Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Ita Ne Thup (Nyine Inin)  |  Juun 2016

Iesu Keriso la hna nyi hatren hnene la trahmanyi ka hetre ge ne cinyihan. Nyidrëti hmekuje hi la ka troa siji hatrene la itre atr hna troa amelen elany

Itre Hnyinge Ne La Itre Ka e

Itre Hnyinge Ne La Itre Ka e

Drei la ala cangemene (maine sikisi ) lao atr ka xulu fë la ite “ewekë nyine ihumuth” memine lo atr ka “hetre ge ne cinyihane” hna meköle goeëne hnei Ezekiela?

Kola nyihatrene la itre trongene isi e hnengödrai ka lepe apatrenyi Ierusalema ekö, nge ka troa lepe apatrene fe la fene i Satana e Amagedo. Tha kolo hmaca kö lo aqane trotrohnine së ekö. Ngo pine nemene matre saze pi?

Qëmekene troa lepe apatrenyi Ierusalema lo 607 qëmeke i Keriso, hnei Iehova hna pane amamane koi Ezekiela la itre huliwa hna kuca e cili. Hnei angeic hna meköle goeëne la itre ewekë ka ngazo hna kuca. Thupene lai, hnene la ala sikisi lao trahmanyi hna “xulu fë la ite ewekë nyine ihumuth.” Nge hna hane traqa fe la ketre trahmanyi ka “xetë lino” nge ka “hetre ge ne cinyihane.” (Ezekiela 8:6-12; 9:2, 3) Önine lai atre cili: “Trongënejë eö la lapa nyipine Ierusalema, nge tro eö a nyi hatene ngöne la ite göpadi ne la ite ate itete awe me teije latesi pine la ite ewekë ka sisi asë lo hna kuca nyipin’ ej.” Thupene lai, hna upe la ala sikis troa humuthe la itre atr ka pë hatren. (Ezekiela 9:4-7) Nemene la itre ini koi së qa ngöne la hna meköle goeëne hnei Ezekiela? Nge drei la trahmanyi ka hetre ge ne cinyihan?

Hnei Ezekiela hna meköle goeëne la ewekë cili lo macatre 612 qëmeke i Keriso. Ame hë la faifi lao macatre thupen, hna eatre lai hmekune lo ijine Iehova a aijijëne la angetre Babulona troa lepe apatrenyi Ierusalema. Ame e cili, hnei Iehova hna lepe apatrene la itre ka tha idrei me ka kuca la ngazo jëne la angetre Babulona. (Ieremia 25:9, 15-18) Ngo tune kaa jë lo angetre Iudra ka tha hane kö kuca la itre huliwa ka ngazo? Hnei Iehova hna amele angatr.

 Ame ngöne la hna meköle goeëne hnei Ezekiela, tha angeice kö la ka siji hatrene la itre atr, maine hane lepe apatrenyi Ierusalema. Nga drei jë kö la itre ka xomiujine la isi göi troa lepe apatrene lai traon? Hna nue la hnëqa cili kowe la itre angela. Haawe, trotrohnine hë së la itre ewekë ka traqa e koho hnengödrai. Hnei Iehova hna upe la itre angela troa xomiujine la isi göi troa lepe la itre atr ka ngazo, nge tro pe kö a mel la itre atr ka meköt. *

Tro pala kö a hetre aqane eatr elanyi la hna meköle goeëne celë. Hne së lo hna majemine qaja ka hape, ame la atre ka hetre ge ne cinyihane, tre, kola nyihatrene la itre hna iën ka mele pala kö. Ketre, kola mekune fe ekö ka hape, kola siji hatrene la itre atr ngöne la angatr a kapa la maca hne së hna cainöjën. Ngo mama hnyawa ha enehila laka, nango tria pi hë lo aqane trotrohnine së. Matre, thenge la hna qaja ngöne Mataio 25:31-33, Iesu hmekuje hi la atre amekötine la itre atr. Nge tro kö nyidrëti a kuca lai ngöne la ijine akötr atraqatr. Ame hë e cili, tro pe kö a mel la itre atr hna aceitunëne me mamoe, nge tro pë hë a apatrene la itre atr hna aceitunëne me gootr.

Matre hapeu, hetre ini kö koi së qa ngöne la hna meköle goeëne celë? Faifi lao ini nyine tro sa xome qa ngön:

  1. Qëmekene troa lepe apatrenyi Ierusalema, hnei Ezekiela me Ieremia me Isaia hna pane thuemacane la itre atr göne la itre ewekë ka troa traqa kowe la traon, tune la hna kuca hnene la ketre atre ka thup. Enehila mina fe, Iehova a inine me hnëkëne la itre hlue i Nyidrë, me thuemacane la itre atr jëne la neköi lapa ne la itre hna iën, qëmekene troa nyiqaane la akötr atraqatr. Ngo eje hi laka, hnëqa ne la itre hlue i Iehova asë, ene la itre atrene la “hnalapa,” troa eatrëne la huliwa ne cainöj.—Mataio 24:45-47.

  2.  Tui Ezekiela ekö, tha itre hlue i Iehova kö la ka siji hatrene la itre ka troa mele pe qa ngöne la akötr atraqatr. Ngo hnëqa i angatre troa catre hmekëne la itre atr qa ngöne la itre ewekë ka troa traqa. Nge eje hi laka, angatr a atreine cainöj e cailo fen, ke hnene la ixatua ne la itre angela.—Hna Amamane 14:6.

  3.  Ame la itre atr hna amelene ngöne la hneijine i Ezekiela, tre, pëkö hatr ka mama hune la itre göpadri angatr. Ketre mina fe, pëkö hatren ka mama thene la itre atr ka troa mel elany. Matre nemene jë la nyine troa kuca hnene la itre ka ajane troa mele pe qa ngöne la akötr atraqatr? Loi e tro angatr enehila a pane kapa la maca ka loi, me nyitipu Iesu, me nue la mele i angatre koi Iehova, me catre sajuëne la itre jini Keriso ngöne la huliwa ne cainöj. (Mataio 25:35-40) Nge ame hë ngöne la ijine akötr atraqatr, tro ha siji hatre i angatr, kola hape, tro ha amele angatr.

  4.  Ame la trahmanyi ka hetre ge ne cinyihan, tre kola nyihatre i Iesu. Nge ngöne la ijine akötr atraqatr, tro nyidrëti a siji hatrene la ka ala nyimu atraqatr, me jele meköti angatr ceitu me itre mamoe. Celë hi lai ka troa aijijë angatr troa mele epine palua e celë fen.—Mataio 25:34, 46. *

  5.  Ame enehila, kola nyihatrene la sikisi lao trahmanyi ka xulu fë la ite ewekë nyine ihumuth, hnene la itre trongene isi e hnengödrai hna elemekene hnei Iesu. Easenyi hë matre lepe apatrene paluane pi angatr la itre mus, me iangazo qa la fen.—Ezekiela 10:2, 6, 7; Hna Amamane 19:11-21.

Kola akeukawanyi së ngöne la easë a atre ka hape, tha tro pi kö Iehova a ce apatrene la itre ka meköt me itre ka ngazo. (2 Peteru 2:9; 3:9) Kolo fe a amekunë së laka, enehila hi la ijine tro sa catre cainöj ke loi e tro la nöjei atr asë a isa atre ka hape, calemi catre hë la pun!—Mataio 24:14.

^ par. 6 Ame la itre xa atr ka mele pe tre, Baruka (atre cinyihane i Ieremia), Ebede-melek ate Aithiope, me angetre Rekaba. Nyipici laka, pëkö hatrene hna sija hune la itre göpadi angatr. (Ieremia 35:1-19; 39:15-18; 45:1-5) Ngo ame la kola qaja ka hape, hna siji hatren, tre nyine amamane ka hape, tro pe kö angatr a mel.

^ par. 12 Tha nyipi ewekë kö troa siji hatrene la itre hna iën. Tro pe a pelehatrene tixenuë angatr qëmekene tro angatr a mec, maine qëmekene troa nyiqaane la akötr atraqatr.—Hna Amamane 7:1, 3.