 22:2-6, 31, 32) Ngacama hna akötrë Iesu hnene la aqane ujë ne la ange aposetolo, ngo atre hnyawa hi nyidrë laka, tha angatre kö me Iehova la atrekëzön. Hnei Iesu pe hna qale catre kowe la Keme i nyidrë, me nyihlue nyipici pala hi koi Iehova. Hnei Iehova pë hë hna amanathithi nyidrë, me amele nyidrëti hmaca, nge thupene hë, hna acili Joxu nyidrëti ngöne la Baselaia.—Mataio 28:7, 18-20.

11. Nemene la hnei Tusi Hmitrötr hna perofetan göne la itre hlue i Iehova enehila?

11 Kola ini së hnene la tulu i Iesu troa mele nyipici koi Iehova, me kowe la itre hlue i Nyidrë. Nyimu kepin matre nyipi ewekë tro sa ujë tune lai. Iehova enehila a eatrongëne la itre hlue i Nyidrë. Nyidrëti a xatua angatr troa cainöjëne la nyipici e cailo fen, nge pëkö xa hmi ka hane kuca tun. Ketre, ka casi  me madrine la itre hlue i Iehova ke, Iehova la ka ini angatr. Öni Iehova e perofetane lai ka hape: “Tro la ite hlueng’ a hë draië kola aciaci [maine madrin] la hni.”—Isaia 65:14.

Hmo la atre nuetriji Iehova me nöje i Nyidrë, pine hi laka, hnene la ketre trejin hna qaja me kuca la ketre ewekë ka tha meköti kö!

12. Nemene la nyine tro sa kuca e kuca jë la ngazo hnene la ketre trejin?

12 Tru la madrine së ke Iehova la ka eatrongë së me xatua së ngöne la nöjei ewekë ka loi hne së hna kuca. Nge ame pena la itre atr ka mele ngöne la fene i Satana, tre pëkö madrine i angatr nge pëkö mejiune i angatr! Matre hmo la atre nuetriji Iehova me nöje i Nyidrë, pine hi laka, hnene la ketre trejin hna qaja me kuca la ketre ewekë ka tha meköti kö! Haawe, nyipi ewekë tro sa mele nyipici koi Iehova me drengethenge la itre hnei Nyidrëti hna amekötin. Nyipi ewekë fe tro sa ce wange la aqane tro sa ujë e kuca jë la ngazo hnene la ketre trejin.

NEMENE LA AQANE TRO SA UJË?

13, 14. (a) Pine nemene matre loi e tro sa atreine ixomihnikeu? (b) Nemene la hna thingehnaean nyine tro sa lapa mekun?

13 Nemene la nyine tro epuni a kuca e traqa ju qaja me kuca la ketre ewekë hnene la ketre trejin nge ka akötrë epun? Öni Tusi Hmitrötr: ‘The saqe kö la hni eö troa elëhni, ke ej e kuhu hni ne la atr ka hmo la elëhni.’ (Ate Cainöj 7:9) Itre atr ka tha pexeje kö së nge itre ka tria. Matre tha tro pi kö sa mekune ka hape, tro pala hi a lolo la itre ithanata me aqane ujë ne la itre trejine koi së. Ketre, tha nyine loi kö koi së troa lapa mekune la itre tria i angatr. E hne së hna ujë tune lai, tro ha patre the së la madrin ngöne la easë a nyihlue i Iehova. Goi tro fe a nanazije la lapaune së, nge tro fe hë së a trotrije la organizasio i Iehova. Ame hë la pune lai, tha itre hlue i Iehova hmaca kö së nge tha ijiji së hë elanyi troa hane mele ngöne la fene ka hnyipixe.

14 Nemene la ka troa xatua së troa hetrenyi pala hi la madrine troa nyihlue i Iehova, ngacama kola nango ajolë së hnene la hna kuca hnei itre xan? Loi e tro pala hi sa lapa mekune la hna thingehnaeane celë, kola hape: “Hana wang, ini a xupe la hnengödrai ka hnyipixe me fene hnengödrai ka hnyipixe ; nge tha tro hmaca kö a mekune la hnapan, me xulu e kuhu hni at.” (Isaia 65:17; 2 Peteru 3:13) Tro kö Iehova a amanathithi së tune lai, e hne së hna mele nyipici koi Nyidrë.

15. Nemene la hna upi së hnei Iesu troa kuca e traqa jë akötrë së hnei ketre?

15 Eje hi laka, tha easë pala kö a mele ngöne la fene ka hnyipixe. Matre e traqa jë akötrë së hnei ketre, nyipi ewekë tro sa mekune hnyawa la hnei Iehova hna thele the së. Öni Iesu lo: “Maine tro nyipunieti a nue tije la ite menu ne la nöjei ate, kete tro Tetetro i nyipunieti e koho hnengödrai a nue tije la ite menu i nyipunie.” Nge ame lo Peteru a hnyingë Iesu ka hape: ‘Tro kö ni a asevene lao nue la ngazo i ketre?’ Öni Iesu e sa ka  hape: “Tha öninge kö koi ’ö troa uti ngöne la [seven] ; ngo loi pe troa uti kowe la [semitre seven].” Iesu a amamane koi së e celë la enyipiewekëne troa nue la ngazo ne la itre trejin.—Mataio 6:14, 15; 18:21, 22.

16. Nemene la tulu ka lolo hna amë hnei Iosefa?

16 Kola ini së hnene la tulu i Iosefa la aqane tro sa ujë e traqa ju akötrë së hnei ketre. Ala 12 lao nekö i Iakobo trahmany, nge Iosefa hi me neköi jini angeic la lue nekö i nyidrë me Rakela, lue hna hnime catrën hnei nyidrë. Matre zalu catre la itre trejin me angeic. Angatre pë hë a salemë angeice jë tune la ketre hlu ke xele catre angatr ma wai angeic, ame hna xomi angeic a tro Aigupito. Ame hë la itre macatre thupen, hnene la joxu ne Aigupito hna acili angeic troa musi kowe la nöj, ke kola haine la aqane huliwa i Iosefa. Thupene lai, kola traqa e Aigupito hnene la itre trejin me Iosefa troa itö xen, ke kola jiine ngöne la nöj. Ame la angatr a öhnyi Iosefa tha wangatrehmekunyi angeice kö hnei angatr. Ngacama wangatrehmekunyi angatre hi hnei Iosefa ngo tha hnei angeice kö hna të koi angatr la ngazo hna kuca koi angeic. Hnei angeice pe hna tupathi angatr göi troa atre ka hape, ujë jë kö la thiina i angatr. Ame hë la Iosefa a öhne laka, ujë hë angatr, angeice hi lai a qaja amamane koi angatr ka hape, angeice hi lo trejine me angatr. Angeice pë hë a akeukawane jë la hni angatr me hape: “The qou kö nyipunie  ; tro ni a wai nyipunie me ite nekö i nyipunie.”—Genese 50:21.

17. Nemene la nyine tro sa kuca e traqa jë tria hnei ketre?

17 The thëthëhmine kö laka, itre atr ka tria asë hi së, matre tro fe së lai a hane akötrë itre xan. Haawe, maine atre hë epuni laka, hnei epuni hna akötrë ketre, xötrethenge jë la eamo ne la Tusi Hmitrötr, ene la troa thele troa iloi. (E jë la Mataio 5:23, 24.) Madrine hi së la kola nue la tria së hnei ketre, haawe, loi e tro fe sa ujë tun koi itre xan. Öni kolose 3:13, MN: “Loi e ixomihninekeune me inuekeune nyipunie, maine hetre gele i ketre atr koi ketre ; hna nue nyipunie hnei Iehova, ketre tro nyipunie a tun.” Maine ka hnime së la itre trejin, tha tro kö së lai a lapa fë elëhni pine la ngazo hna kuca koi së ekö hnei ketre. (1 Korinito 13:5) Maine hne së fe hna nue la ngazo i ketre, ketre tro fe Iehova lai a nue la ngazo së. Haawe, e traqa ju tria hnei ketre, loi e tro sa hetre utipin tune la aqane utipi së hnei Iehova Keme së.—E jë la Salamo 103:12-14.